Bujar Leskaj: Rama dështoi në mënyrë skandaloze me emergjencën e zjarreve
Deputeti i qarkut Vlorë, Bujar Leskaj, ka reaguar ashpër ndaj mënyrës se si qeveria menaxhoi emergjencën e zjarreve gjatë muajve korrik dhe gusht, duke e cilësuar si një “dështim skandaloz” dhe “papërgjegjshmëri kriminale” nga ana e kryeministrit Edi Rama.
Sipas tij, mijëra hektarë pyje dhe kullota u dogjën, ndërsa shteti shqiptar u tregua i zhveshur nga çdo strategji, kapacitet teknik dhe koordinim institucional.
Shifra që tregojnë dështimin
Leskaj thekson se Shqipëria ishte i vetmi vend në rajon që nuk kishte asnjë mjet ajror për shuarjen e zjarreve.
- Greqia vuri në veprim 20 mjete ajrore,
- Mali i Zi 9,
- ndërsa Shqipëria kishte zero.
“Për çdo vatër zjarri, ne dërgonim vetëm 15–30 zjarrfikës, kurse Mali i Zi mbi 50. Koha e reagimit tek ne arrinte deri në 12 orë, ndërsa fqinjët reagonin për 2 orë. Shqipëria u var 100% nga ndihma e huaj,” – u shpreh Leskaj.
Institucione të paafta dhe mungesë strategjie
Deputeti Leskaj akuzon qeverinë Rama se nuk ka një strategji kombëtare të përditësuar për menaxhimin e zjarreve dhe se kompetencat janë shpërndarë qëllimisht për të shmangur përgjegjësinë.
“Në vitin 2025, Shqipëria është i vetmi vend në rajon pa asnjë mjet ajror për emergjenca. Zjarrfikësit e varfër, pa pajisje mbrojtëse, u lanë si mish për top, ndërsa qeveria bënte propagandë nga Tirana,” – deklaron Leskaj.
Mungesë transparence dhe mashtrim publik
Sipas Bujar Leskaj, qeveria Rama nuk raportoi në kohë reale sipërfaqet e djegura dhe numrin e vatrave, duke manipuluar publikun dhe partnerët ndërkombëtarë.
“Banorët nuk morën informacion për evakuim, zjarrfikësit nuk kishin panoramë të qartë, ndërsa BE-ja kërkon transparencë të plotë. Qeveria Rama zgjodhi errësirën dhe mashtrimin,” – shtoi ai.
Apeli i Bujar Leskaj
Leskaj theksoi se Shqipëria ka nevojë urgjente për:
- mjete ajrore dhe pajisje moderne,
- një agjenci unike kombëtare për menaxhimin e fatkeqësive,
- strategji parandaluese me pastrim pyjesh dhe edukim të komuniteteve.
“Ky regjim ka bërë divorc me interesat e qytetarëve. Sekti Rama është rreziku më i madh për sigurinë e shqiptarëve,” – përfundon deputeti i qarkut Vlorë.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
