Ngjarja e rëndë e ndodhur në ambientet e Komisariatit të Policisë Sarandë ka sjellë masat e para ndaj punonjësve të policisë, ndërsa Agjencia e Mbikëqyrjes Policore ka nisur hetimet për zbardhjen e plotë të incidentit. Me situatën është njohur edhe drejtuesi i Policisë, Skënder Hitaj, ndërsa është marrë vendimi për pezullimin nga detyra të tre punonjësve të patrullës: Armando Bizhga, Dhimitër Gugu dhe Leons Cani.

Sipas hetimeve të AMP-së, ngjarja ka nisur gjatë orëve të mesnatës, pas një konflikti fizik mes personave që mbaheshin në dhomat e shoqërimit të Komisariatit të Sarandës. Në situatë janë përfshirë më pas edhe tre punonjësit e policisë, të cilët kanë ndërhyrë në ambientet ku ndodheshin të shoqëruarit.

Nga të dhënat e deritanishme të hetimit mësohet se situata ka dalë jashtë kontrollit, ndërsa një prej punonjësve të policisë është mbajtur nga personat që ndodheshin në ambientet e shoqërimit për disa orë.

Tre punonjësit e policisë janë pezulluar nga detyra për veprime të dyshuara arbitrare, të cilat dyshohet se bien në kundërshtim me detyrën e tyre.

Situata është normalizuar vetëm pas ndërhyrjes së Forcave të Ndërhyrjes së Shpejtë të Fierit, të cilat kanë mbërritur në ambientet e Komisariatit të Sarandës. Punonjësi i policisë që ishte mbajtur nga personat e shoqëruar është liruar në orët e para të mëngjesit.

Ngjarja ishte denoncuar fillimisht publikisht nga avokati Arben Llangozi, i cili ngriti akuza të tjera të rënda lidhur me rrethanat që çuan në incident.

Paralelisht me pezullimin e tre efektivëve, AMP Vlorë po vijon hetimet për të rindërtuar dinamikën e plotë të ngjarjes dhe për të përcaktuar përgjegjësitë individuale.

Në fokus të hetimeve është mënyra se si u krijua dhe u përshkallëzua një situatë e tillë brenda ambienteve të Komisariatit të Policisë Sarandë, veprimet e punonjësve të policisë gjatë ndërhyrjes, si dhe nëse ka persona të tjerë që mbajnë përgjegjësi për incidentin.

The post Të arrestuarit marrin peng policin në Sarandë, AMP nis hetimet – pezullohen 3 punonjës appeared first on Saranda News.

Avokati Arben Llangozi ka publikuar në rrjetet sociale një denoncim me pretendime të rënda për një ngjarje që, sipas tij, ka ndodhur gjatë natës në ambientet e Komisariatit të Policisë Sarandë.

Deri në momentin e publikimit të këtij shkrimi, nuk ka një reagim zyrtar nga Policia e Shtetit që të konfirmojë ose të përgënjeshtrojë nëse ngjarja e përshkruar nga Llangozi ka ndodhur. Për këtë arsye, pretendimet e mëposhtme mbeten të pakonfirmuara zyrtarisht.

Sipas denoncimit të bërë publik nga avokati, disa persona të arrestuar dyshohet se kanë dalë nga ambientet e izolimit dhe kanë marrë nën kontroll një punonjës policie, të cilin pretendohet se e kanë futur në ambientet ku mbaheshin të ndaluarit dhe e kanë mbajtur aty për disa orë.

Llangozi pretendon se situata ka qenë aq serioze sa është kërkuar ndërhyrja e forcave të FNSH-së nga Fieri. Sipas tij, pas disa orësh tensioni dhe negociatash, punonjësi i policisë është liruar rreth orës 07:30 të mëngjesit.

Por denoncimi shkon më tej. Duke iu referuar informacioneve që thotë se vijnë nga burime brenda strukturave policore, avokati pretendon se dera e ambienteve të izolimit nuk është lënë e hapur si pasojë e një gabimi, por qëllimisht.

Në statusin e tij publik, Llangozi drejton akuza konkrete ndaj shefit të Komisariatit të Policisë Sarandë, Feliks Hodaj. Sipas pretendimit të avokatit, lënia hapur e derës do të kishte si qëllim krijimin e mundësisë për arratisjen e një prej të arrestuarve. Ai ngre gjithashtu pretendimin se pas këtij veprimi mund të ketë pasur një marrëveshje korruptive.

Këto janë akuza shumë të rënda, të ngritura publikisht nga Llangozi, por për të cilat deri tani nuk është bërë publik ndonjë qëndrim apo provë nga institucionet kompetente që t’i vërtetojë.

Avokati pretendon gjithashtu se pas incidentit po bëhen përpjekje për të minimizuar ngjarjen dhe për ta mbajtur atë larg vëmendjes së publikut. Ai ngre dyshime edhe për një tentativë të mundshme për fshehjen, mosdokumentimin apo manipulimin e provave dhe informacioneve që lidhen me atë që pretendohet se ka ndodhur brenda komisariatit.

Në përfundim të denoncimit, Llangozi kërkon që Feliks Hodaj të pezullohet nga detyra deri në zbardhjen e plotë të çështjes.

Për momentin, versioni i publikuar nga avokati Arben Llangozi mbetet një denoncim publik dhe jo një ngjarje e konfirmuar zyrtarisht. Mungesa e një reagimi nga Policia lë të hapura pikëpyetje të rëndësishme: nëse ka ndodhur një incident gjatë natës në ambientet e Komisariatit të Sarandës, nëse është kërkuar ndërhyrja e FNSH-së dhe cilat kanë qenë rrethanat konkrete.

Një reagim zyrtar i Policisë së Shtetit do të ishte i nevojshëm për të sqaruar nëse pretendimet e bëra publike qëndrojnë dhe nëse ka nisur ndonjë verifikim apo hetim për rastin. Saranda Web

Të arrestuarit marrin peng policin në Sarandë, AMP nis hetimet – pezullohen 3 punonjës

The post Denoncimi tronditës: Të arrestuarit morën peng efektivin brenda Komisariatit të Sarandës appeared first on Saranda News.

Pas një seance maratonë, Gjykata e Sarandës ka vlerësuar masat e sigurisë për 20 personat e arrestuar në kuadër të operacionit të koduar “Vjeshta”, të dyshuar për përfshirje në shpërndarjen e lëndëve narkotike në Sarandë dhe Ksamil.

Prokurorja e çështjes, Esmeranda Basho, kërkoi caktimin e masës së sigurisë “arrest në burg” për të 20 të arrestuarit. Pas shqyrtimit të kërkesave dhe pretendimeve të palëve, gjyqtari Mexhit Doci vendosi të lërë në fuqi këtë masë për 15 prej tyre, ndërsa për pesë të tjerë caktoi “arrest në shtëpi”.

Në “arrest me burg” janë lënë: Arlind Osmani, Feliks Filja, Altin Arapi, Erjon Dido, Medi Myftaraj, Redian Arizi, Dhimitri Terolli, Fabjo Berhamaj, Klerjan Popshini, Devis Saliaj, Xhuliano Mejdi, Vasil Kaci, Shefqet Bezhani, Nazif Refitaj dhe Korado Omeri.

Ndërkohë, Gjykata ka caktuar masën e sigurisë “arrest në shtëpi” për Andrea Babi, Bledar Kovaci, Elvis Demcaj, Nikolin Rakipi dhe Flatun Lalaj.

Agjent i infiltruar në hetim

Sipas burimeve nga seanca gjyqësore, një pjesë e rëndësishme e materialit të paraqitur nga organi i akuzës lidhet me veprimet simuluese të kryera nga një agjent i infiltruar.

Për të arrestuarit rezultojnë të jenë dokumentuar veprime simuluese, gjatë të cilave agjenti ka arritur të blejë lëndë të dyshuara narkotike. Burimet bëjnë të ditur se këto veprime janë shoqëruar edhe me dokumentim fotografik, i administruar si pjesë e materialeve të hetimit.

Operacioni “Vjeshta” lidhet me hetimet për një aktivitet të dyshuar të shpërndarjes së lëndëve narkotike, kryesisht në Sarandë dhe Ksamil, përfshirë zona të frekuentuara nga turistët.

Vendimi i sotëm i Gjykatës lidhet me masat e sigurisë dhe jo me përcaktimin përfundimtar të fajësisë së personave nën hetim. Hetimet për çështjen vijojnë. Saranda Web 

The post U arrestuan si shpërndarës, Gjykata lë 15 persona në burg dhe 5 në “arrest shtëpie” appeared first on Saranda News.

Një operacion i gjerë policor është zhvilluar në Sarandë pas një hetimi dymujor për shpërndarjen e lëndëve narkotike dhe armëmbajtjen pa leje. Operacioni i koduar “Vjeshta” ka përfunduar me ndalimin e 20 personave, ndërsa janë sekuestruar dy armë zjarri, kokainë, kanabis, automjete, telefona celularë dhe para.

Sipas të dhënave të bëra publike nga Policia, hetimi është zhvilluar nga Komisariati i Policisë Sarandë në bashkëpunim me Prokurorinë e Sarandës dhe nën drejtimin e prokurores Esmeranda Basho.

Gjykata kishte caktuar masën e sigurisë “arrest në burg” për 20 personat e ndaluar: A. O., 25 vjeç; F. F., 27 vjeç; M. M., 35 vjeç; K. P., 27 vjeç; R. A., 33 vjeç; N. R., 32 vjeç; A. A. (D), 48 vjeç; E. D., 41 vjeç; Dh. T., 33 vjeç; Xh. M., 27 vjeç; V. K., 23 vjeç; F. L., 54 vjeç; B. K., 26 vjeç; Sh. B., 20 vjeç; A. B., 20 vjeç; N. R., 24 vjeç; E. D., 30 vjeç; D. S., 22 vjeç; K. O., 28 vjeç dhe F. B., 30 vjeç. Sipas Policisë, njëri prej tyre banon në Ksamil, ndërsa të tjerët në Sarandë.

Dy pistoleta, drogë, makina dhe 19 celularë të sekuestruar

Gjatë kontrolleve të kryera me vendim gjykate, policia thotë se shtetasve D. S. dhe Sh. B. iu gjet nga një armë zjarri pistoletë. Armët janë sekuestruar dhe pritet t’u nënshtrohen ekzaminimeve në Institutin e Policisë Shkencore.

Gjithashtu janë sekuestruar kokainë dhe kanabis të ndara në dhjetëra doza, që sipas hetuesve dyshohet se ishin përgatitur për shitje, si dhe 4 automjete, 19 telefona celularë dhe një shumë parash në lekë dhe euro.

Në kuadër të të njëjtit operacion është proceduar në gjendje të lirë edhe E. N., 36 vjeç, nga Lushnja, pasi dyshohet se kundërshtoi punonjësit e Policisë gjatë kontrollit në një dhomë hoteli. Pikërisht në këtë ambient u kap Sh. B., të cilit, sipas Policisë, iu gjet një nga pistoletat.

Hetimi kishte nisur dy muaj më parë

Operacioni i sotëm lidhet me një procedim të nisur më herët. Më 31 korrik 2026, në kuadër të të njëjtit hetim, ishin arrestuar në flagrancë A. N., A. C. dhe K. J., ndërsa u sekuestruan rreth 5 kilogramë kanabis, që sipas hetuesve synohej të shpërndahej në Sarandë dhe Ksamil.

Policia pretendon se nga hetimet e deritanishme ka rezultuar se personat nën hetim merreshin me shitjen e lëndëve narkotike në zonën e Sarandës, kryesisht në plazhe, lokale nate dhe në afërsi të shkollave.

Në operacion u angazhuan, krahas strukturave të Policisë së Sarandës, edhe Forca e Posaçme Operacionale, Forca Kombëtare e Sigurisë dhe struktura policore nga Fieri, Tirana, Elbasani dhe Gjirokastra.

Hetimet vijojnë nën drejtimin e Prokurorisë së Sarandës për të përcaktuar përgjegjësinë individuale të personave të përfshirë dhe për të identifikuar persona të tjerë që mund të kenë lidhje me veprimtarinë e dyshuar kriminale. Saranda Web

The post Operacioni “Vjeshta” në Sarandë, 20 të ndaluar për drogë dhe armë – VIDEO appeared first on Saranda News.

Një konflikt për motive të dobëta në fshatin Bunec ka përfunduar me të shtëna me armë zjarri dhe arrestimin e një 53-vjeçari.

Sipas Policisë, pas marrjes së njoftimit për të shtëna në zonë, shërbimet e Komisariatit të Policisë Himarë, në bashkëpunim me Forcën e Posaçme “Shqiponja” të DVP Tiranë, janë angazhuar për identifikimin dhe kapjen e autorit.

Në përfundim të veprimeve u arrestua në flagrancë F. L., 53 vjeç, banues në Bunec.

Nga hetimet paraprake dyshohet se 53-vjeçari, pas një konflikti për motive të dobëta me shtetasin M. D., ka nxjerrë një pistoletë dhe ka qëlluar në ajër. Nga ngjarja nuk raportohen persona të lënduar.

Policia sekuestroi pistoletën dhe municion luftarak.

Materialet i janë referuar Prokurorisë së Vlorës, ndërsa ndaj 53-vjeçarit rëndojnë akuzat për mbajtje pa leje të armëve dhe municionit, kanosje dhe prishje të qetësisë publike. Saranda Web 

The post Konflikti në Bunec, 53-vjeçari qëllon me pistoletë në ajër. Arrestohet nga policia appeared first on Saranda News.

Një 47-vjeçar është arrestuar në Sarandë, pasi dyshohet se po përgatiste një sipërfaqe pranë plazhit në lagjen nr. 4, për ndërtimin e një objekti pa leje.

Sipas Policisë, në zonë ishte sheshuar një sipërfaqe toke dhe ishin vendosur materiale ndërtimore. Nga verifikimet e kryera, dyshohet se punimet po bëheshin nga shtetasi A. R., 47 vjeç, banues në Tiranë, me qëllim ndërtimin e një objekti për aktivitet fitimprurës.

Në vijim të ndërhyrjes, policia hoqi dhe sekuestroi edhe 48 shezlongë dhe çadra të vendosura në hapësirën e plazhit, e cila, sipas njoftimit zyrtar, administrohej nga 47-vjeçari pa leje.

Rasti ka sjellë pasoja edhe brenda strukturave të Policisë së Sarandës. Specialisti i Policimit në Zonë, A. N., është pezulluar nga detyra dhe ndaj tij ka nisur procedim disiplinor. Sipas Policisë, masa është marrë pasi efektivi nuk kishte konstatuar paligjshmërinë në zonën që mbulonte.

Materialet për 47-vjeçarin i janë referuar Prokurorisë për veprime të mëtejshme, ndërsa procedura disiplinore ndaj efektivit vijon. Saranda Web

The post Punime pa leje pranë plazhit, arrestohet 47-vjeçari në Sarandë. Pezullohet edhe polici appeared first on Saranda News.

Fatmirësisht, drejtuesi i motoçikletës ka pësuar vetëm lëndime të lehta, ndërsa drejtuesi i automjetit nuk ka pësuar lëndime.

Në vendngjarje ka mbërritur Policia, e cila po kryen veprimet përkatëse për të përcaktuar rrethanat dhe shkaqet e aksidentit. Saranda Web

The post Aksident në Ksamil, të përfshirë një automjet dhe një motoçikletë appeared first on Saranda News.

Ministri i Punëve të Brendshme, Besfort Lamallari, u ka kërkuar drejtuesve vendorë të Policisë së Shtetit dhe strukturave të Policisë Kufitare që marrëdhënia me qytetarët të bazohet te korrektësia, profesionalizmi dhe reagimi në kohë.

Gjatë një takimi me drejtuesit e strukturave policore, ku ishte i pranishëm edhe drejtori i Përgjithshëm i Policisë së Shtetit, Skënder Hita, ministri theksoi se respektimi i etikës nuk duhet parë si një standard i mjaftueshëm, por si niveli minimal që kërkohet nga çdo punonjës policie.

“Etika është minimumi. Shërbimi cilësor, i shpejtë dhe konform ligjit është ajo çfarë presin dhe meritojnë qytetarët”, deklaroi Lamallari.

Sipas tij, besimi i publikut te Policia nuk krijohet vetëm përmes rezultateve të operacioneve apo statistikave, por edhe nga mënyra se si efektivët sillen dhe komunikojnë me qytetarët në përditshmëri.

Lamallari kërkoi që ankesat, shqetësimet dhe kërkesat për informacion të mos mbeten pa përgjigje apo të trajtohen me vonesë. Drejtuesve vendorë iu kërkua të garantojnë që strukturat në varësi të tyre të reagojnë shpejt, në mënyrë profesionale dhe në përputhje me ligjin.

Një tjetër pikë ku ministri u ndal ishte komunikimi me publikun. Sipas tij, çdo kontakt i një qytetari me Policinë, qoftë për një denoncim, ankesë apo kërkesë informacioni, ndikon drejtpërdrejt në perceptimin që publiku krijon për institucionin.

Mesazhi për drejtuesit ishte që këto kërkesa të mos mbeten vetëm në nivel porosish, por të reflektohen në punën e përditshme të komisariateve, strukturave vendore dhe Policisë Kufitare. Saranda Web

The post Lamallari mbledh drejtuesit e Policisë: Ndaj qytetarëve të reagoni me etikë dhe konform ligjit appeared first on Saranda News.

Një 46-vjeçar është dhunuar nga disa persona te porta e shembur e Kakomesë, ndërsa sipas dëshmisë së tij ishte duke filmuar me telefon në zonë.

Gentian Papagjika ka deklaruar se disa të rinj, të cilët po lëviznin me automjet në drejtim të plazhit të Kakomesë, kanë ndaluar pranë tij dhe i kanë kërkuar shpjegime se përse po filmonte.

“Pse filmon?”, mësohet t’i kenë thënë 46-vjeçarit, ndërsa sipas dëshmisë së tij më pas kanë nisur fyerjet dhe kërcënimet. Situata është përshkallëzuar në përplasje fizike, gjatë së cilës Papagjika ka pësuar dëmtime dhe fraktura në trup.

Pas ngjarjes, ai është dërguar fillimisht në Sarandë për ndihmë mjekësore. Për shkak të dëmtimeve të pësuara, më pas është transportuar drejt Janinës, ku po merr trajtim më të specializuar.

Gentian Papagjika njihet edhe si një prej personave që ka qenë aktiv gjatë protestave të zhvilluara lidhur me shembjen e portës së Kakomesë.

Deri në këto momente, nuk ka një reagim zyrtar nga ana e Policisë. Saranda Web

The post Po filmonte te porta e shembur e Kakomesë, dhunohet 46-vjeçari appeared first on Saranda News.

Arma e krimit është gjetur e hedhur mes ferrave në rrugën pranë qendrës shëndetësore në Ksamil. Thika pritet t’i nënshtrohet ekspertizës për të përcaktuar nëse është pikërisht arma me të cilën u godit për vdekje i riu portugez. Për vrasjen dyshohet Sokrat Vata, i cili pas ngjarjes tentoi të largohej, ndërsa sipas hetimeve është ndihmuar nga dy shtetas turq. Hetuesit dyshojnë se gjatë largimit është tentuar të fshihet edhe arma e krimit.

Dëshmia e DJ-së çoi hetuesit te vendi ku u gjet thika

Një element i rëndësishëm në gjetjen e armës së dyshuar është dëshmia e një prej DJ-ve që performonte mbrëmjen e 18 gushtit në klubin e natës të “Principotes”.

Pas përleshjes, Sokrat Vata, i mbuluar me gjak, i kishte kërkuar DJ-së që ta transportonte drejt Qendrës Shëndetësore të Ksamilit. Gjatë rrugës, Vata ka zbritur nga automjeti në një rrugë me kalldrëm.

DJ ka dëshmuar se, disa metra larg makinës, e kishte parë Vatën të hidhte me forcë diçka. Pikërisht në zonën ku dëshmitari kishte lënë 29-vjeçarin, hetuesit kanë gjetur edhe thikën që tashmë është sekuestruar si arma e dyshuar e krimit.

Shokët e viktimës: Vata kishte thikën në dorë

Dyshimet se Sokrat Vata mbante një thikë gjatë përleshjes mbështeten edhe nga dëshmitë e shokëve të Luis Miguel Varela Mendes. Tre prej tyre kanë përshkruar para hetuesve momentet e konfliktit dhe kanë identifikuar Vatën si personin që mbante thikën.

Adib Ghanmi ka deklaruar se fillimisht Vata goditi me thikë në këmbë shokun e tyre Tourpal Khitaev dhe më pas iu drejtua Luis Miguelit.

“Më pas erdhi një person, i veshur me rroba të bardha, me flokë të gjata, i cili mbante një thikë në dorë dhe fillimisht ka goditur një shokun tim të quajtur Tourpal me thikë në këmbë dhe më pas ka goditur edhe shokun tjetër, i cili u vra me thikë në zemër”, ka dëshmuar Ghanmi.

Edhe Tourpal Khitaev, i cili mbeti i plagosur gjatë përplasjes, ka deklaruar se personi që e sulmoi mbante një thikë.

“Njëri prej tyre, i veshur me rroba të bardha të shkurtra, me pak mjekër, flokë gështenjë, më tërheq nga krahu. Ai kishte thikën në dorë dhe më goditi mua në këmbë”, ka dëshmuar Khitaev.

Ndërkohë, Ibrahim Leimoeiv ka treguar se ka parë një person me thikë t’i drejtohej fillimisht Tourpalit dhe më pas Luis Miguelit. Ai ka sqaruar se, për shkak të përleshjes dhe numrit të madh të personave të përfshirë, nuk ka arritur të shohë momentin e goditjes fatale.

Përplasja zgjati vetëm 6 minuta

Nga rindërtimi i dinamikës përmes pamjeve të kamerave të sigurisë rezulton se e gjithë përplasja ka zgjatur rreth 6 minuta dhe është zhvilluar jashtë ambienteve të “Principotes”, në zonën e plazhit.

Në konfliktin me grupin e turistëve u përfshinë Sokrat Vata dhe David Heurtevent, ky i fundit ende në kërkim. Vata dyshohet si personi që përdori thikën, ndërsa Heurtevent, shqiptar me nënshtetësi britanike, dyshohet se ka goditur me grushte turistët.

Në përleshje u përfshinë gjithashtu kamerierët Ildi Cekani, Serxhi Selimi, Murat Zhabina dhe Ervis Bunci, si dhe truprojat Luciano Seferi, Moisid Matushaj, Romeo Shehu dhe Kristi Kosho.

Sipas të dhënave të hetimit, tre prej truprojave, Luciano Seferi, Moisid Matushaj dhe Romeo Shehu, punonin respektivisht në strukturat e Policisë së Shtetit, Policisë së Burgjeve dhe Policisë Bashkiake dhe ishin të dypunësuar pa leje.

Në lokal në momentin kur ndodhi ngjarja ndodhej edhe pronari i “Principotes”, Bekim Bulica. Pas ngjarjes ai është larguar dhe aktualisht rezulton në kërkim.

Gjykata ka vendosur masën “arrest me burg” për Sokrat Vatën, nën dyshimet për vrasje me dashje.

Masa e arrestit me burg është vendosur edhe për pesë persona të tjerë të përfshirë në çështje, dy shtetasit turq dhe tre kamerierë, ndërsa për pesë truproja është caktuar masa “detyrim paraqitje”.

Gjetja e thikës përbën një element të ri në dosjen hetimore, por mbetet ekspertiza ajo që do të përcaktojë nëse arma e sekuestruar është pikërisht ajo me të cilën u godit për vdekje Luis Miguel Varela Mendes mbrëmjen e 18 gushtit në Ksamil. Saranda Web

The post Vrasja në Ksamil – Gjendet thika e krimit, DJ pa Sokrat Vatën duke hedhur diçka appeared first on Saranda News.