Një operacion kërkim-shpëtimi është zhvilluar gjatë natës në Gadishullin e Karaburunit, pasi dy 17-vjeçarë gjermanë humbën orientimin gjatë eksplorimit të zonës dhe nuk mundën të gjenin të sigurt rrugën e kthimit.

Alarmi është dhënë rreth orës 23:50, pas një sinjalizimi të përcjellë nga Ambasada Gjermane në Shqipëri. Menjëherë pas njoftimit, ekipi i Stacionit të Vlorës të Shpëtimit Alpin dhe Speleologjik, në bashkëpunim me strukturat e Policisë, u nis drejt zonës ku dyshohej se ndodheshin të rinjtë.

Kërkimet vijuan për disa orë gjatë natës në terrenin e Karaburunit, derisa dy 17-vjeçarët u lokalizuan pranë zonës së njohur si “Ravena”.

Pas gjetjes së tyre, ekipet kontrolluan gjendjen shëndetësore të të rinjve dhe iu ofruan ujë e ushqime. Më pas nisi evakuimi në rrugë tokësore.

Operacioni përfundoi rreth orës 04:30 të mëngjesit të 1 gushtit, kur dy të rinjtë u dorëzuan pranë Stacionit të Policisë.

Shpëtimi Alpin dhe Speleologjik në Shqipëri falenderoi vullnetarët dhe strukturat e përfshira në operacion, ndërsa u bëri thirrje turistëve që eksplorojnë zona të thella natyrore të planifikojnë paraprakisht itinerarin, të informohen për terrenin dhe, kur është e mundur, të shoqërohen nga persona që e njohin zonën. Saranda Web

The post Humbën rrugën në mes të natës, dy 17-vjeçarët gjenden pas disa orësh kërkime appeared first on Saranda News.

Në reagimin e dërguar në redaksinë e Saranda Web, avokati deklaron se K.J. nuk ka asnjë lidhje me ngjarjen për të cilën akuzohet dhe se arrestimi i tij është kryer, sipas mbrojtjes, në kundërshtim me ligjin.

Dërvishi sqaron se në automjetin ku ndodhej K.J. nuk është gjetur lëndë narkotike. Sipas tij, automjeti ka qenë një prej mjeteve të ndaluara nga Policia gjatë kontrollit të një karvani automjetesh dhe K.J. është implikuar si bashkëpunëtor pa pasur prova konkrete që ta lidhin me veprën penale.

Avokati kundërshton gjithashtu deklaratën e Policisë se K.J. ka precedentë në fushën e narkotikëve, ndërsa e përshkruan atë si një të ri me integritet, të rritur në një familje të nderuar, me të dy prindërit mësues dhe me reputacion të mirë në komunitet.

Mbrojtja i ka dërguar një kërkesë prokurores së çështjes, përmes së cilës kërkon rishikimin e menjëhershëm të arrestit dhe lirimin e K.J., me argumentin se nuk ekziston asnjë provë që e lidh atë me ngjarjen.

Ndërkohë, sipas njoftimit zyrtar të Policisë, 5 kilogramët e dyshuar cannabis sativa u gjetën në një automjet tjetër, të drejtuar nga A.N., ku udhëtonte edhe A.C. Për K.J., Policia pretendon se ai lëvizte me një automjet tjetër për të monitoruar itinerarin dhe për të sinjalizuar praninë e shërbimeve policore, pretendim që kundërshtohet nga mbrojtja. Saranda Web

The post Avokati kundërshton deklaratën e Policisë: K.J. nuk ka lidhje me ngjarjen, është arrestuar pa prova appeared first on Saranda News.

Sipas Policisë, në pranga kanë rënë A. N., 31 vjeç, dhe A. C., 30 vjeç, të dy banues në Lukovë, si dhe K. J., 26 vjeç, banues në Sarandë.  Ata u kapën në rrugën Nivicë–Sarandë, pranë urës së Kakomesë, teksa lëviznin me dy automjete. Në makinën e drejtuar nga A. N., ku ndodhej edhe A. C., Policia gjeti dhe sekuestroi rreth 5 kilogramë lëndë të dyshuar cannabis sativa.

Sipas hetimeve, droga dyshohet se po transportohej për t’u shitur në Sarandë dhe Ksamil, ndërsa K. J. dyshohet se lëvizte me automjetin tjetër për të kontrolluar itinerarin dhe për të sinjalizuar në rast të pranisë së Policisë.

Hetimet vijojnë për identifikimin e personave të tjerë që mund të jenë përfshirë në këtë veprimtari. Saranda Web

Avokati kundërshton deklaratën e Policisë: K.J. nuk ka lidhje me ngjarjen, është arrestuar pa prova

The post Me 5 kg kanabis drejt Sarandës dhe Ksamilit, arrestohen 3 persona pranë urës së Kakomesë appeared first on Saranda News.

Deputeti Ardit Bido ka fshirë nga faqja e tij në Facebook videon ku njoftonte firmosjen e propozimit për Reformën Administrativo-Territoriale 2.0 dhe deklaronte se Delvina dhe Konispoli do të vazhdonin të mbeteshin bashki më vete.

Videoja, e publikuar pas firmosjes së propozimit nga deputetët e mazhorancës, anëtarë të Komisionit të Posaçëm Parlamentar për Reformën Administrativo-Territoriale, nuk rezulton më në faqen e tij. Ende nuk dihen arsyet e fshirjes dhe deri më tani Bido nuk ka dhënë një shpjegim publik për këtë veprim.

Në reagimin e tij, deputeti deklaronte se Saranda, Delvina, Konispoli, Himara dhe Finiqi do të mbeteshin bashki më vete. Por postimi solli edhe kundërshti të shumta në rrjetet sociale, jo vetëm për argumentet e përdorura për ruajtjen e këtyre bashkive, por edhe për mënyrën se si Bido argumentonte bashkimin e Selenicës me Vlorën.

“Lumi i Vlorës i takon Vlorës. Prandaj, me kërkesën e banorëve, Selenica do të bashkohet me Vlorën”, deklaronte Bido në postimin që shoqëronte videon.

Ky argument u bë pjesë e debatit dhe reagimeve në rrjetet sociale.

Nëse fshirja e videos lidhet me këto kundërshti, me argumentet për bashkimin e Selenicës me Vlorën apo me një arsye tjetër, mbetet ende e paqartë.

Propozimi për Reformën Administrativo-Territoriale 2.0 parashikon uljen e numrit të bashkive nga 61 në 46. Delvina dhe Konispoli nuk janë përfshirë mes bashkive që propozohet të shkrihen, ndërsa Selenica, sipas propozimit të depozituar, parashikohet t’i bashkohet Vlorës. Saranda Web

The post Firmosi “pavarësinë” e Delvinës dhe Konispolit, Ardit Bido fshin videon nga Facebook appeared first on Saranda News.

Një ngjarje e rëndë është regjistruar mëngjesin e sotëm në afërsi të zonës së Porto Palermos, ku një 65-vjeçar ka humbur jetën pas shpërthimit të një lënde plasëse.

Sipas njoftimit të Policisë, ngjarja ka ndodhur rreth orës 09:00. Dyshohet se shtetasi Pandeli Mërkuri, 65 vjeç, ishte duke kryer peshkim të paligjshëm me lëndë plasëse, kur dinamiti ka shpërthyer duke i shkaktuar dëmtime të rënda.

65-vjeçari është transportuar menjëherë drejt Qendrës Shëndetësore të Himarës për ndihmë mjekësore, por nuk ka mundur t’u mbijetojë plagëve dhe ka humbur jetën.

Policia bën të ditur se grupi hetimor, nën drejtimin e Prokurorisë, po vijon veprimet për të zbardhur rrethanat e plota të ngjarjes dhe për dokumentimin e saj. Saranda Web

The post Tragjedi në det/ 65-vjeçari humb jetën, po peshkonte me dinamit appeared first on Saranda News.

Zjarrfikësit e Sarandës, Delvinës, Konispolit, Finiqit dhe Himarës, të angazhuar në operacionet për shuarjen e zjarreve në zonën e Sarandës, do të përfitojnë një pagë shtesë. Vendimi është bërë i ditur nga ministri i Mbrojtjes, Ermal Nufi, i cili njoftoi se është miratuar shpërblimi me një rrogë shtesë për efektivët e Forcave të Armatosura dhe zjarrfikësit që kanë marrë pjesë në operacionet kundër zjarreve.

@sarandaweb

Një zjarr ka rënë gjatë natës në zonën e Gjirit të Hartës, në Ksamil. Sipas informacioneve të përcjella për Saranda Web, zjarri është shfaqur pas orës 03:00 të mëngjesit. Në zonë kanë ndërhyrë forcat zjarrfikëse, ndërsa drejtori i zjarrfikësve të Sarandës konfirmon se zjarri është vënë nën kontroll. Për momentin nuk ka të dhëna të konfirmuara për dëme apo për shkaqet e zjarrit. #zjarr #ksamil #ksamili #sarandaweb #zjarrfikës

♬ Silent Hill – Various Artists

“Miratuam një rrogë shtesë për ushtarët e zjarrfikësit që kanë punuar për shuarjen e zjarreve”, deklaroi Nufi.

Në zonën e Sarandës, zjarrfikësit e pesë bashkive u angazhuan në përballimin e vatrave të zjarrit, mes tyre zjarri në Bregas (Vromeros) dhe zjarri në Gjirin e Hartës në Ksamil. Operacionet kërkuan angazhim të forcave nga disa bashki për të kufizuar përhapjen e flakëve dhe për të mbrojtur zonat e rrezikuara.

Dhënia e një page shtesë për forcat e angazhuara ishte paralajmëruar pak ditë më parë edhe nga kryeministri Edi Rama, ndërsa tashmë ministri Nufi ka bërë të ditur miratimin e masës.

Shpërblimi vjen pas një periudhe me vatra zjarri në disa zona të vendit, ku zjarrfikësit dhe efektivët e Forcave të Armatosura janë angazhuar në terren për shuarjen dhe mbajtjen nën kontroll të flakëve. Saranda Web

The post Zjarrfikësit e Sarandës, Delvinës, Konispolit, Finiqit dhe Himarës përfitojnë 1 pagë shtesë appeared first on Saranda News.

Një denoncim i mbërritur në Saranda Web nga Dhërmiu ngre shqetësimin për largimin e papritur të tre punonjësve filipinezë nga një hotel ku ishin të punësuar gjatë sezonit turistik. Sipas personit që ka kontaktuar redaksinë, bëhet fjalë për tre shtetas filipinezë, një djalë dhe dy gra, të cilët dyshohet se kanë lënë punën dhe janë larguar nga hoteli gjatë ditës së sotme, në një moment kur pronari i biznesit ndodhej jashtë Shqipërisë.

Denoncuesi pretendon se largimi ka qenë i papritur dhe se tre punonjësit janë nisur në drejtim të Sarandës, duke e lënë hotelin pa stafin që ishte kontraktuar për këtë periudhë të sezonit.

Në mesazhin dërguar Saranda Web ngrihen gjithashtu pikëpyetje mbi arsyen e largimit të tyre të papritur dhe të paparalajmëruar. Megjithatë, rrethanat e largimit mbeten të paverifikuara dhe, deri në këtë moment, Saranda Web nuk disponon informacion për ndonjë kallëzim apo konstatim zyrtar nga Policia.

Denoncuesi shprehet se qëllimi i publikimit është të vërë në dijeni edhe bizneset e tjera ku tre punonjësit mund të kërkojnë punë pas largimit nga Dhërmiu.

Saranda Web e publikon denoncimin si pretendim të personit që ka kontaktuar redaksinë dhe jo si fakt të konfirmuar, ndërsa mbetet e hapur për reagimin e personave të përfshirë, të hotelit apo të institucioneve përkatëse. Saranda Web

The post Mungonte pronari, 3 filipinezët ia mbathin nga hoteli ku punonin në Dhërmi, nisen drejt Sarandës appeared first on Saranda News.

Banorë të fshatit Nivicë-Bubar kanë denoncuar se disa qytetarë janë shoqëruar sot në Komisariatin e Policisë pas ngjarjeve të protestës së djeshme në Kakome. Sipas informacionit të bërë publik nga banorët, personat në fjalë po pyeten në lidhje me veprën penale të “dëmtimit të pronës”.

Përmes një reagimi të dërguar në Saranda Web, banorët kërkojnë lirimin e menjëhershëm të të shoqëruarve, duke paralajmëruar se në të kundërt protesta do të përshkallëzohet dhe do të zhvendoset përpara Komisariatit të Policisë në Himarë.

“Ne kërkojmë lirimin e menjëhershëm të tyre, përndryshe do të përshkallëzojmë protestën përpara komisariatit të policisë në Himarë”, thuhet në reagimin e banorëve.

Kujtojmë se protesta e djeshme në Kakome tërhoqi vëmendje të madhe publike dhe u ndoq nga afër nga mediat, ndërsa zhvillimet e sotme pritet të sjellin reagime të mëtejshme nga komuniteti. Saranda Web

The post Shoqërimet në polici ndezin reagimet e banorëve: Paralajmërohet protestë para komisariatit në Himarë appeared first on Saranda News.

Skema e re sjell ndryshime të rëndësishme, sidomos për sektorin e blegtorisë dhe bletarisë, ku kushtet për përfitim janë lehtësuar dhe financimet janë rritur. Kryeministri Edi Rama e cilësoi këtë si një tjetër hap konkret në mbështetje të bujqësisë shqiptare, formalizimit të sektorit dhe zhvillimit të qëndrueshëm rural.

Nga ana tjetër, ministri i Bujqësisë Andis Salla u bëri thirrje fermerëve që të aplikojnë përmes portalit e-Albania për të përfituar nga 12 masat mbështetëse që përfshin skema.

Një nga ndryshimet kryesore këtë vit lidhet me blegtorinë. Numri minimal i bagëtive për të përfituar subvencion është ulur ndjeshëm. Për tufat e gjedhit, fermerët do të marrin 12 mijë lekë për krerë, ndërsa tashmë mjafton të kenë minimumi 5 lopë, nga 10 që kërkoheshin më parë. Edhe për të imtat është rritur financimi në 1.500 lekë për krerë, ndërsa kufiri minimal është ulur nga 100 në 50 krerë.

Për herë të parë, skema parashikon mbështetje edhe për dosat dhe paradosat, me 7 mijë lekë për krerë për fermat që kanë të paktën 5 të tilla. Ndërkohë, bletarët do të përfitojnë financim të dyfishuar, deri në 20 mijë lekë për zgjua, ndërsa numri minimal i koshereve është ulur nga 50 në 25.

Ndryshim i rëndësishëm këtë vit është edhe heqja e skemës së naftës pa taksa për fermerët. Ministria argumenton se skema nuk ka dhënë rezultatet e pritshme dhe në disa raste janë konstatuar abuzime.

Po ashtu, fermerët do të duhet të pajisen me faturë tatimore kur shesin produktet tek grumbulluesit apo agroturizmat, në mënyrë që të përfitojnë kompensimin prej 10%, i cili pritet të nisë nga data 1 korrik.

Skema përfshin masa direkte mbështetëse për blegtorinë, bletarinë, fermat organike, sipërfaqet e mbjella dhe certifikimet bujqësore, por edhe masa investimi për fermerët e rinj, ndërtimin e stanëve dhe modernizimin e pajisjeve bujqësore. Saranda Web

The post Hapen aplikimet për skemën kombëtare të bujqësisë. Përfitojnë blegtorët, për bujqit s’ka më naftë appeared first on Saranda News.

Gjatë fjalës së tij, bashkëkryetari socialist i Komisionit, Arbjan Mazniku, u shpreh se diskutimi për reformën duhet të fokusohet fillimisht tek funksionaliteti dhe eficienca e bashkive, e jo vetëm tek ndarja territoriale.

Sipas Maznikut, reforma duhet të synojë forcimin e pushtetit vendor dhe rritjen e kapaciteteve të bashkive për të ofruar shërbime më të mira për qytetarët. Ai theksoi se Shqipëria duhet të përgatitet për sfidat e integrimit europian dhe përfitimin nga fondet e Bashkimit Europian.

“Është një moment që ne mund të shohim si mund t’i bëjmë bashkitë më efiçente dhe më efektive. Reforma duhet të impaktojë jo vetëm katërvjeçarin e ardhshëm, por mënyrën sesi Shqipëria do të zhvillohet në 40 vitet e ardhshme. Nëse Shqipëria bëhet pjesë e BE-së në vitin 2029, vendi duhet të ketë bashki të forta për të përfituar nga fondet europiane”, deklaroi Mazniku.

Ai shtoi gjithashtu se një nga problematikat kryesore të reformës aktuale është delegimi i funksioneve në zona ku ato nuk mund të ushtrohen siç duhet, duke sjellë vështirësi në menaxhimin e shërbimeve bazë si pastrimi, mirëmbajtja dhe kanalet kulluese.

Nga ana tjetër, bashkëkryetari demokrat i Komisionit, Luçiano Boçi, e cilësoi si një dështim, duke marrë si shembull situatën në qarkun e Vlorës.

Boçi deklaroi se reforma e re duhet të përmbyllet me konsensus mes mazhorancës dhe opozitës, pasi në të kundërt, sipas tij, do të humbiste vlerën politike dhe institucionale.

“Territori nuk lexohet në Parlament, por në dëgjesat publike dhe në problemet reale të qytetarëve. Vlora është rasti më tipik i dështimit të Reformës Territoriale. Ka bashki që mbështeten nga qeveria dhe të tjera që mezi nxjerrin pagat. Kryebashkiakët sot i kanë duart e lidhura nga ndërhyrjet e pushtetit qendror”, tha Boçi.

Ai solli në vëmendje edhe raportin e vitit 2024 të Bankës Botërore, i cili sipas tij evidenton problematika konkrete në bashkitë Vlorë dhe Selenicë.

Dëgjesa në Vlorë është pjesë e turit të konsultimeve publike që Komisioni i Posaçëm po zhvillon në disa qarqe të vendit për të mbledhur propozime dhe shqetësime mbi reformën administrativo-territoriale dhe funksionimin e pushtetit vendor në Shqipëri. Saranda Web

The post Debatet për ndarjen territoriale gjatë dëgjesës publike në Vlorë – VIDEO appeared first on Saranda News.