Deputetja Ina Zhupa denoncon mbajtjen mbyllur të Eco Kampus Saranda për 7 vite: A është trualli apo godina për oligarkët?
Deputetja Ina Zhupa ka ngritur shqetësimin e vazhdueshëm për mosfunksionimin e shkollës së re Eco Kampus në Sarandë, një projekt që duhej të ishte vënë në shërbim të komunitetit vite më parë. Zhupa akuzon se ndonëse janë shpenzuar plot 348 milionë lekë për këtë projekt, shkolla ka mbetur e mbyllur që nga viti 2017. Ajo e ka denoncuar situatën vit pas viti, duke kërkuar që fëmijët e Sarandës të kenë mundësinë të shkojnë në një shkollë moderne dhe të pajisur me mjetet e duhura për arsim.
Projekti i Eco Kampus, ndërtuar në ish-godinat qeveritare, është financuar nga qeveria shqiptare gjatë viteve 2016 dhe 2017, dhe fillimisht kishte një vlerë prej 270 milionë lekësh, ndërsa fondet janë rritur gjatë zbatimit të projektit. Megjithatë, pavarësisht investimit të madh, shkolla ka qëndruar e mbyllur për arsye ende të paqarta.
Zhupa ka akuzuar qeverinë dhe kryetarin e Bashkisë Sarandë, Olti Caci, për shpërdorim të parasë publike dhe për mungesë transparence. Sipas saj, në vend që shkolla të hapet dhe të shërbejë për komunitetin, po studiohet një projekt i ri për zhvillimin e zonës, i cili ngre shqetësimin se trualli ose godina mund të përfundojnë në duart e oligarkëve. Ajo ka kërkuar që ministrja e Arsimit, Ogerta Manastirliu, të ndërhyjë dhe të marrë masa për të vënë shkollën në funksion me fillimin e vitit të ri shkollor 2024-2025.
Zhupa shprehet se ky projekt duhet të vihet në shërbim të fëmijëve të Sarandës, të cilët ende mësojnë në godina të vjetruara dhe me turne, ndërsa shkolla e re qëndron e mbyllur.
