Një nismë e re ligjore e depozituar në Kuvend nga mazhoranca ka hapur një debat të fortë mbi mënyrën se si do të zhvillohen portet turistike në Shqipëri.

Propozimi synon t’u japë investitorëve strategjikë mundësinë për të ndërtuar dhe shfrytëzuar porte turistike pa iu nënshtruar procedurave të konkurrimit apo koncesionit, siç parashikon aktualisht ligji. Nisma mban firmën e deputetes së Partisë Socialiste, Zamira Sinaj, e cila propozon ndërhyrje në legjislacionin ekzistues për të krijuar një mekanizëm paralel për realizimin e porteve turistike, kur ato janë pjesë e një projekti të miratuar si investim strategjik.

Në thelb, ndryshimi synon të përmbysë modelin aktual. Sipas kuadrit ligjor në fuqi, ndërtimi dhe operimi i porteve turistike realizohet përmes procedurës së koncesionit: investitori ndërton me kapital privat, por pas një periudhe të caktuar, infrastruktura i rikthehet shtetit. Me formulën e re, subjektet që kanë marrë statusin “Investitor Strategjik” nga Komiteti i Investimeve Strategjike, nëse porti është pjesë e investimit të tyre, përjashtohen nga detyrimi për procedurë gare.

Në praktikë, kjo do të thotë se një ndërtues resorti turistik mund të marrë automatikisht të drejtën për të ndërtuar dhe operuar edhe portin përkatës. Ndryshe nga modeli i koncesionit, ku prona rikthehet në shtet, porti turistik në këtë rast do të mbetet në mënyrë të përhershme në pronësi të privatit.

Duke argumentuar nevojën për këtë ndërhyrje, Sinaj solli si shembull investimin e Jared Kushner, dhëndrit të Donald Trump, në ishullin e Sazanit. Sipas saj, procedurat aktuale burokratike janë të gjata dhe rrezikojnë të dekurajojnë investitorët strategjikë.

“Investimi në ishullin e Sazanit, investitorët rrezikojnë të tërhiqen nëse ligji nuk kalon,” u shpreh deputetja, duke shtuar se Shqipëria duhet të reagojë shpejt për të mos humbur investime të mëdha ndërkombëtare.

Por kjo nismë është përballur me kundërshtim të fortë nga opozita, e cila ngre dyshime për transparencën dhe qëllimin e saj. Sipas deputetëve opozitarë, ekziston rreziku që ligji të jetë i orientuar drejt interesave të paracaktuara private.

“Nuk e kuptoj pse do e kaloni me shpejtësi, por kam përshtypjen se janë gati emrat që do të marrin portet e Shqipërisë,” u shprehën ata gjatë debatit në Kuvend.

Nga ana tjetër, Sinaj mbrojti propozimin si një zgjidhje praktike për të shmangur zvarritjet administrative.

“Propozimi është i thjeshtë: kur kemi një investim strategjik dhe porti është pjesë e këtij investimi, këtë procedurë ta bëjë vetë investitori pa kaluar në procedura të reja,” deklaroi ajo.

Debati shkon përtej një ndryshimi teknik ligjor dhe prek thelbin e politikave ekonomike. Investitorët strategjikë gëzojnë tashmë një sërë lehtësish, përfshirë përjashtime nga disa taksa, procedura të përshpejtuara dhe mbështetje shtetërore me infrastrukturë ndihmëse si rrugë, energji dhe kanalizime. Në disa raste, atyre u është dhënë edhe shfrytëzimi i pronave shtetërore me vlerë simbolike për periudha të gjata.

Një rast i njohur në Sarandë është Porti i Limionit, i cili fillimisht u dha me qira për 20 vite për vetëm 2,000 dollarë në vit dhe më pas përmes një Partneriteti Publik-Privat për 35 vite. Modeli i ri i propozuar në Kuvend shkon edhe më tej, duke krijuar mundësinë që portet turistike të mos kenë më afat rikthimi në pronësi shtetërore, por të mbeten përgjithmonë në administrim privat.

Opozita ngriti gjithashtu pikëpyetje mbi kohën e këtij ndryshimi, duke qenë se ligji për investimet strategjike pritet të përfundojë në dhjetor 2026. Por Sinaj paralajmëroi se mazhoranca po përgatit një tjetër shtyrje të afatit.

“Jemi duke përgatitur një draft për të shtyrë ligjin e investimeve strategjike për herë të shtatë,” u shpreh ajo.

Socialistët, ndërkohë, i hodhën poshtë akuzat për një ligj “me porosi”, duke argumentuar se qëllimi kryesor është krijimi i sigurisë juridike për investitorët strategjikë dhe harmonizimi i procedurave mes ligjit për portet turistike dhe atij për investimet strategjike.

Mes interesave ekonomike, debatit politik dhe shqetësimeve për transparencën, kjo nismë pritet të mbetet në qendër të vëmendjes publike, ndërsa Shqipëria përballet me dilemat mes tërheqjes së investimeve të huaja dhe ruajtjes së kontrollit mbi asetet strategjike.

The post “Do na iki Trump-i” – Deputetja argumenton pse portet duhet të bëhen pronë e investitorëve strategjikë appeared first on Saranda News.

7 prill i vitit 1939 mbetet një nga ditët më të rënda në historinë e Shqipërisë, kur forcat ushtarake të Italisë fashiste zbarkuan në brigjet shqiptare dhe vendosën pushtimin e vendit.

Në jug, Saranda ishte një nga pikat ku kjo ndërhyrje u ndje drejtpërdrejt, duke u kthyer në një nga skenat e para të përballjes mes pushtuesve dhe banorëve vendas.

Ngjarjet e asaj dite janë përjetuar dhe rrëfyer nga dëshmitarë okularë, ndër më të rëndësishmit kujtimet e Lame Xhama, i cili e përshkruan 7 prillin si “e premtja e zezë”. Ai kujton se propaganda italiane kishte kohë që vepronte në qytet përmes konsullatës dhe lidhjeve tregtare, duke përhapur idenë se Italia do të sillte shpëtimin e Shqipërisë. Megjithatë, realiteti i 7 prillit tregoi të kundërtën.

Sipas tij, rreth orës katër ose pesë të mëngjesit, limani i Sarandës u mbush me anije luftarake italiane, të cilat qëndronin në det të ngarkuara me ushtarë dhe armatime. Prania e tyre krijoi menjëherë panik. Banorët, të frikësuar nga bombardimet, filluan të largoheshin drejt fshatrave përreth, duke kaluar Qafën e Gjashtës dhe duke marrë me vete fëmijët dhe sendet më të nevojshme. Edhe vetë Lame Xhama, si kujdestar në Konvikti “Çamëria”, mori nxënësit dhe u largua drejt Vremeros për t’i mbrojtur.

Pak më vonë, nga deti nisën të dëgjoheshin gjëmime topash, krisma armësh dhe vërshëllima predhash. Italianët qëllonin për të përhapur panik dhe për të treguar forcën e tyre, por kjo nuk i trembi të gjithë. Një grup i vogël sarandjotësh u armatos dhe vendosi të përballet me pushtuesit në momentin e zbarkimit.

Në këtë përplasje të parë u shqua qëndresa e djemve vendas, të cilët i pritën italianët me armë. Lufta ishte e shkurtër dhe e pabarabartë. Nga pala shqiptare u plagos rëndë Mitro Dhimërtika nga Nivica, i cili më vonë ndërroi jetë dhe u shpall dëshmor, duke mbetur simbol i asaj dite. Me të luftuan edhe emra të tjerë si Naqe Gurma dhe Ibrahim Mustafai.

Këtyre rrëfimeve u shtohen edhe kujtimet e Piro Mosi, një tjetër dëshmitar okular, i cili në atë kohë ishte vetëm 11 vjeç. Ai kujton se ditët para pushtimit kishin një atmosferë të fortë patriotike. Në radio transmetoheshin vazhdimisht këngë patriotike, ndërsa më 5 prill, me rastin e lindjes së Princ Lekës, qyteti u mbush me aktivitete dhe manifestime.

Babai i tij, drejtor i postës në Sarandë, kishte mbledhur qytetarët dhe kishte recituar vargjet e njohura “O moj Shqypni”, ndërsa në qytet dhe në shkollë mbaheshin fjalime me tone patriotike që, sipas Mosit, përgatitën shpirtërisht popullsinë për atë që do të ndodhte.

Mosi kujton qartë mëngjesin e 7 prillit, kur nga dritarja e shtëpisë së tij, përballë detit, pa anijet italiane që hynin në gjirin e Sarandës. Ai thotë se i numëruan dhe ishin plot 37 anije, një pamje që paralajmëronte pushtimin e pashmangshëm.

Një detaj tjetër i rëndësishëm nga rrëfimi i tij lidhet me përpjekjen e autoriteteve shqiptare për të ndaluar zbarkimin. Kapiteni i portit, Gjon Nikë Vuksani, u kërkoi italianëve procedurat e zakonshme, por ata refuzuan dhe deklaruan se do të zbarkonin me forcë. Në këtë moment, Vuksani së bashku me vëllain e tij hapën zjarr, duke shënuar aktin e parë të rezistencës së armatosur në Sarandë.

Luftimet vijuan në pika të ndryshme të qytetit. Një xhandar pranë bankës italiane përdori një mitraloz të lehtë dhe, sipas kujtimeve, shkaktoi humbje të konsiderueshme në radhët e italianëve. Ndërkohë, në zona të tjera luftuan edhe oficerë si Nazif Babani dhe Ndrec Lufi. Në këto përplasje u vra edhe ushtari Gani nga Elbasani, ndërsa Mitro Dhimërtika u plagos rëndë në bark dhe, megjithëse u operua, nuk arriti të mbijetojë.

Pas rezistencës, trupat italiane zbarkuan plotësisht dhe nisën të shtrijnë kontrollin në qytet. Tanket u drejtuan edhe në brendësi, ndërsa në Sarandë mbetën gjurmët e përgjakshme të përplasjes. Sipas Mosit, punëtorët e portit u detyruan të pastronin gjakun në rrugë dhe në mol, një pamje që dëshmonte qartë se pushtimi kishte ardhur me dhunë.

Moli u mbush me ushtarë, armatime dhe materiale të shumta, ndërsa me kalimin e orëve banorët nisën të kthehen në shtëpitë e tyre. Saranda, njësoj si qytetet e tjera bregdetare, ra nën kontrollin e plotë të pushtuesve.

Rrëfimi i tij sjell edhe një pasqyrë të mëvonshme tragjike për shumë nga ata që rezistuan. Disa prej tyre, si Gjon Nika, përfunduan në burgjet e regjimit komunist, ndërsa të tjerë u vranë apo u pushkatuan në vitet që pasuan, duke treguar se sakrifica e tyre nuk mori gjithmonë vlerësimin e merituar.

Pushtimi i Sarandës ishte pjesë e një operacioni të gjerë që përfshiu gjithë Shqipërinë. Megjithatë, qëndresa e vogël, por domethënëse e banorëve të saj, mbeti një nga episodet më të forta të asaj dite.

7 prilli 1939 mbetet një kujtesë historike për humbjen e lirisë, por edhe për guximin e atyre që, edhe përballë një force shumë më të madhe, zgjodhën të mos dorëzohen. Për Sarandën, kjo ditë nuk është vetëm histori, por pjesë e identitetit dhe e kujtesës së saj kolektive. Saranda Web

The post Pushtimi italian i Sarandës, 7 prill 1939 – VIDEO appeared first on Saranda News.

Në një moment kur çmimi i naftës ka kaluar mbi 220 lekë për litër dhe mbetet një nga kostot më të rënda për bujqësinë, qeveria ka vendosur të heqë mbështetjen me karburant për fermerët. Skema, e cila ishte në fuqi prej vitit 2021 dhe konsiderohej një ndihmë direkte për sektorin, nuk është më pjesë e Skemës Kombëtare të Bujqësisë për vitin 2026.

Kjo ndërhyrje prek drejtpërdrejt mijëra fermerë në të gjithë vendin, përfshirë edhe zonat bujqësore në jug. Në Konispol, fermerët e mandarinave përballen çdo sezon me kosto të larta për mirëmbajtjen dhe transportin e prodhimit, ndërsa në Fushat e Vurgut, bujqit janë të varur nga përdorimi i makinerive bujqësore për mbjelljen e misrit. Po ashtu, fermerët që merren me pemët frutore dhe vreshtat kanë nevojë për ndërhyrje të shpeshta gjatë gjithë vitit, çka e bën naftën një element jetik për aktivitetin e tyre.

Vetëm gjatë vitit të kaluar, rreth 50 mijë fermerë përfituan nga skema e naftës, duke e kthyer atë në një nga mbështetjet më konkrete për uljen e kostove. Për shumë prej tyre, kjo ishte ndihma kryesore që u mundësonte të vijonin punën në tokë.

Sipas autoriteteve, ndryshimi lidhet me kalimin drejt një modeli të ri mbështetjeje, më të gjerë dhe të përafruar me praktikat europiane. Në vend të naftës pa taksa, fermerët pritet të përfitojnë nga subvencione financiare dhe forma të tjera mbështetjeje.

Megjithatë, në terren ka skepticizëm. Fermerët shprehen se asnjë skemë tjetër nuk e zëvendëson drejtpërdrejt ndikimin që kishte ulja e kostos së naftës, e cila përdoret në çdo fazë të ciklit bujqësor, nga përgatitja e tokës deri tek korrja.

Skema e re parashikon mbështetje më të gjerë në blegtori, investime dhe praktika të reja bujqësore, si dhe lehtësim të kritereve për përfitim. Fondi total është rritur krahasuar me një vit më parë, por mbetet për t’u parë nëse këto masa do të arrijnë të kompensojnë mungesën e një ndihme direkte si ajo e naftës.

Heqja e kësaj skeme vjen në një moment të ndjeshëm për bujqësinë shqiptare, ku rritja e kostove po vë në vështirësi prodhuesit dhe rrezikon të ndikojë edhe në çmimet për konsumatorët. Saranda Web

The post Në kulmin e krizës dhe sezonin e mbjelljeve fermerët mbeten pa mbështetje me naftë appeared first on Saranda News.

Brenda këtij muaji, për herë të parë që nga inaugurimi i tij në maj të vitit 2025, kalimi te Tuneli i Llogarasë do të jetë me pagesë për të gjitha kategoritë e automjeteve.

Tarifa për autoveturat pritet të arrijë në 250 lekë për një kalim, ose rreth 500 lekë vajtje-ardhje, duke e çuar koston afërsisht në 1 euro për kilometër në këtë segment prej 5.9 kilometrash.

Në terren, autoritetet po kryejnë testimet e fundit të sistemeve elektronike që do të mundësojnë tarifimin. Kamerat e sigurisë, pajisjet e kontrollit elektronik dhe infrastruktura mbështetëse po verifikohen për të garantuar funksionimin pa probleme të sistemit sapo të nisë zyrtarisht pagesa.

Struktura e tarifave është e diferencuar sipas kategorive të mjeteve. Motoçikletat do të paguajnë rreth 100 lekë, ndërsa automjetet e tonazhit të rëndë do të arrijnë deri në 5000 lekë për kalim. Për mjetet me karroceri tarifa do të jetë 500 lekë, ndërsa për furgonët dhe autobusët ajo shkon në 1000 lekë. Në të njëjtën kohë, pritet që qeveria të përcaktojë edhe skemat e parapagimit përmes kartave të posaçme, të cilat mund të përfshijnë lehtësira për banorët rezidentë të zonës.

Nga pagesa do të përjashtohen mjetet e shërbimeve emergjente, përfshirë policinë, zjarrfikëset, ambulancat, ushtrinë, si dhe personat me aftësi të kufizuara.

Menaxhimi i këtij sistemi do të realizohet nga Enti Kombëtar i Operimit Rrugor, një shoqëri aksionere me kapital shtetëror, e cila do të administrojë të ardhurat dhe funksionimin e plotë të tarifimit.

Në të njëjtën kohë, hyrja në fuqi e tarifës në Tuneli i Llogarasë pritet të ketë ndikim të drejtpërdrejtë edhe në fluksin turistik drejt jugut të vendit, si Saranda, Lukova, Borshi dhe Himara. Ky segment rrugor është një nga arteriet kryesore që lidh rivierën shqiptare me pjesën tjetër të vendit, duke lehtësuar ndjeshëm aksesin gjatë sezonit veror.

Megjithëse tarifa shtesë për kalimin te Tuneli i Llogarasë mund të perceptohet si një kosto ekstra për pushuesit, përmirësimi i infrastrukturës dhe shkurtimi i kohës së udhëtimit pritet të ndikojnë pozitivisht në zhvillimin e turizmit, duke e bërë më të lehtë dhe më të shpejtë arritjen në destinacionet bregdetare më të frekuentuara të jugut.

Ndërkohë, projekti mbetet në fokus edhe për zhvillimet ligjore. SPAK ka marrë të pandehur ish-zv.kryeministren Belinda Balluku, si dhe ish-drejtues të sektorit rrugor, për shkelje të barazisë në tenderin e ndërtimit me vlerë rreth 190 milionë euro. Saranda Web 

The post Tuneli i Llogarasë teston traun, bëhet me pagesë brenda muajit appeared first on Saranda News.

Një ngjarje shqetësuese ka ndodhur mbrëmjen e djeshme në shëtitoren e Sarandës, ku një vajzë e mitur është sulmuar nga një tufë qensh endacakë, duke shkaktuar panik dhe traumë të fortë tek fëmija dhe familjarët e saj.

Ngjarja është bërë publike në grupin e komunitetit Saranda Web për Qytetarët, ku menjëherë kanë shpërthyer reagime të shumta nga banorët, të cilët kërkojnë ndërhyrje urgjente nga institucionet.

Sipas dëshmive të qytetarëve, incidenti ka ndodhur në zonën e shëtitores pranë shkallëve afër rërës, një zonë e frekuentuar nga familjarë dhe pushues. Një prind i shqetësuar rrëfen: “Pesë qen iu sulën vajzës time dhe e traumatizuan. Nuk po e qetësoj dot. Pashë tmerr me sytë e mi. Çdo nënë do ta ndiente këtë dhimbje në palcë. Ju lutem institucioneve të marrin masa para ndonjë fatkeqësie.”

Një tjetër qytetar dëshmon se rreth orës 20:00 dy qen iu sulën një vajze të vogël, rreth 4 vjeç, duke krijuar një situatë alarmante. “Disa burra ndërhynë duke i larguar qentë, ndërsa fëmija filloi të qante me të madhe. Ishte një skenë e rëndë që vështirë të harrohet,” shprehet ai.

Reagimet e qytetarëve tregojnë se ky nuk është një rast i izoluar. Sipas tyre, raste të ngjashme janë shënuar edhe ditët e fundit në zona të tjera të qytetit, përfshirë rrugën e portit dhe zonën pranë një lokali buzë detit, ku qentë kanë krijuar panik mes familjarëve dhe fëmijëve. “Kemi frikë të dalim për shëtitje me fëmijët. Situata është serioze dhe kërkon masa urgjente,” shprehet një tjetër qytetar.

Shumë prej komentuesve theksojnë se, ndonëse janë dashamirës të kafshëve, siguria e njerëzve duhet të jetë prioritet. Ata kërkojnë që bashkia të ndërhyjë për menaxhimin dhe strehimin e qenve endacakë në qendra të posaçme, veçanërisht në prag të sezonit turistik, kur qyteti pret mijëra vizitorë.

Nëna e vajzës së sulmuar ka reaguar gjithashtu, duke falenderuar publikisht qytetarët që ndërhynë për të shpëtuar fëmijën: “Nga tmerri që përjetova nuk munda as të falenderoj në moment. Jam shumë mirënjohëse për këdo që u hodh dhe shpëtoi vajzën time, e cila ende nuk është qetësuar.”

Ndërkohë, qytetarët kërkojnë që autoritetet lokale të marrin masa konkrete dhe të menjëhershme për të shmangur përsëritjen e ngjarjeve të tilla, duke theksuar se prania e qenve agresivë në zona të populluara përbën rrezik të drejtpërdrejtë për jetën dhe sigurinë e banorëve dhe vizitorëve.

Saranda, një nga destinacionet kryesore turistike në jug të vendit, përballet prej kohësh me problematikën e qenve endacakë, por ngjarje të tilla rikthejnë në vëmendje urgjencën e zgjidhjes së këtij fenomeni përpara se të ndodhë ndonjë tragjedi. Saranda Web

The post Sarandë: Vajza e mitur sulmohet nga qentë endacakë në shëtitore, qytetarët kërkojnë masa urgjente appeared first on Saranda News.

Butrinti i Sarandës ka arritur një fitore shumë të rëndësishme në transfertë ndaj Shkumbinit në Peqin, duke triumfuar me rezultatin e pastër 0-2 dhe duke u ngjitur në vendin e parë në Kategorinë e Dytë, Grupi B.

Sfida e zhvilluar në stadiumin “Shkumbini” nisi e ekuilibruar, me të dyja skuadrat që Pjesën e Parë treguan kujdes në fazën mbrojtëse gjatë pjesës së parë, e cila u mbyll pa gola, 0-0. Megjithatë, në startin e Pjesës së Dytë, ishte Butrinti që goditi menjëherë, teksa Avduli zhbllokoi rezultatin në minutën e 47-të, duke i dhënë avantazhin skuadrës nga Saranda.

Pas golit të parë, Butrinti administroi mirë lojën dhe kërkoi të godiste sërish në kundërsulm, ndërsa vendasit tentuan të reagojnë. Goditja përfundimtare erdhi në minutën e 82-të, kur Mario Mërkuri vulosi fitoren me golin e dytë, duke i dhënë qetësi ekipit të tij në minutat e fundit.

Situata u rëndua edhe më shumë për vendasit në minutën e 84-t, kur Sula u ndëshkua me karton të kuq, duke lënë Shkumbinin me 10 lojtarë. Në këto kushte, administrimi i rezultatit për Butrintin u bë edhe më i lehtë deri në vërshëllimën përfundimtare.

Me këtë fitore, Butrinti konfirmon formën shumë të mirë dhe merr kryesimin e renditjes, duke dhënë një sinjal të fortë për vazhdimin e kampionatit.

Ndeshja është transmetuar drejtpërdrejt nga Saranda Web, duke sjellë për ndjekësit emocionet e këtij suksesi të rëndësishëm për ekipin sarandiot.

The post Butrinti kthehet nga Peqini me fitore dhe merr kreun e renditjes – VIDEO appeared first on Saranda News.

Shkumbini – Butrinti ndeshje kyçe për renditjen, Oriku pushim dhe hapet rruga për vendin e parë

Në një javë që mund të përcaktojë fatin e sezonit, skuadra e Butrinti zbret në fushë këtë të diel për një nga sfidat më të rëndësishme të kampionatit në Kategorinë e Dytë, Grupi B. Përballë do të jetë Shkumbini, në transfertë, në stadiumin “Shkumbini”, në orën 14:00.

Situata në renditje e bën këtë ndeshje edhe më të rëndësishme. Butrinti ndodhet në vendin e dytë me 38 pikë, vetëm dy pikë larg kryesuesve të Oriku, i cili këtë javë është pushim. Kjo i jep skuadrës sarandiote një mundësi të artë për të marrë kreun, nëse arrin të marrë tre pikët ndaj Shkumbinit.

Ndërkohë, java ofron edhe përballje të tjera interesante që mund të ndikojnë drejtpërdrejt në renditje. Delvina pret Kelcyr, ndërsa Maliqi përballet me Eagle Football. Në një tjetër duel, Devolli sfidon Tomori, ndërsa në orën 15:00 luhet përballja mes Partizani B dhe Bylis B.

Një fitore e Butrintit këtë të diel do të ishte një hap gjigant drejt objektivit madhor dhe një sinjal i fortë për rivalët.

Për tifozët dhe ndjekësit, ndeshja do të transmetohet drejtpërdrejt në Saranda Web, duke sjellë çdo emocion nga fusha e lojës.

The post Butrinti përballje vendimtare ndaj Shkumbinit në Peqin, shans për t’u ngjitur në krye të Kategorisë appeared first on Saranda News.

Një 77-vjeçar është ndaluar nga Policia e Sarandës, pasi dyshohet se ka përndjekur dhe ngacmuar sek,sualisht një vajzë të mitur në qytet.

Sipas njoftimit zyrtar, specialistët e Seksionit për Hetimin e Krimeve në Komisariatin e Policisë Sarandë kanë bërë ndalimin e shtetasit V. Q., 77 vjeç, banues në Sarandë.

Nga hetimet paraprake dyshohet se i moshuari ka përndjekur dhe ngacmuar sek,sualisht një vajzë të mitur, ndërsa kjo e fundit, gjatë intervistimit në prani të psikologut, ka deklaruar se ngjarja ka ndodhur teksa ajo po lëvizte në këmbë në rrugën “Flamuri”.

Materialet procedurale janë referuar në organet kompetente për vijimin e veprimeve të mëtejshme, ndërsa hetimet për zbardhjen e plotë të rastit vijojnë.

The post 77-vjeçari ndalohet nga Policia, u denoncua nga një e mitur për përndjekje dhe ngacmim sek,sual appeared first on Saranda News.

Një 19-vjeçar është gjetur pa shenja jete në një banesë të braktisur në fshatin Nivicë, në territorin e Bashkisë Himarë.

Sipas njoftimit zyrtar të Policisë, specialistët e Seksionit për Hetimin e Krimeve në Komisariatin e Policisë Himarë kanë kryer veprimet e para hetimore pasi, në orët e para të mëngjesit të datës 4 prill 2026, shërbimet e urgjencës mjekësore në Sarandë kanë njoftuar për trupin e pajetë.

Viktima është identifikuar si shtetasi H. O., 19 vjeç, banues në Menia, Egjipt. Nga këqyrja paraprake e trupit nuk janë konstatuar shenja dhune, ndërsa dyshohet se i riu mund të ketë ndërruar jetë për shkaqe natyrore.

Trupi i 19-vjeçarit është transportuar në morgun pranë Institutit të Mjekësisë Ligjore në Tiranë, ku do t’i nënshtrohet autopsisë për përcaktimin e shkakut të saktë të vdekjes.

Materialet procedurale janë referuar në prokuroritë kompetente për veprime të mëtejshme, ndërsa hetimet vijojnë për zbardhjen e plotë të rrethanave të kësaj ngjarjeje.

The post 19-vjeçari gjendet pa jetë pranë një banese të braktisur appeared first on Saranda News.

Nga brigjet e Sarandës deri në skenën urbane të Athinë, një emër i ri po tërheq vëmendje në muzikën shqiptare hip-hop. Bena G, emri artistik i Bernaldo Muka, po shfaqet si një nga artistët në zhvillim që po ndërton gradualisht identitetin e tij në një treg gjithnjë e më konkurrues.

I lindur më 16 mars 1996 në Sarandë, Bena G u rrit në një qytet me energji turistike dhe ndikime të ndryshme kulturore. Edhe pse përfundoi studimet e larta në ekonomi-biznes, rruga e tij mori një kthesë të natyrshme drejt muzikës, një pasion që e shoqëroi që në adoleshencë. Frymëzuar nga kultura hip-hop, ai nisi të eksperimentojë me tekste dhe freestyle, duke ndërtuar bazat e para të stilit të tij artistik.

Fillimet e tij nuk erdhën në studio profesionale, por në rrethe shoqërore, ku improvizimi dhe krijimtaria spontane e ndihmuan të zhvillojë aftësitë si reper. Me kalimin e kohës, ky pasion u kthye në një angazhim më serioz, duke punuar vazhdimisht për të rafinuar stilin dhe për të krijuar një identitet të dallueshëm në zhanret rap dhe hip-hop.

Një moment kyç në karrierën e tij ishte zhvendosja në Athinë, ku ai e intensifikoi angazhimin në muzikë. Në kryeqytetin grek, Bena G nisi të regjistrojë projekte më profesionale dhe të bashkëpunojë me grupin “La Zone”, duke kaluar nga një fazë eksperimentale në një qasje më të strukturuar dhe ambicioze artistike.

Sot, aktiviteti i tij muzikor është i fokusuar kryesisht në platformat digjitale si YouTube dhe Spotify, ku ai publikon projektet e tij dhe po ndërton një audiencë në rritje. Këto platforma janë kthyer në një trampolinë të rëndësishme për artistët e rinj, duke i dhënë mundësinë të depërtojnë në treg pa barriera tradicionale.

Ndër projektet më të spikatura të tij është kënga “Star”, e cila ka arritur mijëra dëgjime dhe klikime, duke shënuar një hap të rëndësishëm në konsolidimin e tij si artist. Ky publikim tregon jo vetëm evoluimin e tij muzikor, por edhe potencialin për të depërtuar më gjerë në skenën shqiptare dhe ndërkombëtare.

Me një stil që ndërthur ritme moderne dhe tekste të drejtpërdrejta, Bena G po synon të krijojë një profil unik artistik. Në një industri ku konkurrenca është e fortë dhe diferencimi është thelbësor, ai mbetet i fokusuar në prodhimin e projekteve cilësore dhe në ndërtimin e një lidhjeje autentike me publikun.

Rrugëtimi i tij është ende në zhvillim, por kombinimi i përkushtimit, eksperiencës mes dy tregjeve muzikore dhe prania aktive online e vendosin Bena G si një emër për t’u ndjekur në të ardhmen e muzikës urbane shqiptare. Saranda Web

The post Bena G – Reperi nga Saranda që po ndërton karrierë mes Shqipërisë dhe Athinës appeared first on Saranda News.