Ishte liruar përpara 7 muajsh, Jorgo Goro rikthehet përsëri pas hekurave në qeli
Vetëm shtatë muaj pasi kishte lënë pas muret e burgut, ish-kryebashkiaku i Himarës, Jorgo Goro, do të rikthehet sërish në izolim për të vuajtur pjesën e mbetur të dënimit të tij.
Mbrëmjen e djeshme, Goro është paraqitur në Komisariatin e Vlorës, ku është bërë edhe ekzekutimi i vendimit për masën “arrest me burg”. Ky rikthim në qeli vjen pas një vendimi të formës së prerë nga Gjykata e Posaçme e Apelit për Korrupsion dhe Krimin e Organizuar, e cila ka konfirmuar dënimin ndaj tij.
Sipas përllogaritjeve të SPAK, pas kohës së kaluar në paraburgim, ish-kryebashkiakut i mbeten edhe 6 muaj e 10 ditë për të shlyer nga dënimi. Fillimisht ai ishte dënuar me 2 vite burg, dënim që u reduktua në 1 vit e 4 muaj për shkak të gjykimit të shkurtuar.
Vendimi i Apelit lidhet me çështjen e tjetërsimit të një prone në zonën e Livadhës, për të cilën Goro ishte shpallur fajtor edhe më herët nga Gjykata e Posaçme kundër Korrupsionit dhe Krimit të Organizuar, me vendim të datës 30 korrik 2025.
Ky nuk është rasti i parë për Goron. Ai kishte vuajtur më parë 17 muaj burg për një tjetër dënim prej 2 vite e 20 ditësh, që lidhej me tjetërsimin e rreth 10 mijë metrave katrorë tokë në zonën e Gjilekut në Himarë. Edhe në atë rast, për shkak të gjykimit të shkurtuar, kishte përfituar ulje të dënimit dhe ishte liruar.
Rikthimi i tij në burg vjen si një tjetër zhvillim i fortë në çështjet që lidhen me abuzimet me pronat në bregdet, duke rikthyer në vëmendje një nga dosjet më të ndjeshme të drejtësisë në jug të vendit.
