Operacioni u zhvillua nga efektivët e Seksionit të Luftës Kundër Narkotikëve pranë Drejtorisë së Hetimit dhe Zbardhjes së Krimeve në Janinë, në kuadër të kontrolleve të shtuara për parandalimin e hyrjes së lëndëve narkotike në territorin grek.

Sipas informacioneve, policia greke identifikoi një automjet me targa shqiptare në një zonë të Janinës dhe tentoi ta ndalonte për kontroll. Drejtuesi i mjetit nuk iu bind urdhrit të policisë dhe u largua me shpejtësi të lartë, duke kryer manovra të rrezikshme dhe duke lëvizur disa herë në korsinë e kundërt të qarkullimit.

Pas ndjekjes nga forcat policore, automjeti u neutralizua pak më vonë dhe drejtuesi shqiptar u arrestua. Gjatë kontrollit në brendësi të mjetit, policia gjeti dhe sekuestroi 28 pako me kanabis të papërpunuar, me peshë totale 167 kilogramë e 200 gramë.

Autoritetet greke bënë me dije gjithashtu se automjeti, i cili u sekuestrua, kishte targa të falsifikuara, ndërsa i arrestuari nuk dispononte dokumentacionin e nevojshëm për hyrje dhe qëndrim të ligjshëm në Greqi.

I ndaluari pritet të dalë përpara Prokurorisë së Shkallës së Parë në Janinë për veprime të mëtejshme procedurale. Saranda Web

The post Ndjekje si në filma në rrugët e Janinës, shqiptari kapet me makinën mbushur me kanabis appeared first on Saranda News.

Sipas policisë greke, bëhet fjalë për një vjedhje me vlerë rreth 146 mijë euro, e cila u zbulua pas kallëzimit të bërë nga pronari i biznesit në zonën e Thesproti. Ngjarja dyshohet të ketë ndodhur gjatë fundjavës së datave 9-10 maj 2026. Sipas hetimeve, shqiptari ka hyrë me forcë nga dritarja e magazinës së kompanisë ku ishte i punësuar dhe ka marrë shumën e madhe të parave, të cilat pronari i kishte fshehur në një enë metalike për djathë.

Menjëherë pas denoncimit, strukturat e Hetimit dhe Ndjekjes Penale në Igumenicë nisën veprimet intensive, duke arritur në identifikimin dhe arrestimin e autorit të dyshuar. Gjatë kontrollit dhe marrjes në pyetje, ai dorëzoi shumën prej 146,600 eurosh, të cilën e mbante të fshehur në banesën e tij.

Policia bëri të ditur se e gjithë shuma e parave iu kthye pronarit të biznesit, ndërsa ndaj shqiptarit është ngritur çështje penale për “vjedhje të rëndë”.

I arrestuari pritet të dalë përpara Prokurorisë së Shkallës së Parë në Thesproti për veprime të mëtejshme procedurale. Saranda Web

The post I vodhi pronarit 146,600 euro që i kishte në teneqenë e djathit, arrestohet shqiptari në Igumenicë appeared first on Saranda News.

Greqia ka vendosur rregulla të qarta për ruajtjen e qetësisë publike gjatë sezonit veror, duke përcaktuar orare të detyrueshme heshtjeje dhe duke ashpërsuar ndëshkimet për shkelësit. Këto masa hyjnë në fuqi çdo vit nga data 1 prill dhe zgjasin deri më 30 shtator, periudhë që konsiderohet zyrtarisht si sezoni i verës.

Gjatë kësaj kohe, qytetarët duhet të respektojnë orët e qetësisë së mesditës nga ora 15:00 deri në 17:30, si dhe ato të natës nga ora 23:00 deri në 07:00. Qëllimi është të garantohet një ambient i qetë për banorët dhe turistët, sidomos në zonat me fluks të lartë gjatë verës.

Ndryshe nga Shqipëria, ku sezoni veror shpesh perceptohet si një periudhë zhurme, muzike dhe argëtimi intensiv, në Greqi pushimet verore konceptohen si kohë për relaks, pushim dhe qetësi. Kjo filozofi reflektohet edhe në ligj, duke vendosur kufizime të rrepta për çdo aktivitet që prish qetësinë publike.

Me ndryshimet në Kodin Penal, prishja e qetësisë publike në Greqi dënohet me burgim deri në pesë muaj, duke e kthyer këtë shkelje në një vepër penale me pasoja serioze. Gjatë orëve të heshtjes ndalohen punimet që krijojnë zhurmë, përdorimi i muzikës me volum të lartë, organizimi i aktiviteteve të zhurmshme në banesa apo ambiente private, si dhe çdo formë shqetësimi në hapësira publike dhe mjete transporti.

Po ashtu, ndalohen lojërat e zhurmshme në ambiente si kafene apo qendra argëtimi, debatet me zë të lartë në vende publike, si dhe çdo aktivitet që krijon zhurmë në lagje apo zona banimi. Edhe jashtë këtyre orareve, ligji parashikon kufizime të forta, duke ndaluar përdorimin e altoparlantëve nga tregtarët për të tërhequr klientë apo reklamimin me zë të lartë të shërbimeve dhe produkteve.

Bizneset dhe familjet janë të detyruara të marrin masa për të reduktuar zhurmën, përfshirë izolimin akustik të ambienteve dhe kontrollin e pajisjeve që mund të krijojnë shqetësim. Përgjegjësi mbajnë edhe pronarët e kafshëve shtëpiake, të cilët duhet të sigurojnë që ato të mos prishin qetësinë e fqinjëve.

Këto masa pritet të ndikojnë drejtpërdrejt në përditshmërinë e qytetarëve dhe turistëve, duke e kthyer sezonin veror në Greqi në një periudhë të organizuar dhe të qetë. Saranda Web

The post Greqia merr masa të rrepta për sezonin veror: ndryshojnë orët e qetësisë, burg deri në 5 muaj për shkelësit appeared first on Saranda News.

Një ngjarje tragjike me pasoja fatale ka tronditur ishullin e Kefalonisë në Greqi, ku një 19-vjeçare me origjinë shqiptare ka humbur jetën në rrethana të dyshimta, duke ngritur shumë pikëpyetje mbi atë që ndodhi në orët e fundit të jetës së saj.

E reja, e identifikuar nga mediat greke si Myrto, u gjet pa ndjenja në orët e para të mëngjesit në një zonë publike të Argostolit. Ajo u transportua me urgjencë në spital, ku mjekët luftuan për rreth një orë për ta rikthyer në jetë, por pa sukses.

Sipas burimeve hetimore, ngjarja ka nisur disa orë më herët në një dhomë hoteli, ku 19-vjeçarja kishte shkuar fillimisht me një 23-vjeçar. Më pas, në ambient janë bashkuar edhe dy persona të tjerë, duke e kthyer takimin në një mbrëmje me disa të rinj. Dyshohet se gjatë kësaj kohe janë konsumuar lëndë narkotike, një element që po verifikohet përmes analizave laboratorike.

Në një moment gjatë natës, gjendja e vajzës është përkeqësuar dhe ajo ka humbur ndjenjat. Ajo që ka tronditur më shumë hetuesit është fakti se, sipas të dhënave paraprake, në vend që të njoftohej urgjenca apo të transportohej menjëherë në spital, të rinjtë e kanë nxjerrë nga dhoma dhe e kanë çuar drejt qendrës së qytetit.

Pamjet e kamerave të sigurisë kanë dokumentuar momentet kur një prej tyre e mban në krahë vajzën e pajetë, ndërsa dy të tjerët e shoqërojnë. Ata e kanë lënë në një zonë pranë sheshit dhe janë larguar, duke e lënë pa ndihmë në një gjendje kritike për një periudhë të konsiderueshme kohe.

Dyshohet se kjo vonesë në marrjen e ndihmës mjekësore ka qenë vendimtare për fatin e saj. Vetëm më vonë është njoftuar ambulanca, e cila e ka transportuar drejt spitalit, por ndërhyrja rezultoi e vonuar.

Pas ngjarjes, tre të rinjtë janë kthyer në hotel dhe, sipas hetimeve, kanë tentuar të fshijnë gjurmët duke pastruar dhomën dhe duke marrë sende personale të vajzës, përfshirë edhe telefonin e saj.

Policia greke ka arritur të identifikojë personat e përfshirë përmes kamerave të sigurisë dhe dëshmive të mbledhura, ndërsa ndaj tyre rëndon akuza për veprime që çuan në vdekjen e 19-vjeçares. Ata pritet të dalin përpara drejtësisë, ndërsa hetimet vijojnë për të sqaruar nëse kemi të bëjmë me neglizhencë fatale apo elementë të tjerë penalë më të rëndë.

Ekspertiza paraprake mjeko-ligjore ka evidentuar si shkak fillestar të vdekjes arrestin kardiak, por pritet që analizat toksikologjike të japin një pasqyrë më të plotë mbi substancat e mundshme të përdorura.

Ngjarja ka shkaktuar reagime të forta në opinionin publik dhe ka hapur debat mbi përgjegjësinë morale dhe ligjore në raste të tilla, ku një jetë e re humbet në rrethana që mund të ishin shmangur.

Ndërkohë, familja e 19-vjeçares është në gjendje të rëndë emocionale dhe kërkon drejtësi, duke këmbëngulur në zbardhjen e plotë të së vërtetës dhe ndëshkimin e përgjegjësve për këtë tragjedi. Saranda Web

The post 19-vjeçarja shqiptare humb jetën në Greqi, e droguan dhe e lanë të vdiste në rrugë appeared first on Saranda News.

Më herët ishte premtuar se pala greke do të siguronte kushte për funksionim të pandërprerë të doganës së Mavromatit, një kërkesë e kahershme e banorëve, bizneseve dhe sektorit të turizmit në jug të Shqipërisë. Megjithatë, deri më tani nuk ka një vendim zyrtar për zgjatjen e orarit në 24 orë.

Në këtë kontekst, autoritetet greke kanë shpallur hapjen e tetë pozicioneve të reja pune për forcimin e stafit në Stacionin Doganor të Mavromatit. Këto pozicione janë pjesë e Ciklit të parë për vitin 2026 të Sistemit të Unifikuar të Lëvizshmërisë dhe synojnë plotësimin e vendeve vakante në këtë pikë kufitare.

Konkretisht, bëhet fjalë për dy pozicione në nivel Arsimi Universitar për Oficerë Doganorë, dy pozicione në Arsimin Teknik për Oficerë Doganorë dhe katër pozicione në Arsimin e Mesëm, gjithashtu për Oficerë Doganorë. Aplikimet për këto vende pune janë të hapura deri më 19 prill 2026.

Deputeti grek Vasilis Giogiakas theksoi rëndësinë e këtij zhvillimi, duke deklaruar se plotësimi i tetë pozicioneve do të përbëjë një hap thelbësor në forcimin e zyrës doganore me staf të përhershëm. Sipas tij, kjo do të plotësojë edhe emërimet vjetore të punonjësve të administratës tatimore greke (AADE), të cilat janë miratuar së fundmi.

Megjithatë, edhe pse ky zhvillim shihet si një hap pozitiv drejt përmirësimit të funksionimit të doganës, mbetet për t’u parë nëse rritja e stafit do të shoqërohet me vendime konkrete për zgjatjen e orarit të punës.

Për zonën e Sarandës dhe gjithë jugun e vendit, funksionimi 24 orë i pikës kufitare të Mavromatit konsiderohet një element kyç për zhvillimin ekonomik, lehtësimin e lëvizjes së qytetarëve dhe rritjen e fluksit turistik gjatë gjithë vitit. Saranda Web

The post Dogana e Mavromatit me 8 punonjës të rinj, por ende pa një afat për funksionim 24 orë appeared first on Saranda News.

Policia greke ka arrestuar një 18-vjeçar i cili transportonte një sasi të madhe droge me një automjet të marrë me qira, ndërsa dyshohet se lënda narkotike kishte kaluar më parë nga kufiri me Shqipërinë.

Operacioni u zhvillua mëngjesin e sotëm, më 16 mars 2026, nga efektivët e Seksionit të Luftës kundër Narkotikëve pranë Nën-Drejtorisë për Hetimin dhe Zbulimin e Krimeve në Igumenicë.

Sipas njoftimit zyrtar të policisë, autoritetet arritën të parandalojnë shpërndarjen e një sasie të konsiderueshme narkotikësh, duke arrestuar drejtuesin e automjetit, ndaj të cilit është ngritur një dosje penale për transport dhe trafikim droge.

Ngjarja u zbulua gjatë kontrolleve të targetuara që policia po kryente në zonën e Sajadhës, në rajonin e Thesprotisë, shumë pranë kufirit me Shqipërinë. Gjatë kontrollit të një automjeti në pronësi të një kompanie që jep makina me qira, policia konstatoi se ai drejtohej nga një shtetas grek.

Burime policore dyshojnë se sasia e drogës mund të ketë hyrë më herët në territorin grek nga kufiri me Shqipërinë dhe se i arrestuari e kishte marrë në dorëzim për ta transportuar më tej drejt destinacionit të saj.

Gjatë kontrollit të detajuar të mjetit, në hapësirën e bagazhit dhe në sediljet e pasme u gjetën tre çanta udhëtimi. Brenda tyre policia zbuloi dhe sekuestroi gjithsej 55 pako me kanabis të papërpunuar, me peshë totale 60 kilogramë e 565 gramë.

I arrestuari pritet të dërgohet përpara Prokurorisë së Shkallës së Parë në Thesproti, ndërsa hetimet vijojnë për të zbuluar lidhjet e mundshme të rastit me rrjete të tjera të trafikut të drogës.

The post 18-vjeçari kapet në Sajadhë me rreth 60 kilogramë kanabis në një makinë me qira appeared first on Saranda News.

Një ngjarje e rëndë ka ndodhur në Korinth, ku një 17-vjeçar shqiptar ndërroi jetë pas një sherri me një të ri grek. Sipas mediave, shqiptari Aleks Vangjeli, është paraqitur në spital me plagë në zonën e barkut. Fillimisht ai deklaroi se ishte përplasur me makinë.

Ai u dërgua me ambulancë drejt Athinës, por fatkeqësisht nuk mundi t’i mbijetojë plagëve të marra.

Në të njëjtën kohë në një klinikë private në Korinth u paraqit edhe një 19-vjeçar grek, po ashtu i lënduar me thikë, ku po ashtu deklaroi se është përfshirë në një aksident.

Ende nuk dihen shkaqet e përleshjes mes ty të rinjve, por dyshohet se mes tyre ka pas sherr për motive të dobëta.

The post U godit me thikë gjatë një sherri, ndërron jetë 17-vjeçari shqiptar në Greqi appeared first on Saranda News.

Shkurti po regjistron një nga nivelet më të ulëta të këmbimit për euron dhe dollarin. Që nga viti 2022, monedha evropiane është zhvlerësuar me afro 25%, dhe me të njëjtin ritëm ka rënë edhe dollari amerikan. Në një treg ku një pjesë e madhe e ushqimeve vjen nga importi, kjo duhet të përkthehej në çmime më të ulëta për konsumatorin shqiptar. Por realiteti në arkë tregon një histori krejt tjetër.

Ekspertët paralajmërojnë se kostot e jetesës në Shqipëri janë tashmë më të larta se në disa vende të rajonit. Ka raste kur të njëjtat produkte, nga të njëjtat kompani, shiten 20–30% më lirë sapo kalon kufirin. Bëhet fjalë për produkte identike, jo për alternativa të ngjashme.

Por situata bëhet edhe më alarmante kur krahasimi bëhet me Greqinë.

Sot, pothuajse të gjitha ushqimet në Shqipëri kushtojnë më shtrenjtë se edhe në tregjet greke. Në zonën e Sarandës kjo është kthyer në realitet të përditshëm: shumë banorë po zgjedhin të kalojnë kufirin për të bërë pazar në Janinë apo Igoumenicë. Jo për luks, por për produkte bazë – vaj, qumësht, mish, detergjentë, fruta dhe perime, madje edhe ujë – që rezultojnë më të lira se në qytetin e tyre.

Është paradoksale që qytetarët shqiptarë të detyrohen të blejnë më lirë në një vend të Bashkimit Evropian sesa në tregun vendas, ndërkohë që valuta është zhvlerësuar ndjeshëm dhe teorikisht duhet të favorizojë importin.

Një pjesë e arsyes lidhet me sezonalitetin dhe mungesën e prodhimit vendas në këtë periudhë të vitit. Por kjo nuk shpjegon diferencat drastike të çmimeve. Kur produktet blihen më lirë jashtë dhe shiten ndjeshëm më shtrenjtë në Shqipëri, atëherë kemi të bëjmë me një diferencë që kërkon hetim serioz.

Inspektorët duhet të analizojnë faturat e importit: sa blihet produkti, sa kushton transporti, sa janë taksat dhe sa shtohet në raft. Pa këtë transparencë, qytetarët mbeten përballë një tregu që duket i pakontrolluar.

Shembulli i naftës është po aq domethënës. Me një dollar të zhvlerësuar rreth 20%, çmimi në lekë duhet të reflektonte këtë rënie. Por ulja reale nuk ndihet në xhepin e konsumatorit. E njëjta logjikë po shihet edhe tek ushqimet.

Nëse euro dhe dollari bien, por çmimet rriten, atëherë problemi nuk është tek kursi i këmbimit. Problemi është tek mënyra si funksionon tregu dhe tek mungesa e kontrollit efektiv.

Dhe kur qytetarët e Sarandës nisen drejt Janinës apo Igoumenicës për të mbushur makinën me produkte më të lira, kjo nuk është thjesht zgjedhje ekonomike. Është një alarm i hapur për ekonominë vendase dhe për standardin e jetesës në Shqipëri.

The post Euro bie, ushqimet më shtrenjtë se në Greqi, qytetarët detyrohen të blejnë në Janinë appeared first on Saranda News.

Kryetari i Bashkisë së Filatit, Vasili Tzigos, ndërroi jetë këtë mëngjes në moshën 69-vjeçare.

Sipas informacioneve zyrtare, ai ka ndërruar jetë në Spitalin Popullor të Athinës, ku ishte i shtruar prej disa ditësh për shkak të problemeve shëndetësore.

Vasili Tzigos njihej jo vetëm si një drejtues lokal me përvojë, por edhe si një mik i shqiptarëve, duke ruajtur marrëdhënie të afërta dhe respekt të veçantë për banorët e zonës së Sarandës që jetonin në Filat dhe rrethinat e tij. Gjatë viteve të drejtimit të tij, ai kishte ndërtuar ura bashkëpunimi dhe mirëkuptimi me komunitetin shqiptar, duke u vlerësuar për qasjen e tij njerëzore dhe bashkëpunuese.

Funerali i tij do të mbahet në Filat, qyteti ku ai shërbeu si kryetar bashkie deri në ditët e fundit të jetës së tij, ndërsa varrimi do të zhvillohet në fshatin Povla, vendlindjen e tij.

Në orët në vijim pritet një njoftim zyrtar nga Bashkia e Filatit, ku do të jepen detaje mbi datën dhe orën e ceremonisë mortore, si dhe procedurat që do të ndiqen për zëvendësimin e drejtimit të Bashkisë.

The post Ndërron jetë kryetari i Bashkisë së Filatit Vasili Tzigos appeared first on Saranda News.

Një paketë e re ndryshimesh ligjore pritet të transformojë mënyrën se si Greqia menaxhon migracionin e ligjshëm. Ministria greke e Migracionit dhe Azilit ka hartuar një projektligj të ri, i cili synon të zgjidhë vonesat kronike në dhënien dhe rinovimin e lejeve të qëndrimit, të reduktojë barrën burokratike dhe njëkohësisht të përgjigjet ndaj mungesës së fuqisë punëtore në sektorë kyç të ekonomisë, raportojnë mediat greke.

Projektligji pritet të depozitohet së shpejti në komisionin përkatës të Parlamentit dhe vjen në një moment kur migracioni po rikthehet fuqishëm në qendër të debatit publik, si në Greqi ashtu edhe në nivel evropian.

Qeveria greke thekson se reforma synon një ndarje të prerë mes migracionit të ligjshëm dhe atij të paligjshëm. Sipas ministrit të Migracionit dhe Azilit, Thanos Plevris, projektligji i ri synon t’i japë fund zvarritjeve shumëvjeçare dhe bllokimeve administrative që kanë krijuar pasiguri si për emigrantët, ashtu edhe për bizneset.

Mijëra leje qëndrimi në pritje, zgjidhje brenda dy viteve

Aktualisht, në Greqi jetojnë rreth 793 mijë emigrantë me status të ligjshëm, ndërsa rreth 293 mijë aplikime për leje qëndrimi mbeten ende të pashqyrtuara. Këto vonesa kanë prodhuar pasoja serioze, pasi në shumë raste lejet lëshohen pasi afati i tyre ka skaduar, duke krijuar probleme në punësim, sigurime dhe integrim shoqëror.

Me hyrjen në fuqi të rregullimeve të reja, autoritetet greke presin që rreth 90 mijë leje të zhbllokohen menjëherë, ndërsa brenda një periudhe dyvjeçare të normalizohet edhe pjesa tjetër e dosjeve të prapambetura.

Çfarë parashikon konkretisht projektligji

Një nga risitë kryesore është rinovimi automatik i lejeve të qëndrimit për kategori të caktuara, veçanërisht në rastet kur emigranti vazhdon të punojë te i njëjti punëdhënës. Kjo do të shmangë dorëzimin e përsëritur të dokumentacionit dhe do të ulë ndjeshëm ngarkesën administrative.

Po ashtu, çdo leje e re qëndrimi do të ketë kohëzgjatje minimale dyvjeçare, në mënyrë që vonesat institucionale të mos penalizojnë vetë emigrantin dhe të mos çojnë në humbje formale të statusit të ligjshëm.

Projektligji hap një tjetër derë për emigrantët që kanë jetuar ligjërisht në Greqi për më shumë se pesë vite, por që në të kaluarën janë refuzuar për arsye thjesht procedurale. Këta persona do të kenë të drejtë të riaplikojnë dhe, pas korrigjimit të mangësive formale, të pajisen me leje qëndrimi, duke siguruar integrimin e tyre të plotë në shoqërinë greke.

Në aspektin administrativ, parashikohet forcimi i strukturave të decentralizuara që shqyrtojnë aplikimet, si dhe transferimi i dosjeve mes rajoneve për të shmangur mbingarkesën dhe për të përshpejtuar vendimmarrjen.

Një rregullim i veçantë i dedikohet emigrantëve mbi 65 vjeç, kryesisht të brezit të parë, të cilët kanë jetuar dhe punuar ligjërisht në Greqi për të paktën 20 vite. Ata do të mund të qëndrojnë në vend pa detyrim për të punuar, me kusht që të kenë sigurim privat shëndetësor dhe pension, pa ngarkuar sistemin publik të sigurimeve shoqërore.

Procedura më të shpejta për thirrjen e punëtorëve nga vendet e treta

Projektligji parashikon edhe ndryshime thelbësore në mekanizmin e thirrjes së punëtorëve nga vendet e treta, me qëllim mbulimin më të shpejtë të vendeve të lira të punës. Procedurat do të thjeshtohen dhe kompanitë e punësimit të përkohshëm do të kenë mundësi të realizojnë thirrje në emër të bizneseve që kanë nevoja urgjente për staf.

Vëmendje e veçantë i kushtohet projekteve të mëdha, ku parashikohet mundësia e thirrjes së menjëhershme të deri në 500 punëtorëve, ndërsa procedurat konsullore pritet të përshpejtohen ndjeshëm.

Një tjetër risi e rëndësishme është mundësia e ndryshimit të punëdhënësit për punëtorët që hyjnë në Greqi përmes thirrjes zyrtare, pa humbur statusin e qëndrimit të ligjshëm. Kjo masë synon të rrisë lëvizshmërinë në tregun e punës dhe të kufizojë rastet e varësisë apo shfrytëzimit.

Paralelisht, Greqia forcon marrëveshjet dypalëshe me vende si Filipinet, Armenia dhe Egjipti, veçanërisht në sektorë si bujqësia, duke i kushtëzuar ato me bashkëpunimin në luftën kundër migracionit të paligjshëm.

“Rruga e ligjshme po riformësohet”

Sipas ministrit Plevris, reforma synon të ndërtojë një sistem më funksional të migracionit të ligjshëm, që mbështet ekonominë, garanton siguri juridike për emigrantët dhe mban një qëndrim të fortë ndaj migracionit të paligjshëm.

“Ne po çlirojmë dhe përshpejtojmë procedurat për lejet e qëndrimit dhe punës, duke i bërë ato më të thjeshta dhe më efikase. Greqia mbetet e rreptë ndaj migracionit të paligjshëm, por po riformëson rrugën e ligjshme për ata që duan të punojnë dhe të kontribuojnë në sektorë si bujqësia, ndërtimi dhe turizmi”, thekson ai.

The post Projektligji i ri për emigracionin në Greqi ndryshon jetën e mijëra familjeve emigrante appeared first on Saranda News.