Fermerët e zonës së Sarandës dhe Konispolit, veçanërisht ata që merren me kultivimin e misrit, perimeve dhe mandarinave, po përballen me një rritje të ndjeshme të kostove të prodhimit, duke e vënë në vështirësi serioze vijimin e aktivitetit të tyre bujqësor.

Sipas vetë fermerëve, çmimet e plehrave kimikë kanë pësuar rritje të menjëhershme gjatë javëve të fundit. Aktualisht, ato variojnë nga rreth 9500 deri në 12000 lekë për kuintal, në varësi të llojit dhe përbërjes. Për kulturat intensive si perimet dhe agrumet, që kërkojnë përdorim të shpeshtë të plehrave, kjo rritje ka një ndikim të drejtpërdrejtë në koston finale të prodhimit.

Në të njëjtën kohë, fermerët theksojnë se edhe çmimi i naftës për punimet bujqësore mbetet i lartë, duke rënduar më tej shpenzimet për plugim, mbjellje dhe mirëmbajtje të tokës. Për zonat si Konispoli, ku prodhimi i mandarinës është një nga burimet kryesore të të ardhurave, kjo situatë rrezikon seriozisht sezonin e ardhshëm.

Të dhënat nga tregu tregojnë se çmimet e plehrave kanë shënuar rritje të dukshme në një periudhë të shkurtër kohe. Fosfori raportohet të jetë rritur me rreth 25%, azoti me 20% dhe potasi me 10%, krahasuar me një muaj më parë. Kjo ka krijuar një presion të menjëhershëm mbi fermerët, të cilët tashmë po operojnë në kushte mbijetese.

“Po i blejmë plehrat me çmime shumë më të larta se më parë, ndërkohë që produktet tona shpesh mbeten pa u shitur ose shiten me çmime të ulëta. Me këto kosto, është gjithnjë e më e vështirë të vazhdojmë”, shprehen disa prej fermerëve të zonës.

Një tjetër shqetësim lidhet me mungesën e mbështetjes direkte. Fermerët kërkojnë ndërhyrje nga shteti përmes subvencioneve ose lehtësive fiskale, pasi në kushtet aktuale, shumë prej tyre rrezikojnë të reduktojnë sipërfaqet e mbjella ose të braktisin një pjesë të aktivitetit.

Specialistët e bujqësisë e lidhin këtë situatë me rritjen e çmimeve në tregjet ndërkombëtare, por sugjerojnë se një ndër masat më të menjëhershme që mund të ndërmarrë qeveria është kompensimi i TVSH-së për inputet bujqësore. Një ndërhyrje e tillë do të ndihmonte në uljen e kostove për fermerët dhe në mbajtjen në këmbë të prodhimit vendas, në një kohë kur presioni ekonomik mbi sektorin bujqësor është në rritje.

The post Me naftën rriten edhe çmimet e plehrave. Fermerët e Sarandës dhe Konispolit në kolaps appeared first on Saranda News.

Qeveria po përgatit një program të ri kombëtar që synon zgjerimin e aktiviteteve në shkollat parauniversitare edhe pas përfundimit të orarit mësimor. Nisma parashikon që ambientet shkollore të përdoren për zhvillimin e aktiviteteve të ndryshme edukative, kulturore dhe sportive për nxënësit.

Sipas ministres së Arsimit, Mirela Kumbaro, programi do të përfshijë jo vetëm mësuesit aktualë, por edhe mësues të dalë në pension, si dhe ata që janë në pritje punësimi. Gjithashtu, pritet të angazhohen edhe persona me përvojë në fusha si arti, muzika, teatri dhe zanatet, në varësi të aktiviteteve që do të zhvillohen në çdo shkollë.

Ky program pritet të shoqërohet me ndryshime ligjore, të cilat do të përcaktojnë mënyrën e funksionimit dhe financimit të tij, përfshirë edhe pagesat për orët shtesë të angazhimit. Autoritetet synojnë që aktivitetet pas mësimit të zbatohen në të gjitha shkollat e vendit, duke krijuar një strukturë të unifikuar në nivel kombëtar.

Në Shqipëri funksionojnë rreth 1498 shkolla parauniversitare dhe sistemi përfshin afërsisht 345 mijë nxënës nga klasa e parë deri në maturë.

Në të njëjtën mbledhje të Këshillit të Ministrave janë miratuar edhe disa vendime të tjera në fushën e arsimit dhe kërkimit shkencor. Ndër to përfshihet mundësia që agjenci të tjera publike të krijojnë institute kërkimore, si dhe përcaktimi i kategorive të pagave dhe shpërblimeve për kërkuesit shkencorë.

Po ashtu, është vendosur transformimi i Qendrës së Shërbimeve Arsimore në një agjenci autonome, me qëllim riorganizimin dhe përmirësimin e shërbimeve që lidhen me proceset arsimore. Saranda Web

The post Shkollat do jenë hapur edhe pas mësimit, qeveria plan për angazhimin e mësuesve në pension appeared first on Saranda News.

Shërbimet e Komisariatit të Policisë Sarandë kanë referuar materialet në Prokurori, ku ka nisur procedimi penal për shtetasin G. N., 58 vjeç, banues në fshatin Velahovë dhe mësues në një shkollë 9-vjeçare në Finiq, pasi dyshohet se ka keqtrajtuar një nxënës gjatë orës së mësimit.

Ngjarja është denoncuar edhe në media, ndërsa një video e publikuar pretendohet se tregon momentin e përplasjes brenda ambienteve të shkollës. Sipas pretendimeve të disa nxënësve, situata ka ndodhur gjatë zhvillimit të mësimit, pasi një nxënës i kishte pëshpëritur diçka një shoku të tij, ndërsa reagimi i mësuesit ka qenë i menjëhershëm dhe i ashpër.

Pamjet e publikuara kanë shkaktuar reagime dhe shqetësim, ndërsa rasti ka tërhequr vëmendjen e opinionit publik dhe institucioneve përgjegjëse.

Ndërkohë, ka edhe informacione të tjera, sipas të cilave pretendohet se mësuesi mund të ketë qenë subjekt i sjelljeve problematike apo bullizimit nga një grup nxënësish. Gjithashtu, përmendet edhe një komunikim me përmbajtje të papërshtatshme që dyshohet se është bërë nga nxënësi ndaj mësuesit, çka mund të ketë ndikuar në përshkallëzimin e situatës.

Autoritetet po vijojnë veprimet për verifikimin e plotë të rrethanave të ngjarjes, ndërsa pritet që hetimet të sqarojnë përgjegjësitë dhe dinamikën e plotë të incidentit. Saranda Web

The post Procedohet penalisht mësuesi në Finiq për keqtrajtimin e një nxënësi gjatë mësimit appeared first on Saranda News.

Në një kohë kur çmimet e karburanteve në Shqipëri mbeten ndër më të lartat në rajon, qeveria ka njoftuar vendosjen e dy tarifave të reja që pritet të ndikojnë drejtpërdrejt në rritjen e mëtejshme të çmimit të naftës dhe benzinës.

Sipas raportimit të publikuar nga Kapitali.al, në vend që të lehtësojë barrën fiskale mbi karburantet, qeveria ka zgjedhur të shtojë dy tarifa të reja: tarifën e gjurmimit të karburanteve dhe atë për krijimin e rezervës kombëtare të sigurisë.

Kryeministri Edi Rama bëri të ditur se sistemi i gjurmimit të karburanteve do të realizohet nga kompania Albtrace (AlbTreis), një kompani e përbashkët mes shtetit shqiptar dhe një partneri nga Emiratet e Bashkuara Arabe. Sipas Ramës, kjo kompani publike do të përdorë teknologji për të monitoruar të gjitha produktet e akcizës dhe veçanërisht karburantet.

“Ne kemi krijuar një kompani të re publike, në ortakëri me Emiratet e Bashkuara, me kompaninë e tyre të të njëjtit objektiv, e cila quhet AlbTreis. Ajo është një kompani publike që do të bëjë gjurmimin e të gjitha produkteve të akcizës me teknologji dhe së shpejti Albtreis do të hyjë në treg me dy produktet e veta të para, që kanë të bëjnë me gjurmimin dhe ndjekjen e naftës,” deklaroi kryeministri.

Sipas tij, sistemi i gjurmimit do të përdoret kryesisht për të kontrolluar tranzitin e karburanteve, duke synuar të eliminojë rastet kur nafta që deklarohet për rieksport përfundon duke u shitur në tregun vendas.

Albtrace është një kompani ku 51 për qind e aksioneve zotërohen nga shteti shqiptar, ndërsa 49 për qind nga kompania arabe O & S Security and Solutions, e cila më parë ishte e përfshirë edhe në koncesionin e pullave fiskale. Hyrja e kësaj kompanie në tregun e karburanteve pritet të rikthejë pjesërisht sistemin e markimit dhe do të shoqërohet me një tarifë të re, e cila do të përfshihet në çmimin final që paguajnë qytetarët për naftën.

Por edhe më e kushtueshme pritet të jetë tarifa për krijimin e rezervës kombëtare të sigurisë për hidrokarburet. Ministri i Energjisë, Enea Karakaçi, bëri të ditur se qeveria po përgatit një projektligj për krijimin e një agjencie shtetërore që do të mbajë rezervat strategjike të karburanteve.

Sipas planit të qeverisë, do të krijohet një rezervë minimale 90-ditore e karburanteve për të garantuar sigurinë energjetike të vendit. Aktualisht këto rezerva mbahen nga kompanitë tregtare të hidrokarbureve, por me ligjin e ri ato do të menaxhohen nga një agjenci shtetërore që do të përdorë depozita të sajat ose depo të marra me qira.

Kostoja për krijimin e kësaj rezerve është shumë e lartë. Sipas përllogaritjeve të publikuara nga Kapitali.al, vetëm për vitin e parë do të nevojitet sigurimi i rreth 240 mijë tonëve naftë. Me një çmim aktual në treg prej rreth 1250 dollarë për ton, kjo përkthehet në një kosto të drejtpërdrejtë që i kalon 300 milionë dollarët.

Përveç kësaj, agjencia shtetërore do të ketë edhe kosto të tjera operative, përfshirë marrjen me qira të depozitave të karburanteve. Aktualisht qiraja minimale për depozita të tilla llogaritet rreth 10 euro për ton në muaj, çka do të krijonte një kosto shtesë që mund të arrijë deri në 25 milionë euro në vit.

Të gjitha këto shpenzime pritet të financohen përmes vendosjes së një tarife të re mbi çmimin e karburanteve. Si rrjedhojë, dy tarifat e reja – ajo e gjurmimit dhe ajo e rezervës kombëtare – pritet t’i shtohen barrës së rëndë fiskale që tashmë rëndon mbi karburantet në Shqipëri, duke rritur edhe më tej çmimet që paguajnë qytetarët në pompë.

The post Në kulmin e rritjes së çmimit të naftës, qeveria vendos edhe dy taksa të tjera appeared first on Saranda News.

Kryeministri Edi Rama deklaroi se në Shqipëri nuk ekzistojnë oligarkë, gjatë një takimi me furnizuesit e karburanteve, një deklaratë që pritet të ndezë sërish debat për raportet mes qeverisë dhe biznesit të madh në vend.

Sipas Ramës, përdorimi i termit “oligark” për realitetin shqiptar është i gabuar dhe lidhet me mënyrën e të menduarit të trashëguar nga propaganda e periudhës komuniste. Ai argumentoi se nëse në Shqipëri do të kishte oligarkë në kuptimin klasik të fjalës, ata do të kishin ndikim të tillë sa të pengonin politikat e qeverisë dhe konkurrencën në treg.

Kryeministri theksoi se qeveria ka ndërmarrë iniciativa për të kufizuar fitimet abuzive dhe për të zgjeruar aksesin në fondet publike përmes konkurrencës, duke argumentuar se këto masa nuk do të ishin të mundura nëse vendi do të kontrollohej nga oligarkë.

Megjithatë, deklarata e Ramës vjen në një kohë kur shpesh në debatet politike dhe ekonomike në Shqipëri përdoret pikërisht termi “oligarkë” për të përshkruar bizneset e mëdha që përfitojnë kontrata publike, koncesione apo projekte infrastrukturore. Kritikët e qeverisë kanë ngritur vazhdimisht dyshime për përqendrimin e projekteve dhe fondeve publike tek një numër i kufizuar kompanish.

Në këtë kontekst, deklarata e kryeministrit duket më shumë si një përpjekje për të kundërshtuar këtë narrativë, sesa për të shuar debatet që prej vitesh shoqërojnë marrëdhënien mes pushtetit politik dhe biznesit të madh në vend.

The post Rama: “Në Shqipëri nuk ka oligarkë”. Ju nuk i meritoni të gjitha të zezat që thonë për ju appeared first on Saranda News.

Kryeministri Edi Rama zhvilloi një takim me furnizuesit e karburanteve në vend pas rritjes së çmimeve të naftës në tregjet ndërkombëtare, të ndikuara nga lufta në Lindjen e Mesme. Rama deklaroi se në Shqipëri rritja ka qenë “e moderuar”, por pranoi se askush nuk mund të parashikojë se si do të evoluojë çmimi i naftës në bursë në ditët dhe javët në vijim.

Megjithatë, pavarësisht shqetësimit për rritjen e çmimeve, nga takimi nuk doli asnjë masë konkrete për të frenuar shtrenjtimin e karburanteve në tregun vendas. Kryeministri përjashtoi rikthimin e Bordit të Transparencës për çmimet e karburanteve, duke u mjaftuar me një apel ndaj kompanive që të mos e kalojnë të gjithë koston e krizës tek konsumatorët.

Rama bëri të ditur se Shqipëria ka rezerva karburanti të garantuara për rreth 100 ditë dhe se situata do të monitorohet nga qeveria. Ai përmendi gjithashtu një nismë për të futur në treg një distributor shtetëror me shumicë, që sipas tij do të ndihmonte në sigurimin e sasive dhe në marrëdhënie të drejtpërdrejta me kompanitë furnizuese, por pa dhënë një afat të qartë për realizimin e saj.

Nga ana tjetër, kërkesat e biznesit për ulje të taksave mbi karburantet u refuzuan. Organizata e biznesit Konfindustria ka kërkuar që shteti të ndërhyjë përmes një pakete fiskale dhe që të ardhurat shtesë nga TVSH-ja për shkak të rritjes së çmimeve t’u rikthehen qytetarëve dhe bizneseve përmes uljes së çmimit final. Por kryeministri e përjashtoi këtë mundësi.

Rama deklaroi gjithashtu se taksa e qarkullimit nuk do të ndryshohet, duke argumentuar se nëse hiqet nga çmimi i karburantit, ajo do të kalonte në një formë tjetër taksimi për përdoruesit e automjeteve.

Sa i përket mbështetjes nga buxheti i shtetit, kryeministri theksoi se nëse do të ketë ndihmë shtesë, ajo do të përqendrohet tek pensionistët. Ndërkohë për qytetarët dhe bizneset që përballen drejtpërdrejt me rritjen e çmimit të karburanteve, qeveria nuk paralajmëroi asnjë masë të menjëhershme.

The post Rritja e çmimit të naftës, Rama takim me biznesin: Do ndihmojmë vetëm pensionistët appeared first on Saranda News.

Sipas njoftimit zyrtar të Policisë, specialistët e Seksionit për Hetimin e Krimeve Ekonomiko-Financiare në Komisariatin e Policisë Sarandë kanë referuar materialet në Prokurori, ku ka nisur procedimi penal ndaj shtetasit me inicialet O. P., 39 vjeç, banues në Sarandë.

Nga veprimet paraprake hetimore dyshohet se ky shtetas ka shqetësuar dy shtetase duke i kontaktuar vazhdimisht nëpërmjet thirrjeve dhe mesazheve telefonike.

Materialet procedurale i janë referuar Prokurorisë për veprime të mëtejshme hetimore.

The post Shqetësonte me telefonata dhe mesazhe 2 shtetase, procedohet penalisht appeared first on Saranda News.

Një qytetar në Sarandë ka denoncuar vjedhjen e dy motorëve, të cilët sipas tij janë marrë gjatë mbrëmjes së djeshme pranë një servisi motorësh në Lagjen nr. 1 të qytetit.

Sipas deklarimit të qytetarit, motorët ishin dërguar në servis për riparim rreth pesë ditë më parë. Duke qenë se biznesi nuk ka patur hapësirë për parkimin e motorëve, ai shprehet se i kishte lënë mjetet pranë servisit me përgjegjësinë e tij dhe sot ka konstatuar se ato nuk ndodheshin më aty.

Qytetari tregon se menjëherë pasi ka vënë re mungesën e motorëve, ka bërë kallëzim në polici. Sipas tij, dyshohet se vjedhja ka ndodhur mbrëmjen e djeshme, pas orës 19:00.

Policia pritet të hetojë rastin dhe të verifikojë rrethanat e ngjarjes, ndërsa qytetari kërkon ndihmë për gjetjen e motorëve të vjedhur. Autoritetet nuk kanë dhënë ende një njoftim zyrtar lidhur me këtë rast.

The post Qytetari denoncon vjedhjen e dy motorëve te rruga në rikonstruksion në Sarandë appeared first on Saranda News.

Saranda ka mirëpritur mëngjesin e kësaj të marte kroçerën e parë për sezonin turistik 2026. Anija turistike “Sapphire Princess”, pjesë e flotës “Princess Cruises” ka mbërritur në qytet me rreth 2600 turistë në bord, duke shënuar nisjen e një tjetër sezoni të rëndësishëm për turizmin e kroçerave në qytetin bregdetar.

Turistët që udhëtojnë me këtë kroçerë kanë nisur menjëherë vizitat në Sarandë dhe në zonat përreth. Një pjesë e tyre po vizitojnë qendrën e qytetit, ndërsa të tjerë janë drejtuar drejt destinacioneve turistike dhe historike të jugut të vendit.

Grupi i turistëve është i përzier dhe përfshin vizitorë nga vende të ndryshme të botës. Kroçera ka mbërritur në Sarandë nga Italia dhe pritet të vazhdojë itinerarin e saj pasditen e kësaj të marte drejt Greqisë.

Mbërritja e kësaj kroçere shënon hapjen e sezonit të anijeve turistike për vitin 2026 në Sarandë, një segment gjithnjë e më i rëndësishëm për ekonominë lokale, pasi çdo ndalesë e kroçerave sjell mijëra vizitorë që frekuentojnë bizneset, restorantet dhe atraksionet turistike të qytetit. Saranda Web

The post Nis sezoni i kroçerave në Sarandë: “Sapphire Princess” sjell rreth 2600 turistë appeared first on Saranda News.

Policia greke ka arrestuar një 18-vjeçar i cili transportonte një sasi të madhe droge me një automjet të marrë me qira, ndërsa dyshohet se lënda narkotike kishte kaluar më parë nga kufiri me Shqipërinë.

Operacioni u zhvillua mëngjesin e sotëm, më 16 mars 2026, nga efektivët e Seksionit të Luftës kundër Narkotikëve pranë Nën-Drejtorisë për Hetimin dhe Zbulimin e Krimeve në Igumenicë.

Sipas njoftimit zyrtar të policisë, autoritetet arritën të parandalojnë shpërndarjen e një sasie të konsiderueshme narkotikësh, duke arrestuar drejtuesin e automjetit, ndaj të cilit është ngritur një dosje penale për transport dhe trafikim droge.

Ngjarja u zbulua gjatë kontrolleve të targetuara që policia po kryente në zonën e Sajadhës, në rajonin e Thesprotisë, shumë pranë kufirit me Shqipërinë. Gjatë kontrollit të një automjeti në pronësi të një kompanie që jep makina me qira, policia konstatoi se ai drejtohej nga një shtetas grek.

Burime policore dyshojnë se sasia e drogës mund të ketë hyrë më herët në territorin grek nga kufiri me Shqipërinë dhe se i arrestuari e kishte marrë në dorëzim për ta transportuar më tej drejt destinacionit të saj.

Gjatë kontrollit të detajuar të mjetit, në hapësirën e bagazhit dhe në sediljet e pasme u gjetën tre çanta udhëtimi. Brenda tyre policia zbuloi dhe sekuestroi gjithsej 55 pako me kanabis të papërpunuar, me peshë totale 60 kilogramë e 565 gramë.

I arrestuari pritet të dërgohet përpara Prokurorisë së Shkallës së Parë në Thesproti, ndërsa hetimet vijojnë për të zbuluar lidhjet e mundshme të rastit me rrjete të tjera të trafikut të drogës.

The post 18-vjeçari kapet në Sajadhë me rreth 60 kilogramë kanabis në një makinë me qira appeared first on Saranda News.