Në sallën e Këshillit Bashkiak të Sarandës u zhvillua sot takimi konsultues për prezantimin e gjetjeve të raportit të përvitshëm të Faktoje.al, organizatë që për të gjashtin vit radhazi monitoron 10 bashki të vendit për transparencën, procesin e konsultimit publik dhe mbajtjen e premtimeve elektorale.

Takimi, i zhvilluar në orën 10:30, mblodhi përfaqësues të Bashkisë Sarandë, anëtarë të Këshillit Bashkiak, përfaqësues të shoqërisë civile, media lokale dhe qytetarë. Qëllimi ishte që vërejtjet dhe diskutimet e ngritura të përfshihen në raportin përfundimtar.

Por përtej prezantimit teknik të indikatorëve, debati në sallë nxori në pah një kontrast të fortë: ndërsa Bashkia rezulton se përmbush detyrimet ligjore të transparencës, perceptimi i një pjese të qytetarëve është se përfshirja reale në vendimmarrje mbetet e kufizuar.

–

Katër premtime elektorale të vlerësuara si të pambajtura

Në kuadër të projektit “40 premtime, 10 bashki”, Faktoje ka analizuar katër premtime kryesore elektorale për Bashkinë Sarandë. Sipas raportit, të katër këto premtime janë vlerësuar si të pambajtura.

– Premtimi për ndërtimin e një terminali model për autobusët urbanë në hyrje të Sarandës rezulton i papërfunduar, edhe pse afati ishte 14 muaj nga nisja e punimeve. Pas 22 muajsh, sipas raportit, objekti nuk është dorëzuar plotësisht funksional.

– Sa i përket rehabilitimit të rrugës “Gjashtë”, punimet kanë nisur, por kanë pësuar ndërprerje dhe vonesa të konsiderueshme. Për këtë arsye, premtimi nuk konsiderohet i realizuar.

– Edhe ndërtimi i 4 parkingjeve publike, një çështje kritike për një qytet turistik si Saranda, është vlerësuar i pambajtur. Problematika e parkimit mbetet një nga shqetësimet më të dukshme urbane.

– Ndërsa për rehabilitimin e rrugëve të brendshme në qytet, megjithëse janë kryer disa ndërhyrje, raporti thekson se objektivi i premtuar nuk është arritur në mënyrë të plotë.

Ky vlerësim i katër premtimeve elektorale përbën një nga pikat më të rëndësishme të raportit, pasi lidhet drejtpërdrejt me llogaridhënien politike.  Nënkryetari i Bashkisë Florjan Sali u shpreh se pengesë për realizimin në kohë të këtyre projekteve kryesisht ka qenë ndërpreja e punimeve përgjatë sezonit.

–

16 indikatorë transparence – përmbushje ligjore

Në të njëjtën kohë, raporti evidenton se Bashkia Sarandë ka përmbushur 16 indikatorët ligjorë të transparencës. Këto përfshijnë publikimin e buxhetit, vendimeve dhe procesverbaleve të Këshillit Bashkiak, njoftimin paraprak të mbledhjeve dhe publikimin e raporteve të zbatimit të buxhetit.

Në aspektin formal, Bashkia është në përputhje me kuadrin ligjor.

Por pikërisht këtu lind pyetja thelbësore: a mjafton përmbushja formale për të garantuar transparencë reale?

–

Debati në sallë: “Publikimi online nuk është i mjaftueshëm”

Ilirjan Gërdhuqi theksoi se publikimi i njoftimeve vetëm në faqen zyrtare nuk garanton informim të plotë. Sipas tij, një pjesë e banorëve, nuk kanë akses në internet. Ai kërkoi që njoftimet të afishohen edhe në stenda publike.

–

Parku fotovoltaik në Heremec dhe 22 votat “pro”

Sofokli Thomari ngriti shqetësimin për projektin e parkut fotovoltaik në Nivicë, duke deklaruar se banorët u penguan nga Policia për të marrë pjesë në mbledhjen ku projekti u miratua me 22 vota pro dhe asnjë votë kundër.

Sipas tij, mungesa e debatit dhe pamundësia e pjesëmarrjes reale të komunitetit krijon perceptimin se vendimet merren pa një konsultim të mirëfilltë dhe këshilltarët bashkiakë votojnë sipas interesave të fshehta.

–

Projektet në qytet pa debat publik

Lefter Nika solli si shembull mbushjen e detit me inerte në zonën e plazhit të Centralit, duke e cilësuar si një ndërhyrje me ndikim të drejtpërdrejtë në mjedis dhe hapësirë publike, për të cilën, sipas tij, mungoi konsultimi i gjerë.

Vasil Dajko ngriti shqetësimin për projektin “Poli i Zhvillimit të Sarandës”. Ai deklaroi se projekti fillestar i Ekokampusit, i menduar si një kompleks arsimor nga kopshte deri në universitet, po ndryshon drejt një destinacioni turistik, pa u zhvilluar një debat i hapur me komunitetin.

Këto deklarata tregojnë se debati nuk është thjesht për publikimin e dokumenteve, por për të ardhmen e zhvillimit të qytetit.

–

Transparencë formale dhe sfida e besimit publik

Takimi në Sarandë evidentoi një realitet të dyfishtë: nga njëra anë, përmbushja e indikatorëve ligjorë; nga ana tjetër, shqetësime konkrete për mënyrën se si merren vendimet për projekte me ndikim afatgjatë në qytet.

Raporti përfundimtar i Faktoje pritet të përfshijë edhe diskutimet e zhvilluara në këtë takim. Por mesazhi që doli nga salla ishte i qartë: qytetarët kërkojnë pjesëmarrje reale, debat të hapur dhe llogaridhënie konkrete për premtimet e dhëna.

The post 4 premtime të pambajtura, qytetarët të përjashtuar nga vendimmarrja për projektet në Sarandë appeared first on Saranda News.

Komisioni Qendror i Zgjedhjeve ka vendosur që vula e partisë MEGA t’i takojë Kristo Kiços, duke e njohur atë si kryetarin legjitim të kësaj force politike.

Ky vendim vjen pas një periudhe të gjatë përplasjesh brenda partisë, pasi në zgjedhjet e mbajtura në nëntor 2024, Lefter Nika u zgjodhkryetar. Megjithatë, Kristo Kiço apeloi këtë rezultat dhe paraqiti dokumentacionin e nevojshëm në KQZ, e cila tani ka njohur zyrtarisht drejtimin e tij.

Vendimi i KQZ-së i jep fund paqartësisë ligjore mbi përfaqësimin e MEGA-s, një parti që luan një rol të rëndësishëm në politikën e minoritetit grek në Shqipëri. Pritet që ky zhvillim të ketë ndikim edhe në zgjedhjet e ardhshme, ku MEGA tashmë do të regjistrohet me Kristo Kiçon si kryetar zyrtar.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post KQZ merr vendimin: MEGA regjistrohet në zgjedhje me kryetar Kristo Kiço appeared first on Saranda News.

Në zgjedhjet e zhvilluara sot në disa qendra votimi në Shqipëri dhe Greqi, Lefter Nika është zgjedhur kryetar i ri i partisë MEGA, duke fituar 1022 vota nga 2176 pjesëmarrës. Kandidatët e tjerë, Ziso Lluci dhe Stefano Moraiti, siguruan përkatësisht 820 dhe 324 vota.

Zgjedhjet u organizuan në Sarandë, Tiranë, Athinë, Delvinë, Finiq, Dropull, Livadhja, Aliko, Mesopotam, Dhivër dhe Mursi, duke reflektuar një angazhim të gjerë të komunitetit të minoritetit grek. 

Rezultatet e Zgjedhjeve për Kryetarin e MEGA-s

Kjo fitore i siguron Lefter Nikës drejtimin e MEGA-s, një parti që ka si mision përfaqësimin e interesave të minoritetit grek në Shqipëri dhe përmirësimin e kushteve në zonat ku ky komunitet jeton. Në fjalën e tij pas fitores, Nika falënderoi votuesit për besimin e dhënë dhe shprehu synimin për të punuar në forcimin e përfaqësimit politik dhe social të minoritetit grek.

Partia MEGA, që nga themelimi i saj në vitin 2011, është angazhuar në mbrojtjen e të drejtave dhe zhvillimin e komunitetit të minoritetit grek në Shqipëri. Lefter Nika merr drejtimin e saj në një moment kur sfidat për këtë komunitet kërkojnë një lidership të fortë dhe të përkushtuar.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post Rezultatet e Zgjedhjeve për Kryetarin e ri të MEGA për çdo qendër appeared first on Saranda News.

Lefter Nika, ortopedi i njohur i Sarandës, është zgjedhur kryetar i Partisë MEGA, një forcë politike që përfaqëson interesat e minoritetit grek në Shqipëri. Në garë për këtë post ishin gjithashtu Stefan Moraiti dhe Ziso Llutsi, por Nika arriti të sigurojë mbështetjen e shumicës së anëtarëve të partisë.

Në një intervistë për Saranda Web, Lefter Nika ka shprehur qëllimin e tij për ta çuar Partinë MEGA drejt një drejtimi të ri, duke forcuar përfaqësimin e komunitetit të minoritetit grek dhe duke u fokusuar në përmirësimin e politikave që ndikojnë drejtpërdrejt zonat e banuara nga minoriteti grek. Në fjalën e tij, Nika nënvizoi rëndësinë e një lidershipi të hapur dhe të përgjegjshëm për të adresuar sfidat e këtij komuniteti.

Zgjedhjet u zhvilluan në disa qendra, përfshirë Tiranën, Sarandën, Athinën dhe Finiqin, Dropullin dhe Mursinë, duke reflektuar angazhimin e gjerë të anëtarësisë së Partisë MEGA. Me këtë fitore, Nika merr drejtimin e një partie që synon të rrisë ndikimin e minoritetit grek në jetën politike dhe sociale të Shqipërisë.

Rikthimi i vëmendjes te të drejtat dhe zhvillimi i zonave të banuara nga minoriteti grek pritet të jenë prioritetet kryesore të kryetarit të ri të MEGA-s.

MEGA që nga themelimi i saj në vitin 2011 është drejtuar nga Kristo Kiço, aktualisht prefekt i Vlorës. Nën udhëheqjen e Kiços, partia është angazhuar për forcimin e përfaqësimit të këtij komuniteti dhe ka kërkuar gjithashtu mbështetje për zhvillimin e zonave të minoritetit grek në Shqipëri. 

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post Lefter Nika zgjidhet kryetar i Partisë MEGA, përfaqësuese e minoritetit grek në Shqipëri appeared first on Saranda News.