Kryeministri Edi Rama ka reaguar ndaj debateve dhe protestave që kanë nisur pas publikimit të propozimit për reformën e re administrativo-territoriale, duke bërë të qartë se ndarja përfundimtare e bashkive nuk është vendosur ende dhe se procesi ndodhet në fazën e konsultimit.

Përmes një reagimi në rrjetet sociale, Rama tha se dokumenti i propozuar do t’i nënshtrohet një konsultimi publik 60-ditor, gjatë të cilit qytetarët, pushteti vendor dhe grupet e interesit mund të shprehin qëndrimet e tyre.

Kryeministri e cilësoi normale edhe shfaqjen e kundërshtive brenda Partisë Socialiste, por kritikoi ashpër rastet kur është kaluar në djegien e teserave të PS-së.

“Përjashto aktin e turpshëm të djegies së teserave të PS në një rast, nga disa individë që as vetë s’kanë ditur tamam ç’kanë bërë”, shkruan Rama.

Sipas tij, protestat dhe kundërshtimet ndaj propozimit janë të mirëpritura për sa kohë zhvillohen në mënyrë paqësore dhe nuk pengojnë qytetarët apo cenojnë rendin publik.

Rama: Bashkitë mund të kërkojnë ndryshime

Një nga pikat më të rëndësishme të reagimit të kryeministrit lidhet me faktin se harta e propozuar aktualisht nuk duhet konsideruar si vendim përfundimtar.

Rama theksoi se kryetarët e bashkive dhe këshillat bashkiakë, sipas ligjit, duhet të paraqesin me shkrim qëndrimet e tyre. Ai la të hapur gjithashtu mundësinë që gjatë konsultimeve të paraqiten kërkesa për ndryshime në konfigurimin e bashkive.

“Deri atëherë të gjithë do të dëgjohen, përfshirë edhe bashkitë që mund të duan të integrojnë tek vetja bashki më të vogla që në propozimin aktual mbeten siç janë”, shprehet Rama.

Kjo deklaratë tregon se diskutimi për bashkitë që do të mbeten më vete apo që mund të integrohen me bashki të tjera vazhdon, ndërsa propozimi aktual mund të pësojë ndryshime gjatë procesit të konsultimit.

Rama: Vendimin përfundimtar do ta marrë Kuvendi

Rama hodhi poshtë gjithashtu pretendimet se kundërshtimet ndaj reformës po shihen si problem nga mazhoranca.

“As në Shqipëri nuk ka regjim, as në PS nuk ka dhe nuk do të ketë asnjë vendim për të shkurajuar askënd që të shprehë opinionin e vet për këtë reformë”, deklaroi kryeministri.

Sipas tij, gjatë 60 ditëve të konsultimit do të jepen më shumë argumente dhe informacion mbi kriteret që janë përdorur për hartimin e propozimit të ri administrativo-territorial.

Rama theksoi se në përcaktimin e hartës janë marrë në konsideratë argumente administrative dhe logjike dhe jo elementë historikë apo simbolikë të zonave. Në përfundim të konsultimeve dhe shqyrtimit të qëndrimeve që do të paraqiten nga bashkitë, këshillat bashkiakë dhe aktorët e tjerë, fjalën e fundit për reformën dhe hartën e re administrativo-territoriale do ta ketë Kuvendi. Saranda Web

The post Rama: Turp që djegin teserat e PS! Për ndarjen e bashkive jemi ende në diskutime appeared first on Saranda News.

Në mbledhje nuk ishte paraqitur asnjë prej këshilltarëve të grupit të Partisë Demokratike, ndërsa për shkak të numrit të pamjaftueshëm të anëtarëve të pranishëm, mbledhja u shty për një datë tjetër.

Pika e parë e rendit të ditës parashikonte informacion nga Shoqëria Rajonale Ujësjellës Kanalizime Sarandë mbi situatën e furnizimit me ujë, problematikat aktuale dhe masat e ndërmarra për garantimin e furnizimit të rregullt të qytetarëve.

Ndërkohë, jashtë sallës ishin mbledhur banorë të zonës së Qafë Gjashtës, të cilët shprehen se prej rreth tre muajsh përballen me mungesën e furnizimit me ujë.

Banorët reaguan me pakënaqësi pas shtyrjes së mbledhjes, duke e konsideruar mungesën e këshilltarëve dhe moszhvillimin e saj si një tjetër tallje me shqetësimin e tyre, për të cilin prisnin përgjigje dhe zgjidhje. Saranda Web

The post Banorët prisnin përgjigje për ujin, dështon mbledhja e Këshillit Bashkiak Sarandë – VIDEO appeared first on Saranda News.

Deputeti Ardit Bido ka fshirë nga faqja e tij në Facebook videon ku njoftonte firmosjen e propozimit për Reformën Administrativo-Territoriale 2.0 dhe deklaronte se Delvina dhe Konispoli do të vazhdonin të mbeteshin bashki më vete.

Videoja, e publikuar pas firmosjes së propozimit nga deputetët e mazhorancës, anëtarë të Komisionit të Posaçëm Parlamentar për Reformën Administrativo-Territoriale, nuk rezulton më në faqen e tij. Ende nuk dihen arsyet e fshirjes dhe deri më tani Bido nuk ka dhënë një shpjegim publik për këtë veprim.

Në reagimin e tij, deputeti deklaronte se Saranda, Delvina, Konispoli, Himara dhe Finiqi do të mbeteshin bashki më vete. Por postimi solli edhe kundërshti të shumta në rrjetet sociale, jo vetëm për argumentet e përdorura për ruajtjen e këtyre bashkive, por edhe për mënyrën se si Bido argumentonte bashkimin e Selenicës me Vlorën.

“Lumi i Vlorës i takon Vlorës. Prandaj, me kërkesën e banorëve, Selenica do të bashkohet me Vlorën”, deklaronte Bido në postimin që shoqëronte videon.

Ky argument u bë pjesë e debatit dhe reagimeve në rrjetet sociale.

Nëse fshirja e videos lidhet me këto kundërshti, me argumentet për bashkimin e Selenicës me Vlorën apo me një arsye tjetër, mbetet ende e paqartë.

Propozimi për Reformën Administrativo-Territoriale 2.0 parashikon uljen e numrit të bashkive nga 61 në 46. Delvina dhe Konispoli nuk janë përfshirë mes bashkive që propozohet të shkrihen, ndërsa Selenica, sipas propozimit të depozituar, parashikohet t’i bashkohet Vlorës. Saranda Web

The post Firmosi “pavarësinë” e Delvinës dhe Konispolit, Ardit Bido fshin videon nga Facebook appeared first on Saranda News.

Deputetët e mazhorancës, anëtarë të Komisionit të Posaçëm Parlamentar për Reformën Administrativo-Territoriale, kanë depozituar sot në Kuvend propozimin për Reformën Administrativo-Territoriale 2.0, e cila parashikon një riorganizim të ndjeshëm të pushtetit vendor në Shqipëri. Propozimi u është përcjellë gjithashtu kryetarëve të bashkive dhe këshillave bashkiakë.

Sipas modelit të propozuar, numri i bashkive do të ulet nga 61 në 46. Në praktikë, 28 bashki do të konsolidohen në 13 bashki të reja, ndërsa struktura e ardhshme territoriale parashikohet të përbëhet nga 46 bashki, 71 qytete përbërëse dhe 387 njësi administrative.

Delvina dhe Konispoli mbeten bashki

Për jugun e vendit, një nga çështjet me interes të drejtpërdrejtë është e ardhmja e Delvinës dhe Konispolit.

Në listën e propozuar të bashkive që shkrihen nuk përfshihen as Bashkia Delvinë dhe as Bashkia Konispol. Kjo do të thotë se, sipas propozimit të depozituar, të dyja ruajnë statusin e tyre si bashki më vete.

Edhe Bashkia Sarandë dhe Bashkia Finiq nuk rezultojnë në listën e njësive që propozohet të cënohen.

Krijohet niveli i ri “Qyteti”

Një prej ndryshimeve kryesore të reformës është krijimi i një niveli të ri të organizimit vendor, të quajtur “Qyteti”.

Skema aktuale:

Bashki – Njësi Administrative

propozohet të zëvendësohet me:

Bashki – Qytet – Njësi Administrative

Bashkia do të mbetet njësia e vetme e vetëqeverisjes vendore, me një kryetar, një këshill bashkiak, një administratë dhe një buxhet të vetëm.

Ndërkohë, “Qyteti” do të ketë rol në përfaqësim, planifikim dhe organizimin e shërbimeve, si dhe një nënkryetar përgjegjës për koordinimin administrativ.

Cilat bashki propozohet të shkrihen?

Sipas propozimit të depozituar, ndryshimet përfshijnë:

• Dimal dhe Poliçan i bashkohen Beratit;
• Klosi i bashkohet Matit;
• Cërriku dhe Belshi i bashkohen Elbasanit;
• Prrenjasi i bashkohet Librazhdit;
• Patosi i bashkohet Fierit;
• Divjaka i bashkohet Lushnjës;
• Libohova i bashkohet Gjirokastrës;
• Memaliaj i bashkohet Tepelenës;
• Këlcyra i bashkohet Përmetit;
• Maliqi i bashkohet Korçës;
• Rinasi i bashkohet Tiranës, ndërsa Bashkia Vorë mbetet;
• Selenica i bashkohet Vlorës;
• Fushë-Arrëzi i bashkohet Pukës.

Nëse propozimi miratohet në këtë formë, harta administrative e Shqipërisë do të kalojë nga 61 në 46 bashki.

Për zonën e jugut, propozimi sjell një përgjigje të rëndësishme pas diskutimeve të muajve të fundit: Delvina dhe Konispoli nuk janë mes bashkive që parashikohet të shkrihen dhe, sipas variantit të depozituar, vazhdojnë të ekzistojnë si bashki më vete. Saranda Web

The post Reforma territoriale depozitohet në Kuvend: 15 bashki shkrihen, çfarë parashikohet për Delvinën dhe Konispolin? appeared first on Saranda News.

Në një kohë kur në Shqipëri është rikthyer debati për reformën territoriale dhe mundësinë e reduktimit të numrit të bashkive, një projekt-raport i Këshillit të Europës sugjeron një tjetër drejtim: më shumë kompetenca dhe financim për pushtetin vendor, në vend të centralizimit të mëtejshëm.

Sipas një shkrimi të publikuar nga Reporter.al, raporti paraprak për zbatimin e Kartës Evropiane të Vetëqeverisjes Vendore vlerëson se problemet e bashkive shqiptare nuk lidhen vetëm me madhësinë apo numrin e tyre, por edhe me autonominë e kufizuar, mungesën e financimit dhe kapacitetet e pamjaftueshme administrative.

Ky konstatim merr rëndësi të veçantë edhe për jugun e vendit, ku debati për reformën e re territoriale ka ngritur pikëpyetje mbi të ardhmen e bashkive më të vogla, përfshirë Delvinën dhe Konispolin.

Ndërsa një nga alternativat e diskutuara për reformën është bashkimi i mëtejshëm i njësive vendore për të rritur efikasitetin, projekt-raporti i Këshillit të Europës paralajmëron se një proces i tillë nuk zgjidh automatikisht problemet.

Raportuesit Anders Knape dhe Sören Schumacher vlerësojnë se përgjigjja ndaj kapaciteteve të dobëta të bashkive nuk duhet të jetë marrja e mëtejshme e kompetencave nga pushteti vendor, por forcimi i tij financiar dhe administrativ.

Sipas dokumentit, me përjashtim të qyteteve më të mëdha, pushteti vendor në Shqipëri është seriozisht i nënfinancuar. Shumë bashki nuk kanë burimet dhe personelin e nevojshëm për të ushtruar funksionet që u ngarkon ligji dhe mbeten të varura nga financimi i qeverisë qendrore.

Raporti kërkon gjithashtu rishikimin e sistemit të granteve të pakushtëzuara, me synim që fondet për bashkitë të shpërndahen në mënyrë më të drejtë, transparente dhe mbi kritere objektive.

Për një reformë të re territoriale, Këshilli i Europës sugjeron që përpara ndryshimit të hartës administrative të bëhet një vlerësim i kujdesshëm i rezultateve të reformës së vitit 2014 dhe të zhvillohet konsultim real me pushtetin vendor dhe komunitetet që preken.

Në këtë këndvështrim, debati për bashki si Delvina dhe Konispoli nuk lidhet vetëm me pyetjen nëse duhet të vazhdojnë të ekzistojnë si njësi më vete, por edhe me një çështje më të gjerë: a janë problemet e bashkive të vogla pasojë e madhësisë së tyre, apo e mungesës së kompetencave, financimit dhe kapaciteteve?

Projekt-raporti i Këshillit të Europës anon drejt argumentit se pushteti vendor duhet të fuqizohet dhe se centralizimi i mëtejshëm nuk është përgjigjja ndaj dobësive aktuale.

Dokumenti pritet të shqyrtohet në tetor nga Kongresi i Autoriteteve Lokale dhe Rajonale të Këshillit të Europës, ndërsa rekomandimet e tij pritet të kenë rëndësi edhe për debatin mbi reformën e ardhshme territoriale në Shqipëri. Saranda Web

The post KiE kundër centralizimit të pushtetit lokal: Bashkitë duhen fuqizuar, jo dobësuar appeared first on Saranda News.

Sipas rregullave të bëra publike, nga ora 20:00 deri në 24:00, niveli maksimal i lejuar i zhurmës në mjediset publike do të jetë 45 decibel, ndërsa nga ora 11:00 deri në 20:00 kufiri do të jetë 65 decibel. Pas mesnatës, muzika duhet të ndalojë.

Lamallari e bëri njoftimin gjatë një vizite në Lezhë, duke theksuar se udhëzimi është hartuar së bashku me Ministrinë e Mjedisit dhe Ministrinë e Shëndetësisë dhe synon garantimin e qetësisë për pushuesit në zonat turistike të vendit.

Zbatimi i rregullave do të monitorohet nga Policia e Shtetit dhe Policia Bashkiake, të cilat, sipas ministrit, do të marrin masa ndaj rasteve kur tejkalohen nivelet e përcaktuara të zhurmës.

“Ne duam që pushuesit të gjejnë qetësi, si gjatë frekuentimit të lokaleve, ashtu edhe në ambientet e tjera. Çdokush që vjen me familjen për të pushuar në Shëngjin apo në zonat e tjera turistike të vendit duhet të ketë mundësi të pushojë pa u shqetësuar nga zhurmat”, deklaroi Lamallari.

Ministri tha gjithashtu se udhëzimi është hartuar duke u mbështetur në standardet e Organizatës Botërore të Shëndetësisë për nivelet e lejuara të zhurmës.

Rregullat prekin drejtpërdrejt edhe zonat turistike të jugut, ku gjatë sezonit veror aktiviteti i bareve, restoranteve dhe lokaleve të argëtimit është veçanërisht intensiv. Saranda Web

The post Lamallari: Nuk do të lejohet muzikë mbi 45 decibel nga ora 20:00 deri në 24:00 appeared first on Saranda News.

Delvina dhe Konispoli mund të jenë përpara një prej vendimeve më të rëndësishme për të ardhmen e tyre administrative. Ende nuk dihet se çfarë do të ndodhë me dy bashkitë e jugut, të cilat, sipas një drafti të Partisë Socialiste të bërë publik më herët, rrezikojnë të humbasin statusin si bashki më vete në ndarjen e re administrativo-territoriale.

Çështja bëhet edhe më urgjente pas deklaratave të kreut të Grupit Parlamentar të PS-së, Taulant Balla, i cili la të hapur mundësinë që reforma territoriale të konkretizohet brenda kësaj jave.

Sipas Ballës, Kuvendi vijon punën dhe sesioni parlamentar përfundon të premten, më 31 korrik. Ai bëri të ditur se deputetët socialistë në Komisionin e Posaçëm të Reformës Administrativo-Territoriale po punojnë ende mbi propozimet dhe se ato pritet të konkretizohen pas raportit përfundimtar.

“Ne nuk po ikim me pushime, jemi këtu”, deklaroi Balla, duke lënë të hapur mundësinë e zhvillimeve të reja brenda ditëve të ardhshme.

Deklarata vjen në një moment kur PS dhe PD kanë prishur, pas disa muajsh, dakordësinë për të prodhuar së bashku një propozim për reformën territoriale. Mazhoranca ka vendosur të vijojë procesin edhe pa konsensusin e opozitës.

Pikërisht në këtë situatë, Delvina dhe Konispoli mbeten në pritje, pasi ende nuk ka një vendim përfundimtar publik që të sqarojë nëse do të vazhdojnë të ekzistojnë si bashki më vete apo do të preken nga konfigurimi i ri territorial.

Balla nuk dha detaje mbi hartën përfundimtare dhe as mbi propozimin për ndarjen në rajone, duke thënë se për këto çështje duhet të flasin fillimisht anëtarët e komisionit që kanë punuar me reformën.

Sipas tij, reforma nuk do të kufizohet vetëm te ndryshimi i hartës administrative, por do të përfshijë edhe propozime për mënyrën e ofrimit të shërbimeve publike, veçanërisht në zonat rurale.

Por për Delvinën dhe Konispolin pyetja kryesore mbetet ende pa përgjigje: A do të vazhdojnë të jenë bashki më vete në hartën e re territoriale?

Me mundësinë që zhvillimet të përshpejtohen brenda kësaj jave, ditët në vijim pritet të jenë vendimtare për të mësuar nëse skenari që prek dy bashkitë e jugut do të mbetet vetëm në draft, apo do të përfshihet në propozimin përfundimtar që do t’i paraqitet Kuvendit. Saranda Web

The post ALARM për Delvinën dhe Konispolin/ Reforma territoriale mund të votohet brenda javës appeared first on Saranda News.

Paralajmërimi vjen në një periudhë me rrezik të lartë për zjarre, ndërsa sot një vatër zjarri u regjistrua edhe në Gjirin e Hartës në Ksamil, ku flakët përfshinë një sipërfaqe të konsiderueshme me shkurre dhe bimësi.

Në rastet kur nga hetimet provohet se një zjarr është shkaktuar qëllimisht, autorët mund të përballen me përgjegjësi të rëndë penale, në varësi të pasojave të shkaktuara.

Sipas bilancit të paraqitur nga ministri i Mbrojtjes, Ermal Nufi, nga 1 qershori deri më 24 korrik janë regjistruar 22 vatra zjarri, ndërsa rreth 1,100 forca janë angazhuar në operacionet për shuarjen e tyre.

Situata deri tani raportohet nën kontroll, por bilanci i verës së vitit 2025 mbetet alarmues. Gjatë sezonit të kaluar u regjistruan 346 vatra zjarri, të cilat dogjën rreth 49 mijë hektarë pyje dhe kullota. Saranda Web

The post Zjarrvënia në Ksamil/ Lamallari paralajmëron: Nëse kapet do dënohet 15 vite burg appeared first on Saranda News.

Në një kohë kur temperaturat e larta kanë rritur ndjeshëm rrezikun e zjarreve në Shqipëri, tre avionët zjarrfikës që pritet t’i shtohen kapaciteteve të vendit nuk do të jenë në dispozicion gjatë kësaj vere. Kryeministri Edi Rama bëri të ditur se procedura për blerjen e tyre ka përfunduar, por avionët do të mbërrijnë në fund të vitit, pra pasi të ketë kaluar sezoni me rrezikun më të lartë nga zjarret.

Sipas Ramës, aktualisht Shqipëria ka katër helikopterë të gatshëm për ndërhyrje nga ajri, ndërsa në rast nevoje kapaciteti mund të rritet në gjashtë mjete. Për situata emergjente të zgjatura, qeveria ka parashikuar edhe mundësinë e sigurimit të avionëve shtesë nga jashtë.

Kryeministri njoftoi gjithashtu se monitorimi i territorit do të përforcohet përmes përdorimit të dronëve dhe një sistemi të ri, me synim evidentimin dhe ndjekjen më të shpejtë të vatrave të zjarrit.

Në të njëjtën kohë, Rama propozoi që efektivët e Ministrisë së Mbrojtjes të angazhuar në operacionet kundër zjarreve të përfitojnë menjëherë një pagë shtesë. Ai u bëri thirrje edhe bashkive që të aplikojnë të njëjtën masë për forcat e tyre të angazhuara në terren.

Duke iu referuar situatës së zjarreve në Francë dhe Spanjë, Rama theksoi se Shqipëria duhet të jetë e përgatitur për skenarë të rëndë gjatë sezonit të verës dhe se ajo që po ndodh në vende të tjera të Evropës duhet të shërbejë si paralajmërim.

Nga ana tjetër, ministri i Brendshëm Besfort Lamallari paralajmëroi masa të ashpra ndaj personave që shkaktojnë zjarre, duke theksuar se zjarrvënia mund të dënohet deri në 15 vite burg.

Sipas bilancit të paraqitur nga ministri i Mbrojtjes Ermal Nufi, nga 1 qershori deri më 24 korrik janë regjistruar 22 vatra zjarri, ndërsa rreth 1,100 forca janë angazhuar në operacionet për shuarjen e tyre.

Situata deri tani raportohet nën kontroll, por kujtesa e verës së vitit 2025 mbetet e rëndë: 346 vatra zjarri dogjën rreth 49 mijë hektarë pyje dhe kullota.

Ndërkohë, qeveria shqiptare ka shprehur gatishmërinë për të ofruar ndihmë edhe për Francën dhe Spanjën në përballimin e zjarreve. Saranda Web

The post Rama: Avionët do të vijnë në fund të vitit, situatën do ta përballojnë zjarrfikësit appeared first on Saranda News.

Sipas të dhënave të publikuara nga INSTAT, gjatë qershorit 2026 në Shqipëri hynë 1,346,279 shtetas të huaj, vetëm 17,075 më shumë se në të njëjtën periudhë të vitit të kaluar. Rritja rezulton rreth 1.3%, shumë më e ulët se ritmet dyshifrore të regjistruara në vitet e mëparshme. INSTAT sqaron se statistika e hyrjeve përfshin të gjitha mbërritjet nëpërmjet pikave kufitare tokësore, detare dhe ajrore.

Edhe hyrjet e shtetasve shqiptarë shënuan një rritje pothuajse të papërfillshme. Në qershor 2026 hynë në vend 735,370 shtetas shqiptarë, vetëm 1,799 më shumë se në qershorin e vitit të kaluar, ose një rritje prej rreth 0.2%.

Qeveria është përpjekur ta lidhë ngadalësimin me protestat kundër saj, duke pretenduar se pamjet e tubimeve kanë dëmtuar imazhin e Shqipërisë dhe kanë ndikuar te rezervimet. Por ky interpretim nuk mbështetet drejtpërdrejt nga statistikat e INSTAT, të cilat tregojnë numrin e hyrjeve, por jo arsyen përse një vizitor ka ardhur ose ka anuluar udhëtimin.

Sipas operatorëve turistikë, dy faktorët kryesorë që ndikuan gjatë qershorit ishin lufta në Iran, e cila krijoi pasiguri, probleme me fluturimet dhe rritje të kostove të udhëtimit, si dhe Kampionati Botëror, i zhvilluar nga 11 qershori deri më 19 korrik në SHBA, Kanada dhe Meksikë. Eventi i madh sportiv orientoi një pjesë të flukseve dhe shpenzimeve turistike drejt vendeve organizatore, ndërsa shumë udhëtarë shtynë ose ndryshuan planet e pushimeve.

Të dhënat tregojnë se ngadalësimi lidhet kryesisht me tkurrjen e tregjeve tradicionale. Nga Kosova erdhën rreth 51 mijë vizitorë më pak, ndërsa nga Maqedonia e Veriut rreth 15 mijë më pak. Rënie u shënua edhe nga Gjermania me mbi 13 mijë hyrje më pak, Turqia me rreth 11 mijë, Mali i Zi me 6.2 mijë dhe Greqia me 3.6 mijë më pak.

Këto humbje u kompensuan pjesërisht nga disa tregje evropiane. Hyrjet nga Italia u rritën me mbi 25 mijë, nga Polonia me afro 17 mijë dhe nga Mbretëria e Bashkuar me rreth 12.4 mijë persona.

Pavarësisht frenimit të qershorit, bilanci i gjashtëmujorit të parë mbetet pozitiv. Nga janari deri në qershor 2026, në Shqipëri hynë 5,059,069 shtetas të huaj, rreth 297 mijë më shumë se në të njëjtën periudhë të vitit të kaluar.

Shifrat tregojnë se turizmi shqiptar vijon të rritet, por me një ritëm shumë më të ulët. Përpjekja për t’ia faturuar këtë ngadalësim vetëm protestave duket më tepër si interpretim politik sesa analizë ekonomike, ndërsa operatorët turistikë evidentojnë faktorë ndërkombëtarë shumë më të gjerë: luftën në Iran, pasigurinë në transportin ajror, kostot më të larta dhe ndikimin e Kampionatit Botëror. Saranda Web

The post Qeveria: Deri në qershor kishim fluks të lartë, por protesta i preu hovin turizmit appeared first on Saranda News.