Kur bëhet fjalë për nevojat e qytetarëve, shpesh dëgjohet e njëjta përgjigje: “nuk ka fonde”. Por kur paratë planifikohen për komoditetin dhe funksionimin e institucioneve, shifrat marrin një tjetër përmasë. Kuvendi i Shqipërisë planifikon procedura prokurimi me vlerë rreth 265 milionë lekë, ose afërsisht 2.9 milionë euro, deri në fund të vitit. Mes tyre spikasin disa shpenzime që vështirë të kalojnë pa ngritur pikëpyetje.

Rreth 200 mijë euro janë parashikuar për karrige dhe poltrone, me një kosto të përllogaritur që mund të shkojë nga 1,000 deri në 1,300 euro për një karrige.

Ndërkohë, rreth 400 mijë euro parashikohen për bileta avioni për udhëtimet ndërkombëtare, ndërsa 250 mijë euro të tjera për karburant.

Pra, vetëm për karrige, bileta avioni dhe karburant bëhet fjalë për rreth 850 mijë euro.

Në listë qëndron edhe një tjetër shpenzim i madh: rreth 400 mijë euro për platformën “MediaHub”, e cila synon të krijojë një paketë të integruar komunikimi dhe shihet si një hap drejt televizionit të Kuvendit.

Kontrasti është i fortë. Në shumë komunitete shqiptare vazhdojnë kërkesat për ndërhyrje elementare: një rrugë, një strehë autobusi, ndriçim, mirëmbajtje të hapësirave publike apo shërbime më të mira. Për investime të tilla, qytetarët jo rrallë përballen me justifikimin e mungesës së fondeve apo duhet të presin me vite.

Ndërsa për një karrige mund të planifikohen deri në 1,300 euro, për udhëtime 400 mijë euro dhe për karburant 250 mijë euro, është legjitime të shtrohet pyetja: a janë këto prioritete në përputhje me mënyrën se si duhet të përdoren paratë publike?

Fondet publike janë para të taksapaguesve. Për këtë arsye, çdo shpenzim, qoftë për një karrige apo për një biletë avioni, duhet jo vetëm të jetë ligjërisht i rregullt, por edhe i arsyeshëm dhe i justifikueshëm përballë qytetarëve.

Sepse kur ka para për karrige mijëra euroshe, udhëtime dhe qindra mijëra euro karburant, argumenti “nuk ka fonde” për problemet e vogla të komunitetit bëhet gjithnjë e më i vështirë për t’u pranuar. Saranda Web

The post Për vete nuk kursehen: 1,300 euro një karrige deputeti, 400,000 euro për udhëtime dhe 250,000 për karburant appeared first on Saranda News.

Ngjarja ka rikthyer njëkohësisht në vëmendje shqetësimet e banorëve për gjendjen e Urës së Vanës. Sipas tyre, më herët kishin shprehur gatishmërinë që të kontribuonin vetë për rregullimin e urës, por pretendojnë se nuk janë lejuar të ndërhyjnë nga Bashkia Delvinë.

Banorët thonë se nga Bashkia u ishte komunikuar se punimet në urë duhet të kryheshin përmes procedurave të tenderimit, ndërsa në atë moment nuk kishte fonde në dispozicion për realizimin e ndërhyrjes.

Rënia e automjetit dhe bllokimi i qarkullimit kanë shtuar shqetësimin e komunitetit, i cili kërkon jo vetëm zgjidhjen e situatës së krijuar sot, por edhe një ndërhyrje përfundimtare në Urën e Vanës, për të garantuar lëvizjen dhe sigurinë e banorëve të zonës. Saranda Web

The post Automjeti bie në Urën e Vanës, bllokohet qarkullimit për 300 banorë – VIDEO appeared first on Saranda News.

Organizatorja e protestës përpara Bashkisë Sarandë, Aneta Xhiku, shprehu zhgënjimin për pjesëmarrjen e ulët të qytetarëve dhe atë që ajo e cilësoi si mungesë të reagimit qytetar për problematikat e Sarandës. Xhiku u ndal veçanërisht te vendimi i Këshillit Bashkiak për territorin e gjimnazit “Hasan Tahsini”, ku parashikohet ndërtimi i një parkingu publik. Sipas saj, vendimi është i dëmshëm dhe duhet të rishikohet.

Aneta Xhiku tha se shumë qytetarë shprehin pakënaqësitë dhe kundërshtimet e tyre në rrjetet sociale, por hezitojnë të dalin publikisht dhe t’u bashkohen protestave.

“Flasin vetëm në rrjetet sociale nga divani”, ishte kritika e Xhikut, e cila bëri thirrje për më shumë pjesëmarrje dhe angazhim qytetar në çështjet që prekin Sarandën.

Protesta e sotme ishte e dyta radhazi e zhvilluar përpara Bashkisë Sarandë, ku qytetarët ngritën shqetësime për disa problematika të qytetit, mes tyre vendimin për parkingun në territorin e gjimnazit “Hasan Tahsini”, furnizimin me ujë dhe ndotjen e detit. Saranda Web

The post Aneta Xhiku e zhgënjyer me qytetarët në Sarandë: “Flasin vetëm në rrjetet sociale nga divani” appeared first on Saranda News.

Një protestë qytetare është zhvilluar sërish ditën e sotme përpara Bashkisë Sarandë, ku pjesëmarrësit kanë ngritur disa prej problematikave që, sipas tyre, po shqetësojnë qytetin. Edhe këtë herë, pjesëmarrja në protestë ka qenë e ulët.

Protestës i është bashkuar edhe aktivistja nga Delvina, Etleva Merko, e cila merr pjesë gjithashtu në protestat që zhvillohen prej rreth dy muajsh e gjysmë në Tiranë. Merko tha se këto ditë ndodhet në Sarandë dhe vendosi të mbështesë protestën, duke veçuar tri problematika që, sipas saj, ka konstatuar gjatë qëndrimit në qytet: ndërprerjet e energjisë elektrike, mungesën e ujit dhe mungesën e vendparkimeve publike.

Organizatorja e protestës, Anita Xhiku, shprehu keqardhjen për pjesëmarrjen e ulët dhe atë që e cilësoi si mungesë të ndjeshmërisë qytetare. Sipas saj, pavarësisht problematikave me të cilat përballen, shumë qytetarë ende hezitojnë të dalin publikisht dhe të protestojnë.

Në protestë mori pjesë edhe mësuesja në pension Shkëndije Sakaj, e cila u ndal te vendimi për përdorimin si parking të territorit të ambienteve sportive të gjimnazit “Hasan Tahsini”.

Sakaj solli në vëmendje historinë e mbrojtjes së këtyre ambienteve nga mësuesit. Ajo rrëfeu se në vitin 1997, kur sipas saj u tentua të digjej gjimnazi, mësuesit organizuan roje me turne edhe gjatë natës për ta mbrojtur shkollën.

Sipas saj, edhe në vitin 2001 ka pasur një projekt për ndërtimin e një kati të nëndheshëm që do të përdorej si disko, por projekti u kundërshtua nga mësuesit, të cilët kërkuan ruajtjen e territorit si ambient sportiv në funksion të nxënësve.

Duke iu referuar zhvillimeve të fundit, Shkëndije Sakaj apeloi që të shfuqizohet vendimi i Këshillit Bashkiak Sarandë për ndërtimin e parkingut në territorin e ambienteve sportive të gjimnazit “Hasan Tahsini”, duke kërkuar që hapësira të ruajë funksionin e saj sportiv.

Protesta e sotme vjen në vijim të reagimeve qytetare të ditëve të fundit në Sarandë, ku krahas problemeve të furnizimit me ujë dhe energji elektrike, në qendër të debatit është vendosur edhe e ardhmja e territorit pranë gjimnazit “Hasan Tahsini”. Saranda Web

The post Etvela Merko, aktivistja nga Delvina, i bashkohet protestës qytetare në Sarandë appeared first on Saranda News.

The post Shkëndije Sakaj: “Në ’97 ruajtëm natën gjimnazin, në 2001 donin ta bënin disko. Të anullohet vendimi appeared first on Saranda News.

Në fokus të vizitës janë çështjet që lidhen me menaxhimin e flukseve të shtuara të udhëtarëve në porte dhe pikat e kalimit kufitar, si dhe masat për garantimin e sigurisë së qytetarëve dhe turistëve gjatë periudhës së ngarkuar të verës.

Sipas qëndrimit të përcjellë gjatë vizitës, një tjetër çështje që kërkon vëmendje është administrimi i hapësirave bregdetare. Plazhet publike duhet të mbeten të aksesueshme për qytetarët dhe pushuesit, të jenë të sigurta dhe të menaxhohen në përputhje me përgjegjësitë e institucioneve dhe operatorëve përkatës.

Vëmendje i është kushtuar edhe problematikës së zhurmave gjatë sezonit turistik. Institucionet kërkojnë respektimin e rregullave, në mënyrë që aktiviteti i bizneseve dhe jeta e natës të mos kthehen në burim shqetësimi për banorët dhe pushuesit.

Vizita e dy ministrave në Sarandë zhvillohet në një periudhë kur qyteti dhe zonat turistike përreth përballen me fluks të lartë vizitorësh, duke shtuar njëkohësisht kërkesat për shërbime, siguri, administrim të hapësirave publike dhe respektim të rregullave gjatë sezonit veror. Saranda Web

The post Siguria, plazhet dhe zhurmat sjellin në Sarandë për takim urgjent 2 ministra – VIDEO appeared first on Saranda News.

Edhe pse pjesëmarrja ishte e vogël, vetëm 5-6 qytetarë, protesta mori një domethënie të veçantë në një qytet ku reagimi qytetar ndaj problematikave publike ka qenë prej vitesh i vakët. Kësaj situate i shtohet edhe mungesa e një opozite aktive, e cila shpesh akuzohet për heshtje dhe bashkëpunim të fshehtë me pushtetin vendor.

Një prej organizatoreve të protestës, e kthyer së fundmi nga Shtetet e Bashkuara të Amerikës, tregoi se pas më shumë se dy dekadash larg Sarandës, realiteti që gjeti ishte thuajse i pandryshuar.

“Jam kthyer pas 30 vitesh dhe i gjeta fqinjët e mi ashtu siç i kisha lënë, duke mbushur ujë me bidona”, u shpreh ajo, duke kërkuar zgjidhje për furnizimin me ujë të qytetit.

Gjatë protestës u ngrit edhe një tjetër çështje që ka shkaktuar reagime ditët e fundit: projekti për ndërtimin e një parkingu në territorin që përfshin terrenet sportive të gjimnazit “Hasan Tahsini”.

Një prej protestueseve solli si shembull reagimin qytetar për mbrojtjen e plazhit të Centralit, duke theksuar se kur qytetarët bashkohen dhe reagojnë, institucionet detyrohen t’i dëgjojnë.

Sipas saj, rasti i Centralit tregoi se reagimi qytetar mund të pengojë vendimmarrje apo veprime që konsiderohen në dëm të interesit publik dhe të qytetit.

Pavarësisht numrit të vogël të pjesëmarrësve, protesta e sotme përcolli një mesazh më të madh se vetë shifrat: në Sarandë ka ende qytetarë që zgjedhin të reagojnë publikisht për problemet e qytetit. Saranda Web

The post Disa qytetarë në Sarandë guxojnë të protestojnë për mungesën e ujit – VIDEO appeared first on Saranda News.

Një reagim i pazakontë qytetar ka shpërthyer në Sarandë pas vendimit të Këshillit Bashkiak për kalimin në pronësi të Bashkisë të territorit që përfshin sipërfaqen e gjimnazit “Hasan Tahsini”, me qëllim ndërtimin e një parkingu publik. Qindra qytetarë kanë reaguar në publikimin e Saranda Web, duke kundërshtuar përdorimin e kësaj hapësire për parking dhe duke kërkuar që territori t’u mbetet nxënësve, sportit dhe aktiviteteve të të rinjve.

Përmasat e këtij reagimi përbëjnë një zhvillim veçanërisht domethënës: është ndër rastet e para, dhe ndoshta reagimi më i gjerë publik i qytetarëve të Sarandës për një vendimmarrje që prek drejtpërdrejt hapësirat e qytetit, pas 35 vitesh gjatë të cilave Saranda ka përjetuar zaptime, betonizime dhe tjetërsime të shumta të hapësirave publike.

Pikërisht për këtë arsye titulli “LAJM I MIRË” nuk lidhet me vendimin për parkingun, por me faktin se qytetarët po reagojnë, po kërkojnë llogari dhe po shprehin publikisht qëndrimin e tyre për mënyrën se si përdoret qyteti.

Qytetarët: Parking po, por jo në territorin e shkollës

Saranda Web ishte media e vetme që bëri publike vendimmarrjen e mbledhjes së Këshillit Bashkiak. Pas publikimit, reagimet ishin të menjëhershme dhe qindra komente e kthyen çështjen në një debat publik.

Nga komentet e deritanishme, qëndrimi dominues është kundërshtimi i ndërtimit të parkingut pikërisht në këtë territor.

“Territori i shkollës është i shenjtë dhe ruhet si sytë e ballit”, shkruan një qytetar.

Të tjerë kërkojnë që hapësira të përdoret për fusha sportive, aktivitete shkollore dhe gjelbërim, ndërsa për parkingun Bashkia të gjejë një tjetër territor.

“Nuk ka më ambiente për edukim fizik? Vetëm ndërtime për biznes? Nuk ka më klasa sportive dhe aktivitete shkollore?”, pyet një tjetër qytetar.

Ka edhe qytetarë që e konsiderojnë të domosdoshëm shtimin e parkingjeve publike në Sarandë, por edhe në këto reagime ngrihet çështja e vendndodhjes. Me pak fjalë: parkingje po, por jo duke zvogëluar hapësirat që mund t’u shërbejnë nxënësve dhe të rinjve.

Vangjel Agora: “Makina mund të parkojë diku tjetër, fëmija nuk mund të rritet diku tjetër”

Debatit i është bashkuar publikisht edhe Vangjel Agora, i cili kundërshton projektin dhe kërkon rishikimin e tij.

Në reagimin me titull “Nga një ambient sportiv në fushë parkimi: kështu po ‘zhvillojmë’ rininë?”, Agora argumenton se çështja nuk duhet parë thjesht si një procedurë administrative, por si një zgjedhje për modelin e qytetit që Saranda dëshiron të ndërtojë.

Ai thekson se nuk është kundër parkingjeve. Përkundrazi, pranon se një qytet turistik si Saranda ka nevojë për parkingje dhe zgjidhje serioze për trafikun, por kundërshton përdorimin për këtë qëllim të një hapësire që lidhet me shkollën dhe sportin.

Sipas tij, Bashkia duhet të investojë për rikonstruksionin e territorit, krijimin e fushave të basketbollit e volejbollit dhe ambienteve ku të rinjtë mund të ushtrohen pas mësimit.

Agora sjell në vëmendje edhe traditën sportive të Sarandës dhe ekipet e “Butrintit”, duke ngritur pyetjen nëse qyteti duhet të synojë ringritjen e kësaj tradite apo të vazhdojë të zvogëlojë hapësirat ku mund të lindin sportistët e së ardhmes.

“Makina mund të parkojë diku tjetër. Fëmija nuk mund të rritet diku tjetër”, është një nga mesazhet e reagimit të tij.

Sipas Agorës, debati nuk është një luftë kundër parkingjeve, por një debat mbi prioritetet: “Saranda ka nevojë për parkingje. Por Saranda ka edhe më shumë nevojë për fëmijët e saj.”

Roli i opozitës: Një pjesë u largua, pjesa tjetër qëndroi në sallë duke mos cenuar kuorumin

Një pikë që ngre pikëpyetje në këtë vendimmarrje është edhe qëndrimi i opozitës në Këshillin Bashkiak Sarandë.

Gjatë mbledhjes, një pjesë e këshilltarëve të opozitës u larguan nga salla, ndërsa pjesa tjetër zgjodhi të qëndronte dhe të merrte pjesë në votim, ku ra në sy se gjatë gjithë kohës ka patur një komunikim me mesazhe në telefona (SHIKO VIDEO) . Këshilltarët opozitarë që qëndruan votuan kundër propozimit, por prania e tyre bëri që kuorumi të mos cenohej dhe mbledhja të vijonte normalisht, duke i hapur rrugë votimit dhe miratimit të vendimit nga shumica.

.

Përpara mbledhjes nuk pati një reagim publik të opozitës për të informuar qytetarët mbi propozimin, për të ngritur shqetësimet e saj apo për të kërkuar debat publik. Edhe pas votimit dhe miratimit të vendimit, deri në këto momente, mungon një reagim publik që të shpjegojë qëndrimin e saj dhe arsyet e votës kundër.

.

Në këtë mënyrë, kundërshtimi më i fortë publik ndaj projektit deri tani nuk ka ardhur nga politika, por nga vetë qytetarët, të cilët reaguan në numër të madh pasi vendimmarrja u bë publike nga Saranda Web.

Pas 35 vitesh, një sinjal se qytetarët nuk duan më të heshtin

Pas dekadash transformimesh të pakthyeshme të qytetit, zaptimet, betonizimi dhe tjetërsimi i hapësirave publike, qindra sarandjotë po thonë publikisht se duan të kenë zë në atë që ndodh me hapësirat e tyre.

Ky reagim qytetar mund të jetë zhvillimi më i rëndësishëm i gjithë kësaj historie: Saranda po diskuton publikisht se çfarë qyteti dëshiron të jetë.

The post LAJM I MIRË/ Qytetarët në Sarandë reagojnë, kundërshtojnë parkingun në territorin e gjimnazit appeared first on Saranda News.

Në mbledhjen e sotme të Këshillit Bashkiak Sarandë u miratua kërkesa e Bashkisë Sarandë për kalimin në pronësi të territorit që përfshin sipërfaqen e gjimnazit “Hasan Tahsini”.

Sipas Bashkisë Sarandë, në territorin pas gjimnazit “Hasan Tahsini” planifikohet ndërtimi i një parkingu publik, i cili do të administrohet nga vetë bashkia.

“Në territorin pas gjimnazit ‘Hasan Tahsini’ do të ndërtojmë një parking publik. Parkingun do ta menaxhojmë ne”, u bë e ditur nga përfaqësuesit e Bashkisë gjatë mbledhjes.

Propozimi për kalimin e territorit në pronësi të Bashkisë Sarandë u hodh për votim dhe mori votat e shumicës së këshilltarëve, duke u miratuar.

Ndërtimi i parkingut synon të krijojë hapësira të reja parkimi në këtë pjesë të qytetit, ndërsa detaje të tjera mbi projektin, kapacitetin dhe afatet e realizimit pritet të bëhen të ditura në vijim. Saranda Web 

The post Parking publik te gjimnazi “Hasan Tahsini”, miratohet kalimi i territorit në pronësi të Bashkisë appeared first on Saranda News.

U zhvillua sot mbledhja e Këshillit Bashkiak Sarandë, e cila ishte planifikuar fillimisht për më 31 korrik, por atë ditë nuk u zhvillua për shkak të mungesës së kuorumit.

Në qendër të mbledhjes ishte situata e furnizimit me ujë në Sarandë. Përfaqësues të Shoqërisë Rajonale Ujësjellës Kanalizime Sarandë raportuan para këshilltarëve mbi problematikat e shfaqura gjatë sezonit turistik dhe masat e ndërmarra për furnizimin e qytetarëve.

Sipas përfaqësuesve të Ujësjellësit, sasia aktuale e ujit nuk është e mjaftueshme për të përballuar fluksin e lartë të sezonit turistik, ndërsa është tentuar që përmes kufizimeve të plotësohen nevojat e zonave të ndryshme.

“Megjithë problematikat e shfaqura dhe mungesën e sasisë së mjaftueshme të ujit për të përballuar këtë fluks turistik, jemi munduar që me kufizime të plotësojmë nevojat”, u tha gjatë raportimit.

Përfaqësuesi i Ujësjellësit bëri të ditur gjithashtu se, së bashku me Bankën Botërore, po punohet për një studim që synon të sjellë rreth 500 litra ujë në sekondë nga burimet e Tatzatit, një projekt që pritet të rrisë ndjeshëm kapacitetet e furnizimit me ujë të zonës së Sarandës.

Një tjetër çështje e rëndësishme e trajtuar në mbledhje ishte kalimi në pronësi të Bashkisë Sarandë i territorit që përfshin sipërfaqen e gjimnazit “Hasan Tahsini”. Në këtë zonë planifikohet ndërtimi i një parkingu publik.

Në rendin e ditës ishin gjithashtu vendime që lidhen me ndihmën ekonomike për muajin qershor, ndihmën financiare për një qytetar, transferimin në pronësi të Bashkisë Sarandë të territorit të Bar Lulishtes, si dhe ndryshime në buxhetin e Bashkisë për vitin 2026.

Në fillim të seancës, me propozim të këshilltarit të PS-së, Gjergji Imeri, dhe këshilltarit të djathtë Ilirjan Gërdhuqi, rendit të ditës iu shtuan edhe dy pika të tjera.

Megjithatë, mbledhja nuk arriti të përfundonte të gjithë rendin e ditës. Këshilltarët e djathtë u larguan pjesë-pjesë nga salla dhe, pas rënies së numrit të këshilltarëve të pranishëm nën kuorumin e nevojshëm, vijimi i seancës u bë i pamundur.

Për pasojë, tre pikat e fundit të rendit të ditës mbetën pa u diskutuar.

Mes tyre ishte edhe çështja që lidhej me nisjen e procedurës dhe miratimin në parim të vlerës financiare të shpronësimit të pronave private që preken nga projekti “Përmirësimi i infrastrukturës së zonës periferike Sarandë”.

Kështu, edhe mbledhja e 4 gushtit, e thirrur pas dështimit të seancës së 31 korrikut për mungesë kuorumi, u mbyll pa arritur të shqyrtojë të gjitha çështjet e parashikuara në rendin e ditës. Saranda Web

The post Këshilli Bashkiak Sarandë mblidhet për ujin, por seanca ndërpritet sërish nga mungesa e kuorumit appeared first on Saranda News.