Kledian Llaho është prezantuar ditën e sotme nga kryetari i KLP, Alfred Balla së bashku edhe me zv. kryetarin e KLP, Tartar Bazaj si drejtues i Prokurorisë së Sarandës për një mandat 3-vjeçar.
Prezantimi i drejtuesit të Prokurorisë, Kledian Llaho vjen pas vendimit të marrë nga KLP në mbledhjen e datës 30 janar 2023.
Kryetari Balla i uroi suksese drejtuesit Llaho ndërsa u shpreh se, për vetë rëndësinë që ka Prokuroria e Sarandës, KLP vendosi që ta përfshijë në hartën e re te sistemit të drejtësisë. Ndërsa kërkoi nga ana e prokurorëve të Sarandës impenjim maksimal të fokusuar në çështje të drejtpërdrejta tek qytetarët e rajonit.
Zv/kryetari Tartar Bazaj, pas urimit, u shpreh që prokuroria e Sarandës ka nevojë për një godinë të re, pasi mjediset aktuale nuk janë të mjaftueshme për punën e prokurorëve, por edhe të oficerëve të policisë gjyqësore.
Vetë drejtuesi i Prokurorisë, Kledian Llaho duke falenderuar KLP për vlerësimin dhe besimin për emërimin e tij në krye të Prokurorisë së Sarandës, kërkoi nga KLP dhe Prokuroria e Përgjithshme plotësimin e vendeve vakante në Prokurorinë e Sarandës, ku nga 6 prokurorë në organikë, aktualisht janë vetëm 4.
Drejtuesi i Prokurorisë Kledian Llaho e ka nisur karrierën në sistemin e drejtësisë prej vitit 1999, fillimisht si oficer i policisë gjyqësore në Prokurorinë e Sarandës, me pas në vitin 2004 si oficer i policisë gjyqësore në ish-Prokurorinë e Krimeve të Rënda.
Në vitin 2014, Kledian Llaho u emërua prokuror në Prokurorinë e Vlorës dhe prej vitit 2022 ka ushtruar funksionin e drejtuesit të komanduar në Prokurorinë e Sarandës.
