Mënyra e hyrjes dhe daljes në Terminalin e ri të Autobusëve në Sarandë është kthyer në objekt diskutimi në mbledhjen e fundit të Këshillit Bashkiak, ku u ngritën shqetësime për ndikimin që mund të ketë në qarkullimin rrugor dhe sigurinë e qytetarëve.

Këshilltari bashkiak Ilirjan Gërdhuqi përcolli shqetësimet e ngritura nga qytetarë dhe specialistë të fushës, duke theksuar se skema aktuale e hyrje-daljeve në terminal rrezikon të krijojë ngarkesë në trafik dhe situata të rrezikshme për drejtuesit e mjeteve.

Në përgjigje të këtyre shqetësimeve, kryetari i Bashkisë Sarandë, Oltion Çaçi, deklaroi se aktualisht janë marrë masa për të garantuar sigurinë në këtë segment.

“Aktualisht kemi siguruar që të mos ndodhin aksidente gjatë hyrjeve dhe daljeve nga Terminali”, tha Çaçi.

Megjithatë, ai pranoi se në të ardhmen mund të shqyrtohet një alternativë më e përshtatshme. Sipas kryebashkiakut, kjo mund të lidhet me projektin për ndërtimin e Rrugës së Gjashtë, e cila pritet të ndikojë edhe në organizimin e qarkullimit në zonë.

“Një zgjidhje alternative dhe më e mirë për hyrjen dhe daljen nga terminali do të shikohet gjatë punimeve për ndërtimin e Rrugës së 6-të, por ajo mbetet për t’u parë”, u shpreh kryetari i Bashkisë.

Terminali i ri i Autobusëve është një nga investimet e rëndësishme për transportin publik në qytet, por mënyra e organizimit të aksesit në të vijon të ngrejë pikëpyetje dhe shqetësime. Saranda Web

The post Hyrja & dalja në Terminal ngre shqetësime, Çaçi: Do shikojmë zgjidhje kur të bëhet rruga e 6-të appeared first on Saranda News.

Të cilësosh si “lajm të rremë” një video ku dëgjohet dhe shihet qartë propozimi i z. Vesel Koçiu për vendosjen e tarifës 4.000 lekë në plazhet kryesore të Ksamilit, është një fyerje për inteligjencën e qytetarëve. Në të njëjtën video dëgjohet kundërshtimi i këshilltarëve Dafina Allkushi dhe Ilirjan Gërdhuqi, ndërsa kryetari i Këshillit Bashkiak e hedh në votim projekt-vendimin me ndryshimin e kërkuar nga Vesel Koçiu dhe shumica e këshilltarëve e miratojnë.

Këto nuk janë interpretime të Saranda Web. Janë fakte të regjistruara me zë dhe figurë.

Fatkeqësisht, sa herë që përfaqësuesit e Partisë Demokratike damkosen nga qytetarët për votat dhe qëndrimet e tyre, ata zgjedhin të sulmojnë Saranda Web që publikon faktet. Kështu ndodhi edhe me votimin për parkun fotovoltaik në Heremec, kur këshilltarët e saj votuan PRO dhe dolën nga dera e pasme për të mos u përballur me qytetarët. Kështu po ndodh edhe sot.

Problemi i tyre është se qytetarët kanë filluar të shohin qartë dhe të reagojnë për t’i shporrur të 2 bashkë.

Këshilli Bashkiak Sarandë miraton çmimet për çadrat në plazhe në Sarandë dhe Ksamil

The post Menaxherët e faqes Partia Demokratike Sarandë sulm ndaj Saranda Web appeared first on Saranda News.

Fillimisht, Bashkia Sarandë kishte propozuar që çmimet të ndaheshin në tre kategori: 1 mijë, 2 mijë dhe 3 mijë lekë për çadër, në varësi të zonës dhe plazhit.

Gjatë diskutimeve në mbledhje, këshilltarët Përparim Ahmeti dhe Vesel Koçiu kërkuan që për plazhet kryesore të Ksamilit, veçanërisht ato përreth ishujve, të vendosej një kategori më e lartë çmimi, prej 4 mijë lekësh për çadër.

Ky propozim u kundërshtua nga këshilltarët Dafina Allkushi dhe Ilirjan Gërdhuqi, të cilët nuk ishin dakord me rritjen e çmimit në këtë nivel.

Në përfundim, propozimi për aplikimin e çmimit 4 mijë lekë për çadër në plazhet kryesore të Ksamilit u hodh në votim. Këshilltarët e Partisë Demokratike bashkuan votat me shumicën, duke bërë të mundur miratimin e këtij propozimi.

Me këtë vendim, në plazhet e Sarandës dhe Ksamilit do të aplikohen disa kategori çmimesh, ndërsa në zonat më të frekuentuara të Ksamilit çmimi për një çadër do të arrijë në 4 mijë lekë. Saranda Web

The post Këshilli Bashkiak Sarandë miraton çmimet për çadrat në plazhe në Sarandë dhe Ksamil appeared first on Saranda News.

Situata vjen pas mbledhjes së ndërprerë të Këshillit Bashkiak të datës 29 maj, e cila u pezullua për shkak të protestës së këtij grupi interesi. Pas negociatave mes palëve, Këshilli Bashkiak në mbledhjen e datës 1 qershor miratoi 6 vendbazime për mjetet ujore në Ksamil, në dakordësi me përfaqësuesit e sektorit.

Megjithatë, edhe pse ka kaluar më shumë se një javë nga miratimi i vendimit dhe sezoni turistik ka hyrë në fazën më intensive, në terren ende nuk janë marrë masat për vendosjen e tapave kufizuese dhe sinjalistikës përkatëse. Sipas protestuesve, kjo vonesë po pengon zhvillimin normal të aktivitetit të tyre ekonomik.

Pronarët e mjeteve ujore pretendojnë se, përveç zvarritjes së procesit, ka tentativa nga ana e Bashkisë Sarandë për të mos zbatuar vendimin e miratuar nga Këshilli Bashkiak, duke propozuar vendndodhje që ata i konsiderojnë të papërshtatshme për operimin e mjeteve ujore dhe ushtrimin e aktivitetit të tyre.

Pas disa orësh pritjeje për një takim me përfaqësues të bashkisë, rreth 30 protestues hynë në ambientet e institucionit, duke kaluar nga një zyrë në tjetrën në kërkim të zyrtarëve përgjegjës. Ata kërkuan komunikim të drejtpërdrejtë me drejtuesit vendorë për të marrë një përgjigje konkrete mbi zbatimin e vendimit.

Pas takimeve të zhvilluara në ambientet e bashkisë, protestuesit deklaruan se kanë marrë garanci se çështja do të trajtohet nesër në terren. Sipas tyre, është premtuar se kryetari i Bashkisë Sarandë, Oltion Çaçi, së bashku me përfaqësues të tjerë të institucionit, do të shkojnë në Ksamil për të shqyrtuar nga afër problematikën dhe për të gjetur një zgjidhje që garanton zbatimin e vendimit të Këshillit Bashkiak.

Megjithatë, pronarët e mjeteve ujore kanë paralajmëruar përshkallëzim të protestës në rast se kërkesat e tyre nuk marrin zgjidhje. Ata deklarojnë se nesër do të bllokojnë hyrjet e Bashkisë Sarandë nëse nuk ndërmerren veprime konkrete për vendosjen e vendbazimeve dhe zbatimin e plotë të vendimit të miratuar nga Këshilli Bashkiak. Saranda Web

The post Pronarët e mjeteve ujore futen në zyrat e Bashkisë Sarandë: Nesër do mbyllim dyert appeared first on Saranda News.

Sot në orën 12:00 do të zhvillohet mbledhja e radhës e Këshillit Bashkiak Sarandë, e cila u ndërpre të premten pas tensioneve të krijuara nga protesta e pronarëve të mjeteve ujore që operojnë në Ksamil.

Mbledhja e kaluar u shoqërua me debate të forta lidhur me projektvendimin për miratimin e hartave të vendbazimeve të mjeteve ujore në territorin e Bashkisë Sarandë. Sipas propozimit të paraqitur nga bashkia, parashikohej miratimi i katër vendbazimeve, të përcaktuara pas një procesi dëgjese publike.

Megjithatë, pronarët e mjeteve ujore kundërshtuan propozimin, duke argumentuar se vendbazimet e planifikuara nuk janë funksionale për aktivitetin e tyre, pasi ndodhen larg zonave turistike të Ksamilit dhe paraqesin vështirësi operimi për shkak të kushteve detare dhe dallgëve.

Gjatë diskutimeve, një pjesë e këshilltarëve bashkiakë propozuan rritjen e numrit të vendbazimeve nga katër në gjashtë, propozim që nuk hasi kundërshtime as nga përfaqësuesit e Policisë Kufitare.

Tensionet u përshkallëzuan gjatë pushimit të kërkuar nga këshilltarët e majtë për konsultime mbi çështjen. Pronarët e mjeteve ujore tentuan të hynin në ambientet ku po zhvillohej mbledhja, duke kërkuar takim me kryetarin e bashkisë dhe duke shprehur pakënaqësinë e tyre për mënyrën se si po trajtoheshin kërkesat e sektorit.

Për shkak të situatës së krijuar, mbledhja u ndërpre dhe u shty për sot, kur pritet të rikthehet në diskutim çështja e vendbazimeve të mjeteve ujore, një nga temat më të debatueshme në prag të sezonit veror.

Përveç kësaj çështjeje, këshilltarët bashkiakë do të informohen mbi procesin e inventarizimit të pemëve dhe hapësirave publike në Sarandë dhe Ksamil, si dhe mbi problematikat e konstatuara gjatë zbatimit të projekteve publike, veçanërisht në lidhje me cilësinë e punimeve dhe standardet e sigurisë rrugore.

Në rendin e ditës përfshihet edhe raportimi mbi ecurinë e procesit të trajtimit të kërkesave për përfundimin e kalimit të pronësisë në kuadër të Vendimit të Këshillit të Ministrave nr. 329, datë 22 maj 2019.

Këshilli pritet të shqyrtojë dhe miratojë një sërë projektvendimesh me ndikim social dhe ekonomik, mes tyre përdorimin e fondit të kushtëzuar për ndihmën ekonomike, shpërndarjen e ndihmës ekonomike nga të ardhurat e Bashkisë për muajin prill 2026 dhe listën përfundimtare të familjeve përfituese nga programi i subvencionimit të qirasë në tregun e lirë për vitin 2026.

Në diskutim do të jenë gjithashtu ndryshimet në strukturën e ndërmarrjes së shërbimeve publike, ndryshimet në rregulloren e kundërvajtjeve administrative dhe transferimi në pronësi të Bashkisë Sarandë i një sipërfaqeje trualli prej 8,911 metrash katrorë.

Vëmendje të veçantë pritet të marrin dy projektvendime që lidhen drejtpërdrejt me sezonin turistik: miratimi i çmimeve maksimale për zonat bregdetare të Sarandës dhe Ksamilit, si dhe miratimi i vendbazimeve të mjeteve lundruese dhe korridoreve të lëvizjes së tyre.

Mbledhja do të mbyllet me shqyrtimin e një projektvendimi për korrigjimin e gabimeve materiale në dokumentacionin e administratës vendore.

Takimi i sotëm konsiderohet ndër më të rëndësishmit për Bashkinë Sarandë në prag të sezonit turistik, pasi vendimet që do të merren pritet të ndikojnë drejtpërdrejt në administrimin e plazheve, aktivitetin e operatorëve turistikë dhe cilësinë e shërbimeve publike në Sarandë dhe Ksamil. Saranda Web

The post Mbledhja u ndërpre nga protestat, Këshilli Bashkiak Sarandë mblidhet sërish sot në orën 12:00 appeared first on Saranda News.

Mbledhja e Këshillit Bashkiak Sarandë është ndërprerë sot pas tensioneve të krijuara nga protesta e pronarëve të mjeteve ujore që operojnë në Ksamil.

Në rendin e ditës së mbledhjes ishte edhe shqyrtimi dhe miratimi i hartave të vendbazimeve të mjeteve ujore në territorin e Bashkisë Sarandë. Sipas propozimit të paraqitur nga bashkia, kërkohej miratimi i katër vendbazimeve, të cilat, sipas përfaqësuesve të institucionit, ishin përcaktuar pas një dëgjese publike të zhvilluar më herët.

Megjithatë, pronarët e mjeteve ujore kundërshtuan këtë propozim, duke argumentuar se vendbazimet e propozuara nuk janë funksionale për aktivitetin e tyre. Sipas tyre, ato ndodhen larg zonave turistike të Ksamilit dhe pozicionimi i tyre paraqet vështirësi për shkak të dallgëve që krijohen në det.

Gjatë diskutimeve, një pjesë e këshilltarëve bashkiakë propozuan që numri i vendbazimeve të rritej nga katër në gjashtë. Ky propozim nuk hasi kundërshtime as nga përfaqësuesit e Policisë Kufitare.

Për shkak të debatit të krijuar, këshilltarët e majtë kërkuan një pushim të përkohshëm për t’u konsultuar lidhur me çështjen. Pikërisht gjatë kësaj kohe u rritën tensionet mes protestuesve dhe përfaqësuesve të bashkisë.

Pronarët e mjeteve ujore tentuan të hynin me forcë në ambientet ku po zhvillohej mbledhja, duke kërkuar një takim me kryetarin e bashkisë. Ata u shprehën të revoltuar, duke deklaruar se “i kemi dhënë votën” dhe kërkuan që shqetësimet e tyre të dëgjoheshin drejtpërdrejt nga drejtuesi i institucionit.

Pas përshkallëzimit të situatës dhe tensioneve të krijuara, u vendos ndërprerja e mbledhjes së Këshillit Bashkiak Sarandë dhe shtyrja e saj për një datë tjetër, kur pritet të rikthehet në diskutim edhe çështja e vendbazimeve të mjeteve ujore. Saranda Web

The post Protesta e pronarëve të mjeteve ujore në Ksamil ndërpret mbledhjen e Këshillit Bashkiak Sarandë appeared first on Saranda News.

Sipas projekt-vendimit, propozohet ndryshimi i pikës 1.3 të vendimit nr.153, datë 23 dhjetor 2025, duke shtuar 10 punonjës të përhershëm shërbimi dhe 20 punonjës sezonalë me kontratë 3-mujore. Efektet financiare të këtij ndryshimi do të përballohen nga buxheti i vitit 2026 i Ndërmarrjes së Shërbimeve Publike.

Në relacionin shoqërues thuhet se shtimi i stafit vjen si pasojë e rritjes së ngarkesës në administrimin e hapësirave publike, veçanërisht gjatë sezonit turistik, kur rritet ndjeshëm fluksi i automjeteve dhe vizitorëve në Sarandë.

Sipas dokumentit, administrimi i terminalit të transportit dhe parkimeve publike kërkon monitorim të vazhdueshëm, kontroll të hyrje-daljeve dhe menaxhim më efikas të fluksit të automjeteve, çka ka sjellë nevojën për burime njerëzore shtesë.

Bashkia argumenton se kjo ndërhyrje synon përmirësimin e cilësisë së shërbimeve publike, garantimin e rendit dhe sigurisë, si dhe administrimin më të mirë të infrastrukturës publike në territorin e qytetit.

Gjithashtu, në relacion theksohet se kostot financiare do të mbulohen jo vetëm nga buxheti i miratuar i ndërmarrjes, por edhe nga të ardhurat që sigurohen nga administrimi i terminalit dhe parkimeve publike.

Projekt-vendimi mbështetet në ligjin “Për vetëqeverisjen vendore”, ligjin “Për financat e vetëqeverisjes vendore” dhe legjislacionin për menaxhimin e sistemit buxhetor në Republikën e Shqipërisë.

Nëse miratohet nga Këshilli Bashkiak, vendimi do të hyjë në fuqi pas konfirmimit ligjor nga Institucioni i Prefektit të Qarkut Vlorë. Saranda Web

The post Ndërmarrja e Shërbimeve kërkon 30 punonjës të rinj: Do menaxhojmë Terminalin dhe vendparkimet appeared first on Saranda News.

Është zhvilluar ditën e sotme në Gjykatën Administrative në Lushnje seanca gjyqësore për kërkesën e shfuqizimit të vendimit të Këshilli Bashkiak Sarandë lidhur me projektin për tjetërsimin e Eco Kampusit, një çështje që ka shkaktuar reagime të forta publike në qytetin e Sarandës. Në mbështetje të avokatit dhe aktivistit Rigels Dërvishi ishte i pranishëm edhe Adriatik Lapaj.

Gjatë seancës dolën në pah disa pranime tronditëse nga përfaqësuesit e institucioneve publike.

Përfaqësuesit e Bashkia Sarandë pranuan para trupit gjykues se nuk është zhvilluar asnjë dëgjesë publike për projektin dhe se këshilltarët bashkiakë janë informuar vetëm gjatë mbledhjes ku u votua vendimi.

Një tjetër skandal u pranua edhe nga Fondi Shqiptar i Zhvillimit, i cili deklaroi në sallën e gjyqit se marrëveshja me Bashkinë Sarandë ishte lidhur pa konsultim publik, duke u bazuar vetëm në pretendimin e bashkisë se qytetarët ishin informuar.

Akoma më e rëndë ishte deklarata e përfaqësuesve të Fondit Shqiptar të Zhvillimit, të cilët pranuan se në terren po kryhen punime edhe pse leja e ndërtimit ende nuk është zbardhur. Ndërkohë, përfaqësuesit e bashkisë dhanë një përgjigje që shkaktoi habi në sallë, duke deklaruar se “nuk e dinë” nëse punimet që po kryhen disponojnë leje ndërtimi apo jo.

Gjatë përpjekjes për të justifikuar mungesën e konsultimeve publike, bashkia tentoi të paraqiste si provë një sondazh, për të cilin nuk u sqarua as kur ishte realizuar dhe as ku ishte zhvilluar.

Seanca u ndoq nga afër edhe nga Saranda Web, për të informuar qytetarët mbi një prej zhvillimeve më të rëndësishme që lidhet me të ardhmen e një prej hapësirave publike më të rëndësishme në qytet.

Trupi gjykues caktoi seancën e radhës më 28 maj në orën 10:30, ku do të dëgjohen konkluzionet përfundimtare të palëve dhe më pas pritet shpallja e vendimit përfundimtar. Sipas zhvillimeve të deritanishme në sallën e gjyqit, vendimi do të jetë qartazi në favor të qytetarëve dhe kundër vendimit të kontestuar të Këshillit Bashkiak Sarandë. Saranda Web

The post Bashkia Sarandë pranon se nuk bëri dëgjesë publike për tjetërsimin e Eco Kampusit – VIDEO appeared first on Saranda News.

Gjatë diskutimeve në mbledhjen e Këshillit Bashkiak, Gërdhuqi është shprehur se mungesa e transparencës ndihet jo vetëm nga qytetarët e Sarandës, por edhe nga anëtarët e këshillit, të cilët sipas tij shpeshherë nuk informohen në mënyrë të plotë mbi projektet dhe vendimmarrjet që ndërmerren nga bashkia.

Ai ka theksuar se këshilltarët bashkiakë duhet të kenë akses të plotë mbi projektet konkrete që planifikohen apo realizohen në qytet, duke kërkuar nga Bashkia Sarandë që projektet të paraqiten dhe të diskutohen paraprakisht me anëtarët e këshillit.

Sipas Gërdhuqit, rritja e transparencës dhe përfshirja më e madhe e këshilltarëve në procesin e vendimmarrjes do të ndikonte pozitivisht në informimin e qytetarëve dhe në forcimin e besimit ndaj institucioneve vendore. Saranda Web

The post Ilirjan Gërdhuqi: Në bashkinë Sarandë mungon Transparenca dhe Llogaridhënia appeared first on Saranda News.

Debate të forta janë shënuar në mbledhjen e Këshillit Bashkiak Sarandë, ku Ibrahim Bajrami ka hedhur akuza të drejtpërdrejta ndaj Fondi Shqiptar i Zhvillimit, duke e cilësuar atë si “Fondi Shqiptar i Zhgënjimit”.

Gjatë fjalës së tij, Bajrami u shpreh se investimet në Sarandë po realizohen sipas dëshirës së institucionit, pa marrë në konsideratë mendimin e komunitetit lokal. Ai theksoi se projektet shpeshherë nuk reflektojnë nevojat reale të banorëve dhe nuk kalojnë në procese të mirëfillta konsultimi.

Si shembull konkret, ai përmendi një dëgjesë publike të zhvilluar më herët, ku sipas tij, jo vetëm që nuk u morën parasysh shqetësimet e qytetarëve, por u injorua edhe qëndrimi i kryetarit të atëhershëm të bashkisë, Adrian Gurma.

Deklaratat e Bajramit kanë rikthyer në vëmendje debatet mbi transparencën dhe mënyrën e zbatimit të investimeve publike në Sarandë, në një kohë kur kërkohet gjithnjë e më shumë përfshirje e qytetarëve në vendimmarrje. Saranda Web

The post “Fondi Shqiptar i Zhgënjimit” investon në Sarandë pa pyetur qytetarët – VIDEO appeared first on Saranda News.