Subjektet private që ushtrojnë aktivitet ekonomik në kate të sipërme të ndërtesave shumëkatëshe janë përfshirë në një proces verifikimi nga grupet e Furnizuesit të Mundësisë së Fundit, të cilat kanë dalë në terren për të kontrolluar përputhjen e kontratave të energjisë elektrike me tarifat përkatëse. Sipas verifikimeve, në disa raste është konstatuar se biznese të ndryshme vijojnë të jenë të regjistruara si klientë familjarë, duke paguar tarifa më të ulëta prej 8.5–9.5 lekë/kWh, ndërkohë që për aktivitetet ekonomike aplikohet tarifa 14 lekë/kWh.

Furnizuesi i Shërbimit Universal (FSHU), pjesë e OSHEE Group, bën me dije se po vijon procesi i përditësimit të kontratave të energjisë elektrike për të gjitha kategoritë e klientëve, në kuadër të sistemit të ri të tarifimit. Gjatë kontrolleve në terren janë identifikuar subjekte private, kryesisht në sektorin e shërbimeve, që përdorin energjinë për qëllime biznesi, por tarifohen si konsumatorë familjarë. Për këtë arsye, FSHU u bën thirrje të gjitha bizneseve, organizatave jofitimprurëse dhe personave fizikë që veprojnë si subjekte ekonomike, të verifikojnë dhe përditësojnë kontratën e tyre të energjisë nëse rezultojnë ende të regjistruar në kategorinë familjare.

Sipas kompanisë, ky proces është i nevojshëm për të garantuar një tarifim të drejtë dhe të bazuar në përdorimin real të energjisë elektrike. Klasifikimi i pasaktë në sistem ka ardhur kryesisht si pasojë e kontratave të vjetra, mungesës së përditësimit të të dhënave ose ndryshimit të funksionit të ambienteve nga banim në aktivitet ekonomik. FSHU thekson se bashkëpunimi i subjekteve me grupet e kontrollit ndihmon në shmangien e penaliteteve dhe në kalimin korrekt nga tarifimi familjar në atë jofamiljar.

Në procesin e përditësimit përfshihen të gjitha subjektet që kryejnë veprimtari ekonomike në emër të një personi fizik apo juridik dhe që përdorin energjinë për zyra, dyqane, punishte, qendra shërbimi apo aktivitete të ngjashme. Po ashtu, përfshihen edhe organizatat jofitimprurëse që, në praktikë, kanë konsum energjie të krahasueshëm me atë të subjekteve ekonomike. Procesi nuk prek klientët që e përdorin energjinë vetëm për qëllime banimi dhe që janë realisht konsumatorë familjarë.

Përditësimi i kontratës realizohet përmes verifikimit të statusit aktual, paraqitjes së një kërkese për ndryshim kategorie dhe dorëzimit të dokumentacionit që vërteton natyrën ekonomike të aktivitetit, si NIPT apo ekstrakt nga QKB. Aplikimi mund të kryhet pranë sporteleve të Qendrave të Kujdesit të Klientit të FSHU-së, si edhe online përmes faqes zyrtare dhe aplikacionit të OSHEE-së. FSHU dhe OSHEE Group u bëjnë thirrje të gjitha subjekteve të mos e shtyjnë këtë proces, duke theksuar se përditësimi i të dhënave kontribuon në një sistem më të rregullt dhe funksional të furnizimit me energji elektrike.

The post Kontratat e energjisë, nis aksioni për kapjen e bizneseve që paguajnë si familjarë appeared first on Saranda News.

Një banore nga zona e Vrionit ka denoncuar në Saranda Web arrogancën dhe papërgjegjshmërinë e OSHEE, pas ankesave të vazhdueshme për mungesën e energjisë elektrike, problem që pasditen e sotme e kanë patur edhe fshatrat e Delvinës dhe Finiqit.

Sipas denoncimit, banorja ka kontaktuar ditën e sotme OSHEE në Tiranë për të ngritur shqetësimin e saj lidhur me ndërprerjet e shpeshta të energjisë. Nga OSHEE qendrore, ajo është udhëzuar që të kontaktojë strukturën rajonale në Gjirokastër, duke i dhënë një numër telefoni për ta përcjellë ankesën.

Por ajo që ka ndodhur më pas është konsideruar nga banorja si fyese dhe e papranueshme.

Sipas saj, personi që i është përgjigjur në numrin e OSHEE rajonale i ka thënë në mënyrë tallëse:
“Do keni drita kur të vijë behari”, dhe më pas i ka mbyllur telefonin, pa dhënë asnjë shpjegim apo zgjidhje për situatën.

Banorja shprehet se kjo sjellje është një shenjë e qartë arrogancës dhe mungesës së respektit ndaj qytetarëve, të cilët jo vetëm paguajnë rregullisht faturat, por përballen çdo ditë me ndërprerje të energjisë, dëme në pajisje elektrike dhe vështirësi në jetën e përditshme.

Raste të tilla ngrenë pikëpyetje serioze mbi mënyrën se si trajtohen qytetarët nga institucionet publike dhe mbi standardin e shërbimit që ofrohet në zonat jashtë qendrave kryesore.

The post Banorët pa drita, OSHEE u përgjigjet me tallje: Do të keni kur të vijë behari appeared first on Saranda News.

Saranda Web është kontaktuar nga një qytetar me 88% invaliditet, i cili jeton pjesërisht në Greqi për arsye shëndetësore dhe pjesërisht në shtëpinë e tij në fshatin Livadhja, Sarandë. Ky qytetar ka ngritur një ankesë serioze ndaj OSHEE Sarandë, Gjirokastër dhe Tiranë, për shkelje të përsëritura të ligjit, si dhe ndaj administratorit të zonës së Livadhjas.

Sipas denoncimit të tij, që nga viti 2007 deri në korrik 2022, punonjës të OSHEE dhe administratori janë futur në mënyrë të paligjshme në oborrin e shtëpisë së tij, duke ndërruar disa herë matësin elektrik pa dijeninë e tij. Në çdo rast, matësit e rinj kanë qenë pa vulë dhe pa numër vule, ndërkohë që është aplikuar mbifaturim, deri në 7000-8000 lekë në muaj.

Në maj-qershor 2022, pa dijeninë e tij, një grup prej 11 personash nga Tirana dhe Gjirokastra, të shoqëruar nga administratori i Livadhjas, kanë ndërruar sërish matësin elektrik, duke vendosur një matës elektronik, sërish duke hyrë në oborr pa leje. Qytetari shprehet se ky veprim është bërë “me porosi nga lart për të vjedhur njerëzit e sëmurë dhe emigrantët”.

Pas vendosjes së matësit elektronik, në tetor 2022, një faturist i ri ka kryer mbifaturim, duke përllogaritur 4278 kWh të konsumuar, me një shumë prej 42,029 lekë, edhe pse qytetari nuk ndodhej në banesë dhe konsumi ishte minimal. Ndërkohë, më vonë i është kërkuar të paguajë 72,029 lekë, megjithëse vetë OSHEE Sarandë ka pranuar se “ka gabuar faturisti” dhe se nuk rezulton debitor në sistemin e tyre.

Në korrik 2024, pa asnjë njoftim paraprak, energjia elektrike i është ndërprerë sërish në mënyrë të paligjshme, përmes ndërhyrjes në matës e jo në shtyllën e shpërndarjes, duke e lënë pa mundësi për të ruajtur ilaçet dhe trajtimet shëndetësore që i nevojiten çdo ditë.

Ai thotë se në vitin 2015 është përballur me të njëjtën situatë mbifaturimi dhe vetëm pas ankesës në portalin korrupsioni.al, u pranua se “fajin e kishte matësi” dhe faturisti u largua nga puna. Megjithatë, abuzimet kanë vazhduar.

Në datën 3 korrik 2024, ai është ankuar edhe pranë Avokatit të Popullit, por deri më sot asnjë masë nuk është marrë ndaj OSHEE, veçanërisht ndaj drejtuesve të qarkut Gjirokastër.

“I bëj thirrje Kryeministrit të Shqipërisë – ju që na thoni të kthehemi nga emigracioni, a nuk është kjo një arsye për të na detyruar të ikim përsëri? Në këtë gjendje të rënduar shëndetësore, kam nevojë për energji për ilaçet dhe trajtimet e mia. Uroj që institucionet kompetente të zbatojnë ligjin dhe të mbajnë përgjegjësi personat që kanë abuzuar.”

Qytetari ka dorëzuar edhe dokumentacionin përkatës pranë drejtorive të OSHEE në Tiranë dhe Gjirokastër, si dhe certifikatën e invaliditetit.

Saranda Web qëndron pranë qytetarëve dhe i bën thirrje institucioneve kompetente të verifikojnë me përgjegjësi të plotë këtë rast dhe të ndërhyjnë pa vonesë për të rikthyer energjinë elektrike dhe për të ndalur abuzimet e raportuara.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post Ankesa e një qytetari invalid ndaj OSHEE: “Na detyrojnë të largohemi nga Shqipëria!” appeared first on Saranda News.

Një shqetësim i rëndësishëm vjen nga një qytetare e lagjes nr. 4 në Kodër, e cila ka ndarë situatën alarmante që po përballet komuniteti i saj. Sipas saj, para katër ditësh një makinë e madhe ka goditur një shtyllë ndriçimi, duke e dëmtuar rëndë.

Pavarësisht se OSHE ka deklaruar se do të ndërhyjë për ta rregulluar, deri më tani asnjë masë nuk është marrë, dhe java po përfundon. Banorët janë përpjekur me mjete primitive ta lidhin shtyllën për të parandaluar rrëzimin e saj, por moti i keq mund ta përkeqësojë situatën.

“Ajo çfarë e bën edhe më shqetësuese këtë situatë është fakti që poshtë shtyllës kalojnë fëmijë, të moshuar dhe nëna me karroca. Për më tepër, mbi të janë të varura tela të tensionit të lartë, të cilët lidhen me kabinën,” – tha qytetarja e shqetësuar.

Banorët i bëjnë thirrje OSHE-së që të ndërhyjë urgjentisht për të rregulluar këtë situatë emergjente, duke shmangur rrezikun për jetën dhe pronat e qytetarëve. Indiferenca ndaj rasteve të tilla mund të sjellë pasoja të rënda për komunitetin.

Saranda Web do të vazhdojë të ndjekë këtë çështje dhe të informojë qytetarët për veprimet e ndërmarra.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post Banorët e Lagjes nr. 4 në Kodër apelojnë: Shtylla e ndriçimit rrezikon jetën e kalimtarëve appeared first on Saranda News.

Zv.kryeministrja Belinda Balluku ka bërë të ditur sot në Kuvend se çmimi i energjisë elektrike do të pësojë ulje duke filluar nga janari i vitit të ardhshëm. Gjatë diskutimeve për projektbuxhetin 2025, Balluku theksoi se analiza për skemën e re të çmimeve ka përfunduar dhe se ulja do të bëhet duke ndjekur praktikat më të mira europiane.

“Derisa të vijë 1 dhjetori, ne do të kemi zbardhur të gjitha detajet mbi këtë skemë të re. Kjo do të ndihmojë qytetarët të përballojnë më lehtë kostot e jetesës,” deklaroi Balluku.

Edhe më herët, kryeministri dhe vetë zv.kryeministrja kanë paralajmëruar uljen e çmimeve për konsumatorët, por ende nuk është bërë e qartë nëse kjo do të aplikohet për kategori specifike të popullsisë apo do të bazohet në nivelin e konsumit.

Sipas premtimeve të qeverisë, ndryshimet do të hyjnë në fuqi më 1 janar 2025, duke sjellë një lehtësim të ndjeshëm për qytetarët. Kjo mbetet një çështje e ndjekur me interes të lartë, ndërsa priten detajet e skemës deri në fillim të dhjetorit.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post Balluku: Kam porosi nga Rama të ulim çmimin e energjisë, në 1 Dhjetor do mësoni sa do ulet appeared first on Saranda News.

Rruga Gjergj Araniti, e njohur si Rruga e Pestë në Sarandë, është aktualisht në proces rikonstruksioni. Megjithatë, gjatë këtij projekti janë vërejtur disa problematika që kanë ngritur shqetësime mes banorëve, të cilët kërkojnë ndërhyrje urgjente për zgjidhjen e tyre. Në disa pjesë të trotuarit, kabina elektrike dhe struktura të tjera të vendosura në mes të rrugës bllokojnë plotësisht kalimin, duke e bërë të pamundur përdorimin e sigurt të trotuarit nga qytetarët.

Vendosja e këtyre kabinave në mes të trotuarit krijon vështirësi për kalimtarët, veçanërisht për nënat me karroca për fëmijë, për personat me aftësi të kufizuara dhe për të moshuarit. Banorët kërkojnë që këto struktura të zhvendosen menjëherë tani që rruga po rikontruktohet, duke e konsideruar këtë periudhë si një mundësi ideale për të bërë ndërhyrjet e nevojshme dhe për të siguruar një trotuar të lirë e të aksesueshëm për të gjithë.

Një banor i zonës thekson: “Tani që rruga është në rikonstruksion, është momenti i duhur që këto kabina të hiqen nga trotuari. Ne nuk kërkojmë asgjë më shumë, vetëm që kalimi i sigurt të jetë i garantuar për të gjithë.”

Banorët bëjnë thirrje Bashkisë së Sarandës dhe kompanisë së energjisë elektrike që të ndërmarrin veprime të menjëhershme për zhvendosjen e këtyre strukturave dhe për të siguruar që trotuari të mbetet i lirë për këmbësorët. Rikonstruksioni aktual paraqet një mundësi të rëndësishme për zgjidhjen përfundimtare të këtij problemi, duke përmirësuar cilësinë e jetës dhe sigurinë për komunitetin e zonës.

Saranda Web do të ndjekë nga afër këtë çështje dhe do të vazhdojë të mbështesë zërin e qytetarëve, duke kërkuar që institucionet përgjegjëse të veprojnë sa më shpejt për të përmirësuar aksesin dhe sigurinë në një nga rrugët kryesore të qytetit.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

The post Banorët e rrugës së 5-të kërkojnë largimin e kabinës elektrike nga trotuari appeared first on Saranda News.