Janë publikuar pamje të shkëputura nga kamerat e sigurisë që tregojnë një nga personat e dyshuar për vrasjen e 44-vjeçarit Artan Myrtaj, më 20 shtator në Sarandë. Në pamje, personi mban skafandër, xhup jeshil dhe pantallona të zeza. Ai shfaqet me dy armë në duar.

Sipas të dhënave të raportuara nga hetimi, i dyshuari ka qëlluar fillimisht me një pistoletë me silenciator. Pasi arma është bllokuar, ai dyshohet se ka përdorur pistoletën tjetër. Identiteti i tij ende nuk është bërë publik.

Hetuesit po verifikojnë lëvizjet e dy personave të dyshuar pas atentatit. Sipas të njëjtave të dhëna, ata janë larguar në drejtim të Konispolit, ndërsa po shqyrtohet edhe mundësia që të kenë kaluar ilegalisht në Greqi. Deri tani janë marrë në pyetje mbi 30 persona, por të dyshuarit nuk janë kapur.

VIDEO e atentatit (KUJDES: Pamjet janë të rënda)

Artan Myrtaj u vra paraditen e së dielës në zonën e ish-Agjencisë, në qendër të Sarandës. Nga të shtënat u plagos edhe një kalimtar 73-vjeçar.

Pas ngjarjes, Policia ngriti një grup të posaçëm hetimor. Ndërkohë, në drejtimin e Komisariatit të Sarandës është emëruar Saimir Shkambaj, ndërsa Feliks Hoda është transferuar në Dibër. Saranda Web

The post Publikohen pamje nga atentati në Sarandë, autori përdori dy pistoleta – VIDEO appeared first on Saranda News.

Një aksident rrugor është regjistruar sot në hyrje të Sarandës, në segmentin ndërmjet Urës së Gajdarit dhe fshatit Metoq.

Në aksident janë përfshirë dy automjete, të cilat kanë pësuar dëmtime materiale. Fatmirësisht, nga përplasja nuk raportohet për persona të lënduar.

Ngjarja ka ndodhur në një ditë kur në zonën e Sarandës janë rikthyer reshjet e para të shiut pas një periudhe të gjatë pa reshje. Asfalti i lagësht kërkon kujdes të shtuar nga drejtuesit e automjeteve, veçanërisht në segmentet me kthesa.

Rrethanat e aksidentit mbeten për t’u sqaruar.

The post Aksident në hyrje të Sarandës, përplasen dy automjete në segmentin Ura e Gajdarit–Metoq appeared first on Saranda News.

Një banesë në fshatin Shelegar, në Sarandë, ka rënë pre e grabitjes gjatë natës së të dielës, ndërsa familjarët ndodheshin në një dasmë.

Sipas informacioneve paraprake, autorët kanë hyrë në banesën e Mejdi Tushës në kohën kur në Vidhetshtëpi nuk ndodhej askush. Ngjarja është konstatuar nga një pjesëtar i familjes, i cili pas kthimit ka gjetur dhomat të kontrolluara dhe sendet të shpërndara.

Burime pranë familjes bëjnë me dije se janë vjedhur rreth 15 milionë lekë të vjetra (1.5 milionë lekë), si dhe bizhuteri me vlerë.

Dyshohet se në grabitje kanë marrë pjesë dy persona, të cilët mund të kenë vëzhguar më parë lëvizjet e familjes. Para se të hynin në banesë, autorët dyshohet se kanë dëmtuar edhe kamerën e sigurisë.

Pas denoncimit, Policia e Sarandës dhe grupi hetimor kanë kryer këqyrjen e vendngjarjes dhe mbledhjen e provave. Hetimet vijojnë për identifikimin dhe kapjen e autorëve, si dhe për sqarimin e plotë të rrethanave të grabitjes. Saranda Web

The post Vidhet një banesë gjatë natës: familjarët në dasmë, hajdutët rrëmbejnë 15 milionë lekë appeared first on Saranda News.

Feliks Hoda, i cili drejtonte Komisariatin e Sarandës prej rreth tre muajsh, transferohet në të njëjtën detyrë në Dibër. Ndërkohë, Andi Kano, deri tani shef i Hetimit të Krimeve në Tropojë, komandohet në drejtimin e komisariatit atje.

Saimir Shkambaj ka shërbyer fillimisht si specialist për krimet në Drejtorinë e Policisë Tiranë. Në vitin 2019 u emërua shef i Seksionit të Operacioneve Speciale në këtë drejtori. Më pas mori drejtimin e Komisariatit të Tropojës, ndërsa tani është emëruar shef i Komisariatit të Sarandës.

Ndryshimi në Sarandë vjen pak ditë pas atentatit në qendër të qytetit, ku u vra 44-vjeçari Artan Myrtaj.

Për këtë ngjarje, Policia e Shtetit kishte zhvilluar edhe një analizë me strukturat vendore. Dy ditë më parë ministri i brendshëm kishte kërkuar shkrirjen e zinxhirit komandues të Komisariatit të Policisë Sarandë.  Saranda Web

The post Saimir Shkambaj merr drejtimin e Komisariatit të Sarandës, Feliks Hoda transferohet në Dibër appeared first on Saranda News.

Vrasja e Artan Myrtajt në qendër të Sarandës ka vënë në lëvizje strukturat më të larta të Ministrisë së Brendshme dhe Policisë së Shtetit.

Ministri i ri i Brendshëm, Ervin Demo, ka zhvilluar një takim me drejtuesit e policisë në qarqe, ku në qendër të diskutimeve ka qenë atentati i ndodhur një ditë më parë në Sarandë.

Mësohet se Demo ka mbajtur një qëndrim të ashpër ndaj drejtuesve të policisë, ndërsa ka urdhëruar shkrirjen e të gjithë zinxhirit drejtues të Sarandës.

Ministri ka kërkuar gjithashtu ngritjen e një Task-Force të posaçme, e cila, sipas të njëjtave burime, do të përbëhet nga dhjetë efektivë dhe specialistë. Grupi do të qëndrojë në Sarandë dhe do të angazhohet në hetimin e atentatit ndaj Myrtajt, si dhe të ngjarjeve të tjera kriminale të regjistruara në qytet.

Gjatë takimit, Demo i është drejtuar edhe drejtorit të Përgjithshëm të Policisë së Shtetit, Skënder Hita, duke kërkuar forcimin e sigurisë në shkolla dhe hartimin e një plani të detajuar për kontrollin e territorit.

Vendimet vijnë pas atentatit ku mbeti i vrarë 44-vjeçari Artan Myrtaj, ndërsa u plagos edhe një 73-vjeçar, kalimtar i rastit. Hetimet për identifikimin dhe kapjen e autorëve vijojnë.

The post Ministri kërkon shkrirjen e zinxhirit drejtues të Policisë në Sarandë dhe ngritjen e një Task-Force appeared first on Saranda News.

Policia me anë të një komunikate për shtyp thotë se ka zgjeruar kërkimet për identifikimin dhe kapjen e autorëve të vrasjes së 44-vjeçarit Artan Myrtaj, ngjarje e ndodhur paraditen e sotme në qendër të Sarandës. Nga të shtënat mbeti i plagosur edhe 73-vjeçari Xhevdet Skëndaj, i cili, sipas të dhënave paraprake, ishte kalimtar i rastit.

Në një komunikatë të shpërndarë pas ngjarjes, Policia bëri të ditur se kontrollet po zhvillohen në zona të ndryshme të Sarandës dhe Delvinës, përfshirë edhe vëzhgimin e territorit me dronë. Nuk janë dhënë ende të dhëna zyrtare për identitetin e autorëve apo drejtimin që ata mund të kenë marrë pas sulmit.

Ndërkohë, grupi hetimor, nën drejtimin e Prokurorisë, po administron pamjet filmike, dëshmitë dhe provat e tjera që mund të ndihmojnë në rindërtimin e ngjarjes dhe identifikimin e personave të përfshirë.

Pas vrasjes, Drejtori i Përgjithshëm i Policisë së Shtetit, Skender Hita, zhvilloi një analizë me strukturat e Komisariatit të Policisë Sarandë. Sipas njoftimit të Policisë, Hita kërkoi hetime të shpejta dhe një analizë të situatës kriminale në zonë, duke përfshirë konfliktet e evidentuara, personat me precedentë penalë dhe individët e dyshuar për veprimtari kriminale.

Drejtori i Përgjithshëm kërkoi gjithashtu rezultate për zbardhjen e ngjarjes së sotme, por edhe për dosje të vjetra kriminale që vijojnë të mbeten pa autor.

Në deklaratën e përcjellë nga Policia, Hita tha se, me përfundimin e sezonit turistik, puna do të përqendrohet te hetimi i krimeve të rënda dhe veprimtaria e grupeve kriminale në qytet. Ai njoftoi edhe mundësinë e shtimit të burimeve njerëzore, logjistikës dhe ngritjes së strukturave të specializuara.

Megjithatë, deri në këtë fazë, Policia nuk ka raportuar persona të ndaluar dhe as rezultate konkrete nga kontrollet. Hetimet për motivin, identifikimin dhe kapjen e autorëve vijojnë. Saranda Web

The post Vrasja në Sarandë, Policia: Po bëjmë kontrolle me dronë në Sarandë dhe Delvinë appeared first on Saranda News.

Drejtori i Përgjithshëm i Policisë së Shtetit, Drejtues Madhor Skënder Hita, mbërriti këtë të diel në Sarandë, pas atentatit të rëndë të ndodhur paraditen e sotme në qendër të qytetit, ku u vra me armë zjarri 44-vjeçari Artan Myrtaj dhe u plagos kalimtari 73-vjeçar Xhevdet Skëndaj. Hita zhvilloi një analizë me drejtuesit dhe strukturat e Komisariatit të Policisë Sarandë, gjatë së cilës kërkoi hetime të shpejta dhe të thelluara për identifikimin dhe kapjen e autorëve, si dhe dokumentimin e plotë ligjor të ngjarjes.

Në fokus të takimit ishte edhe situata kriminale në Sarandë. Drejtori i Përgjithshëm kërkoi një skanim tërësor të territorit, duke nisur nga konfliktet më të rënda deri te përplasjet që mund të duken të parëndësishme, por që mund të përshkallëzohen në ngjarje kriminale.

Strukturave vendore iu kërkua të evidentojnë personat me precedent penal, kontingjentin kriminal që vepron në zonë, si dhe individët që lëvizin drejt Sarandës nga qytete të tjera.

“Do të godasim pa kompromis grupet kriminale që veprojnë në qytet”, ishte mesazhi i përcjellë nga Hita për strukturat e Policisë së Sarandës.

Kreu i Policisë së Shtetit kërkoi rezultate konkrete jo vetëm për zbardhjen e atentatit të sotëm, por edhe për dokumentimin e ngjarjeve të tjera kriminale të ndodhura më parë në Sarandë.

The post Skënder Hita në Sarandë: Do godasim pa kompromis grupet kriminale që veprojnë në qytet appeared first on Saranda News.

Një atentat me armë zjarri tronditi Sarandën paraditen e së dielës, 20 shtator. Artan Myrtaj, 44 vjeç, mbeti i vrarë pas të shtënave në kryqëzimin e ish-agjencisë, në qendër të qytetit. Nga të shtënat e plumbave u plagos edhe një kalimtar, 73-vjeçari Xhevdet Skëndaj.

Ngjarja ndodhi rreth orës 09:50. Sipas të dhënave të deritanishme, dy persona që lëviznin me motor dhe mbanin skafandra dyshohet se kanë ardhur nga drejtimi i rrugës “Lefter Talo” dhe janë afruar pranë lokalit ku ndodhej Myrtaj. Në momentin kur 44-vjeçari ka pikasur rrezikun, ka tentuar të largohet me vrap drejt kryqëzimit dhe rrugës “Vangjel Pandi”. Autorët dyshohet se kanë qëlluar mbi 15 herë, duke e ndjekur viktimën derisa ai është rrëzuar në rrugë.

Dshmitarët kanë rrefyer se të dy personat kanë përdorur armët pistoleta që mbanin me vete. Intensiteti i të shtënave dëshmohet edhe nga dëmtimet në lokalin ku Myrtaj kishte pirë kafe. Xhamat e derës janë goditur nga predhat, ndërsa gëzhoja janë gjetur në zonën përreth. Atentati ndodhi në një orar kur në qendër kishte lëvizje qytetarësh, duke vënë në rrezik edhe persona që nuk kishin lidhje me ngjarjen.

Një prej tyre ishte Xhevdet Skëndaj, 73 vjeç, i cili po kalonte rastësisht në zonë. Ai u godit nga një plumb në shpinë dhe, pas ndihmës së parë, u transportua me helikopter drejt Spitalit të Traumës në Tiranë për trajtim më të specializuar.

Një dëshmitar në vendngjarje ka treguar se Myrtaj kishte pirë kafe me një person tjetër dhe po largohej nga lokali kur nisi sulmi. Sipas dëshmisë, 44-vjeçari ka reaguar duke u larguar me vrap pas të shtënave të para, por sulmi ka vijuar.

Momente të rënda janë regjistruar pak më vonë, kur në vendngjarje mbërriti nëna e viktimës. Ajo shpërtheu në lot pasi pa të birin të pajetë, ndërsa persona të pranishëm dhe një efektiv policie u përpoqën ta largonin nga vendi.

Pavarësisht se Komisariati i Policisë Sarandë ndodhet vetëm pak dhjetëra metra nga zona ku ndodhi vrasja, efektivëve iu deshën rreth 10 minuta për të mbërritur në vendngjarje.

Pas atentatit, autorët u larguan me motor. Policia ngriti pika kontrolli në akset që lidhin Sarandën me Vlorën dhe Gjirokastrën, ndërsa grupi hetimor po punon për identifikimin dhe kapjen e tyre. Kamerat e sigurisë të bizneseve dhe objekteve përgjatë itinerarit të dyshuar të autorëve pritet të jenë një prej elementeve kryesore të hetimit.

Artan Myrtaj rezulton se ishte arrestuar në korrik të vitit 2025 për veprën penale “përkrahje e autorit të krimit”, në kuadër të hetimeve për plagosjen e Gëzim Hajdarajt dhe Ernest Lames pas një konflikti.

Fakti që viktima kishte qenë i përfshirë më parë në një procedim penal është pjesë e të dhënave që po verifikohen nga hetuesit, por në këtë fazë nuk ka ende një motiv zyrtar të konfirmuar për vrasjen dhe as një lidhje të provuar mes ngjarjes së vitit 2025 dhe atentatit të së dielës.

Policia vijon kërkimet për dy personat e dyshuar, ndërsa hetimet duhet të përcaktojnë itinerarin e tyre, armët e përdorura, motivin dhe nëse pas atentatit qëndrojnë persona të tjerë. Saranda Web

The post Atentat në qendër të Sarandës, vritet Artan Myrtaj; plagoset një kalimtar 73-vjeçar appeared first on Saranda News.

Avokati Arben Llangozi ka publikuar pamje filmike nga konflikti i dhunshëm i ndodhur mbrëmjen e së mërkurës në Sarandë, ku tre të rinj mbetën të plagosur me thikë. Ngjarja u regjistrua rreth orës 22:00, në një subjekt tregtar në lagjen nr. 1, pranë hyrjes së shëtitores. Në pamjet e publikuara shfaqen momentet e përplasjes, ndërsa materialet filmike pritet të ndihmojnë grupin hetimor në sqarimin e dinamikës dhe të rolit të secilit person të përfshirë.

Të plagosurit janë vëllezërit Elidon Shukulli, 24 vjeç, dhe Mario Shukulli, 20 vjeç, si dhe Andi Saliaj, 19 vjeç. Ata u transportuan në urgjencën e Spitalit të Sarandës, ndërsa 24-vjeçari Elidon Shukulli, për shkak të gjendjes së tij shëndetësore, u nis drejt Tiranës për trajtim më të specializuar.

Sipas Policisë, në vijim të hetimeve janë arrestuar Kamelo Aliaj, 22 vjeç, dhe Andi Saliaj, 19 vjeç, ky i fundit njëkohësisht edhe një prej personave të plagosur. Ndërkohë, Eduard Bajrami, 19 vjeç, është shpallur në kërkim.

Dyshohet se konflikti ka nisur për motive të dobëta. Ndaj personave të arrestuar rëndojnë akuzat për veprat penale “Plagosje e rëndë me dashje” dhe “Prishja e qetësisë publike”.

Hetimet vijojnë për zbardhjen e plotë të rrethanave të ngjarjes dhe përcaktimin e përgjegjësisë së secilit person të përfshirë. Saranda Web

The post Klienti qethej kur u godit me thikë: Publikohen pamjet e plagosjes në Sarandë – VIDEO appeared first on Saranda News.

Tre të rinj kanë mbetur të plagosur pas një konflikti me thika të ndodhur mbrëmjen e së mërkurës në Sarandë. Ngjarja është regjistruar rreth orës 22:00 në një subjekt tregtar në lagjen nr. 1, pranë hyrjes së shëtitores së qytetit. Të plagosurit janë transportuar menjëherë në urgjencën e Spitalit të Sarandës, ku kanë marrë ndihmën e parë mjekësore. Ata janë identifikuar si vëllezërit Elidon Shukulli, 24 vjeç, Mario Shukulli, 20 vjeç, si dhe Andi Saliaj, 19 vjeç.

Për shkak të gjendjes së tij, 24-vjeçari Elidon Shukulli është nisur drejt Tiranës për trajtim më të specializuar mjekësor.

Nga të dhënat paraprake dyshohet se përplasja ka nisur për motive të dobëta, ndërsa policia ka kryer veprime hetimore për të përcaktuar dinamikën dhe përgjegjësinë e personave të përfshirë.

Në vijim të hetimeve janë arrestuar Kamelo Aliaj, 22 vjeç, dhe Andi Saliaj, 19 vjeç, ky i fundit njëkohësisht edhe një prej personave të plagosur gjatë konfliktit. Ndërkohë, Eduard Bajrami, 19 vjeç, është shpallur në kërkim.

Ndaj personave të arrestuar rëndojnë akuzat për veprat penale “Plagosje e rëndë me dashje” dhe “Prishja e qetësisë publike”.

Hetimet vijojnë për zbardhjen e plotë të rrethanave të konfliktit dhe përcaktimin e rolit të secilit prej personave të përfshirë. Saranda Web

The post Tre të rinj plagosen me thikë në Sarandë, dy në pranga dhe një në kërkim appeared first on Saranda News.