Një nënë nga Saranda ka dërguar në Saranda Web një mesazh të veçantë, të shkruar në emër të fëmijës së saj të mitur. Përmes një rrëfimi të ndjerë, ajo përshkruan gjendjen e këndeve të lojërave në qytet dhe frikën që ndjejnë prindërit kur i çojnë fëmijët të luajnë në to.

Mesazhi vjen si një thirrje për më shumë vëmendje ndaj hapësirave publike për fëmijët dhe sigurinë e tyre.

“Është e trishtë” – Kështu thotë mami, ndërkohë që arrij të shkëputem prej duarve të saj dhe vrapoj për te këndi i lojërave në shëtitore.

Jam një fëmijë i vockël. Më pëlqen shumë të kolovitem, por nuk e kuptoj pse mami ka frikë të më çojë të loz aty. Ndoshta sepse sa herë ulem, ndiej shumë ftohtë kur trupi im i brishtë prek lisharësen e hekurt. Duart dhe këmbët më bëhen akull, por prapëseprapë nuk dua ta ndërpres lojën.

Kolovitem lumturisht aq shumë, saqë harroj se lisharësja nuk ka mbrojtëse sigurie dhe për një moment ndiej zhavorrin e ashpër të gërvishtë lëkurën time. Jam rrëzuar… Mami s’ka mundur të më kapë. Qaj shumë sepse më dhemb. Jam i trembur, por edhe shumë konfuz.
Nuk e kuptoj përse nuk shkojmë në një kënd tjetër lojërash, si ato këndet e sigurta e të bukura plot ngjyra që shoh në televizor.

Mami më kap nga dora dhe më shëtit pak më tutje. Pamja përpara syve të mi është po njësoj; pak metra më tutje është po i njëjti kënd lojërash lakuriq, si ai ku u rrëzova.

Meqenëse dje ra shi, poshtë lodrave, aty ku duhet të kishte bar, është krijuar një llucë e madhe. Një fëmijë po lëkundet dhe britmat e tij të kënaqësisë mbyten nga gërvimat e zinxhirave të lisharëses.

“Ikim këtej; kur të sjelli babi lekë, do shkojmë në një kënd lojërash privat”, thotë mami. Por unë dua të loz përditë dhe e di që ajo nuk mundet…

Përse ndihem kaq i zbrazët kur e ndiej trishtimin e saj në pamundësinë për të bërë asgjë?

“Është e trishtë”, kam filluar të mendoj edhe unë si ajo; është e trishtë sesi askush nuk përpiqet ta dëgjojë dëshirën, nevojën dhe të drejtën time për të pasur një vend loje të sigurt, siç e kanë fëmijët në të gjithë botën.

The post “Është e trishtë…” – Mesazhi prekës i një fëmije për këndet e lojërave në Sarandë appeared first on Saranda News.

Vetëm pak orë pas publikimit të shqetësimit të banorëve të Berdeneshit në Saranda Web, duket se institucionet janë vënë në lëvizje dhe problemi i furnizimit me ujë është zgjidhur.

Banorët e zonës kanë kontaktuar sërish redaksinë për të bërë të ditur se ndërhyrja është kryer menjëherë gjatë ditës së sotme. Sipas tyre, pas rreth 20 ditësh pa ujë të pijshëm, në zonë ka mbërritur një eskavator dhe defekti në tubacion është riparuar brenda një kohe shumë të shkurtër.

Një prej mesazheve të ardhura nga banorët tregon qartë se sa e vogël ka qenë ndërhyrja e nevojshme për të rikthyer furnizimin me ujë për qindra familje.

“Pas publikimit tuaj sot, pas 20 ditësh erdhi eskavatori dhe për rreth dy apo tre orë u rregullua defekti. Nga ora 14:00 e pasdites uji erdhi përsëri në shtëpitë tona. Kaq i madh ishte problemi: vetëm dy orë punë dhe lanë pa ujë rreth 400 familje. Ju falënderoj pa masë që bëheni zëri ynë.”

Ky reagim i banorëve tregon edhe një herë rolin që media mund të luajë në ngritjen e problemeve të komunitetit dhe në nxitjen e reagimit të institucioneve. Në këtë rast, një problem që kishte mbetur i pazgjidhur për javë të tëra u rregullua brenda pak orësh pas publikimit të tij.

Megjithatë, mbetet për t’u parë nëse furnizimi me ujë në zonën e Berdeneshit do të jetë i qëndrueshëm në vazhdim, pasi sipas banorëve kjo është një problematikë që vazhdon prej më shumë se dy dekadash dhe shpesh rikthehet në mënyrë periodike. Saranda Web

The post Pas publikimit në Saranda Web, zgjidhet brenda pak orësh problemi i ujit në Berdenesh appeared first on Saranda News.

Në periferi të qytetit të Sarandës, në zonën e Berdeneshit, një problem i rëndë vazhdon të rëndojë mbi jetën e përditshme të banorëve. Prej më shumë se një muaji ata janë pa ujë të pijshëm, ndërsa situata duket se po përkeqësohet nga dita në ditë. Megjithatë, përtej mungesës së ujit, ajo që e bën edhe më të trishtë këtë realitet është heshtja e banorëve, të cilët kanë frikë të flasin publikisht për problemin që i prek drejtpërdrejt.

Gjatë ditës së sotme, në Saranda Web kanë mbërritur disa ankesa nga banorë të Berdeneshit, por shumica e tyre janë dërguar me adresa fallso. Në një kontakt telefonik që patëm me një prej banorëve, i kërkuam që të gjendej dikush nga komuniteti që të fliste, qoftë edhe pa u identifikuar dhe pa shfaqur fytyrën. Por edhe kjo mundësi u refuzua, pasi banorët deklaruan se kishin frikë të dilnin publikisht.

Kjo situatë krijon një panoramë të rëndë jo vetëm për mungesën e një shërbimi jetik si uji i pijshëm, por edhe për klimën e frikës dhe presionit që ndjejnë banorët për të ngritur zërin. Një problem që prek çdo familje të zonës po mbetet pa zë publik, ndërsa institucionet duket se nuk kanë ndërmarrë ende asnjë zgjidhje konkrete.

Po aq e çuditshme është edhe heshtja e opozitës. Deri tani nuk ka asnjë reagim publik nga opozita, e cila në rrjetet sociale shfaqet shpesh me video të cilat i konsiderojnë si konferenca për shtyp për të uruar festa si 7 dhe 8 Marsin, por nuk ka thënë asnjë fjalë për një problem që prek drejtpërdrejt jetën e qytetarëve të Sarandës.

Ndërkohë, Saranda Web po publikon edhe mesazhin e një prej banorëve që ka kërkuar ndihmë përmes medias, me shpresën se zëri i tyre do të dëgjohet nga institucionet përgjegjëse dhe besimin se banorët do të gjejnë forcën për të reaguar publikisht.

“Përshëndetje Saranda Web. Unë që ju shkruaj jam një banor i fshatit të Berdeneshit, i cili ka më shumë se dy javë pa ujë të pijshëm dhe askush nuk mban përgjegjësi. Sipas përfaqësuesve të zonës është çarë tubacioni që e sjell ujin nga Çuka, ndërkohë nuk është bërë as përpjekja minimale për ta rregulluar dhe për t’u siguruar ujë banorëve. Problemi me ujin e pijshëm në zonën e Berdeneshit ka më shumë se 20 vjet që ekziston, ndërkohë çdo herë para zgjedhjeve premtimet janë të shumta. Ju drejtohem juve si media me shpresën që dikush të dëgjojë dhe të vihet në lëvizje për këtë zonë. Ju falënderoj shumë nëse e postoni. Respekte.”

The post Banorët e Berdeneshit kanë 1 muaj pa ujë, por kanë frikë të flasin publikisht appeared first on Saranda News.

Punimet që po kryhen në kuadër të projektit për ndërtimin e Shëtitores së Ksamilit po shoqërohen me denoncime të forta nga banorët dhe bizneset, të cilët flasin për një ndërhyrje të paprecedentë në vijën bregdetare dhe për një katastrofë të hapur mjedisore.

Pamjet e siguruara tregojnë qartë mbushjen e detit me materiale inerte, hedhjen e baltës në ujë dhe krijimin e sipërfaqeve të reja mbi det, ndërkohë që dallgët përplasen mbi struktura betoni e hekurash të ekspozuara. Uji i kristaltë i Ksamilit është kthyer në një masë të turbullt balte, duke sinjalizuar ndotje serioze të shtresave nënujore.

Sipas banorëve, përtej projektit të shpallur për “shëtitore”, në terren po realizohen edhe ndërtime pishinash pranë vijës së ujit, ndërkohë që po kryhet mbushje e detit për të krijuar platforma artificiale.

Në disa zona, janë hedhur sasi të konsiderueshme dheu dhe materiali inert direkt në det, duke ndryshuar konfiguracionin natyror të bregut. Kjo praktikë jo vetëm që cenon ekosistemin, por rrezikon edhe stabilitetin afatgjatë të vijës bregdetare.

Masakër nënujore: dëmtohet flora dhe fauna detare

Ekspertët paralajmërojnë se mbushja e detit me baltë dhe materiale inerte po dëmton rëndë jetën nënujore, duke mbytur organizmat në fundin e detit, shkatërruar habitatet e peshqve dhe rritur turbullirën e ujit. Ksamilit, i njohur për ujërat e kristalta dhe biodiversitetin, po i kanoset një dëm afatgjatë.

Projekti për krijimin e muzeut nënujor, përmes zhytjes së anijeve të flotës detare shqiptare, mund të vihet në rrezik nga turbullira dhe depozitimi i baltës, që ndikojnë negativisht në strukturat e zhytura dhe turizmin e zhytjes.

Banorët kërkojnë transparencë: a ka studim të ndikimit në mjedis, a është lejuar mbushja e detit dhe kush mban përgjegjësi për ndotjen?

The post Skandal në Ksamil / Deti mbushet me baltë, bota nënujore dhe muzeu në rrezik – VIDEO appeared first on Saranda News.

Sipas një banoreje që ka kontaktuar në Saranda Web, situata është bërë e padurueshme, ndërsa përpjekjet për të komunikuar me OSHEE-n kanë rezultuar të pasuksesshme.

“Kemi 4 orë pa energji elektrike. Telefonojmë dhe askush nuk përgjigjet. Kjo situatë është e përditshme”, – shprehet banorja.

Banorët theksojnë se ndërprerjet e shpeshta po u shkaktojnë vështirësi serioze.

Ata kërkojnë reagim dhe transparencë nga institucionet përgjegjëse, si dhe një zgjidhje përfundimtare të problemit që, sipas tyre, përsëritet vazhdimisht.

Deri në momentin e publikimit të këtij lajmi, nuk ka një reagim zyrtar nga OSHEE lidhur me arsyen e ndërprerjes së energjisë në Piqeras.

The post Banorët në Piqeras 4 orë pa energji, OSHEE nuk u përgjigjet në telefon appeared first on Saranda News.

Banorët e fshatit SMT (Çlirim) në territorin e Bashkia Finiq ngrenë alarmin për mungesën totale të investimeve në infrastrukturë ndër vite, duke e cilësuar situatën si një braktisje të plotë nga pushteti vendor.

Sipas banorëve, në këtë fshat nuk është ndërhyrë asnjëherë për përmirësimin e rrugëve, kanalizimeve apo ndriçimit publik. Gjendja e infrastrukturës është përkeqësuar ndjeshëm, ndërsa hyrja kryesore e fshatit ndodhet në kushte tejet të rënda dhe vështirëson lëvizjen e përditshme të banorëve.

Një tjetër shqetësim serioz lidhet me pasojat shëndetësore, veçanërisht për fëmijët e vegjël. Banorët shprehen se lagështira dhe mungesa e kanalizimeve kanë ndikuar drejtpërdrejt në shëndetin e tyre, duke krijuar kushte jetese të papranueshme.

Problematika bëhet edhe më e rëndë gjatë reshjeve të shiut, kur zona përmbytet dhe hyrja në fshat bëhet e pamundur. “Kur bie shi, nuk shkojmë dot në shtëpi”, shprehen banorët, të cilët theksojnë se prej vitesh kanë humbur shpresën për ndërhyrje nga Bashkia Finiq.

Banorët kërkojnë që institucionet përgjegjëse të reagojnë dhe të marrin masa konkrete për t’i dhënë zgjidhje kësaj situate, duke theksuar se fshati SMT nuk mund të vazhdojë të trajtohet si një zonë e harruar.

The post Banorët denoncojnë: Jemi braktisur totalisht nga Bashkia Finiq – VIDEO appeared first on Saranda News.

Një banore nga zona e Vrionit ka denoncuar në Saranda Web arrogancën dhe papërgjegjshmërinë e OSHEE, pas ankesave të vazhdueshme për mungesën e energjisë elektrike, problem që pasditen e sotme e kanë patur edhe fshatrat e Delvinës dhe Finiqit.

Sipas denoncimit, banorja ka kontaktuar ditën e sotme OSHEE në Tiranë për të ngritur shqetësimin e saj lidhur me ndërprerjet e shpeshta të energjisë. Nga OSHEE qendrore, ajo është udhëzuar që të kontaktojë strukturën rajonale në Gjirokastër, duke i dhënë një numër telefoni për ta përcjellë ankesën.

Por ajo që ka ndodhur më pas është konsideruar nga banorja si fyese dhe e papranueshme.

Sipas saj, personi që i është përgjigjur në numrin e OSHEE rajonale i ka thënë në mënyrë tallëse:
“Do keni drita kur të vijë behari”, dhe më pas i ka mbyllur telefonin, pa dhënë asnjë shpjegim apo zgjidhje për situatën.

Banorja shprehet se kjo sjellje është një shenjë e qartë arrogancës dhe mungesës së respektit ndaj qytetarëve, të cilët jo vetëm paguajnë rregullisht faturat, por përballen çdo ditë me ndërprerje të energjisë, dëme në pajisje elektrike dhe vështirësi në jetën e përditshme.

Raste të tilla ngrenë pikëpyetje serioze mbi mënyrën se si trajtohen qytetarët nga institucionet publike dhe mbi standardin e shërbimit që ofrohet në zonat jashtë qendrave kryesore.

The post Banorët pa drita, OSHEE u përgjigjet me tallje: Do të keni kur të vijë behari appeared first on Saranda News.

Pas publikimit të denoncimit në Saranda Web lidhur me punimet pa cilësi në një kanal kullues në hyrje të qytetit të Delvinës, ditën e sotme ka nisur sërish puna në terren për korrigjimin e problematikave të konstatuara.

Nga pamjet e siguruara dhe informacionet nga vendngjarja, rezulton se këtë herë po kryhen punime sipas standardeve teknike, duke përfshirë edhe vendosjen e rrjetës së hekurit, element që mungonte më parë dhe që është thelbësor për qëndrueshmërinë e strukturës.

Ky reagim vjen pas shqetësimit të ngritur nga banorët dhe pas pasqyrimit të situatës në media, duke treguar edhe një herë rëndësinë e transparencës dhe rolit të denoncimit publik për përmirësimin e punëve me interes për qytetarët.

Saranda Web do të vijojë të ndjekë nga afër ecurinë e punimeve dhe të informojë qytetarët për çdo zhvillim të mëtejshëm.

Banorët denoncojnë: Punime pa cilësi në Delvinë, betoni shembet pak orë pas shtrimit – VIDEO

The post Pas denoncimit në Saranda Web, rifillojnë punimet për korrigjimin e kanalit në Delvinë appeared first on Saranda News.

Banorët e Delvinës kanë ngritur shqetësimin për punime pa cilësi që po kryhen në hyrje të qytetit, duke denoncuar mënyrën skandaloze se si po realizohet një kanal kullues me gjatësi rreth 300 metra.

Sipas tyre, ditën e sotme kanali është shtruar me beton, por pa respektuar standardet minimale teknike, konkretisht pa vendosur rrjetë hekuri, element thelbësor për qëndrueshmërinë e strukturës. Si pasojë, betoni ka nisur të shembet pothuajse menjëherë, ende pa u tharë plotësisht.

Pamjet e siguruara tregojnë qartë plasaritjet dhe dëmtimet në strukturë, duke ngritur dyshime serioze mbi cilësinë e materialeve të përdorura dhe mënyrën e zbatimit të punimeve. Banorët shprehen se këto punime jo vetëm që përbëjnë shpërdorim të fondeve publike, por rrezikojnë të kthehen shumë shpejt në një problem edhe më të madh, sidomos në rast reshjesh apo përmbytjesh.

“Kjo nuk është hera e parë që shohim punime të tilla. Betoni hidhet për sy e faqe, pa rrjetë hekuri, pa standarde, dhe pas pak ditësh gjithçka prishet,” – shprehet një banor.

Banorët kërkojnë ndërhyrje të menjëhershme nga institucionet përgjegjëse, verifikim të punimeve në terren dhe marrjen e masave.

https://sarandanews.net/pas-denoncimit-ne-saranda-web-rifillojne-punimet-per-korrigjimin-e-kanalit-ne-delvine/

The post Banorët denoncojnë: Punime pa cilësi në Delvinë, betoni shembet pak orë pas shtrimit – VIDEO appeared first on Saranda News.

Një banor i fshatit Çiflik, në bashkinë Konispol, ka ngritur shqetësime serioze lidhur me punimet për ndërtimin e ujësjellësit të fshatit, duke i cilësuar ato si jo cilësore dhe jashtë standardeve teknike.

Sipas denoncimit nga banori i fshatit Çiflik, tubacionet e vendosura nuk përmbushin kriteret e duhura të cilësisë, ndërsa procesi i mbulimit të tyre po realizohet drejtpërdrejt me beton, pa u zbatuar shtresat e nevojshme mbrojtëse dhe teknike që garantojnë jetëgjatësi dhe siguri për rrjetin e ujësjellësit.

Banori shprehet se këto punime rrezikojnë të dështojnë në afat të shkurtër, duke sjellë probleme të reja për furnizimin me ujë të banorëve të zonës, ndërkohë që investimi prej 386 milionë lekë të vjetra është financuar me fonde publike.

Ai u bën thirrje institucioneve përgjegjëse dhe bashkisë Konispol të verifikojnë nga afër situatën dhe të ndërhyjnë për të garantuar që projekti të realizohet sipas standardeve ligjore dhe teknike.

Saranda Web do të ndjekë zhvillimet dhe është e hapur për reagimin e autoriteteve dhe palëve të përfshira.

The post Banori i fshatit Çiflik denoncon cilësinë e dobët të punimeve për ujësjellësin – VIDEO appeared first on Saranda News.