Dy persona janë arrestuar nga policia greke pasi rrëmbyen një foshnje nga nëna shqiptare dhe do ta shisnin për 50 mijë euro. Një police së bashku me kolegun e saj ia dolën që të merrnin foshnjën nga duart e grekëve dhe të parandalonin shitjen e djalit të vogël.
Ngjarja e rëndë ndodhi në rrugën Spyrou Patsi në Votaniko, ku dy burrat shkuan të vizitonin nënën 31-vjeçare me origjinë nga Shqipëria. Ata ishin miq të saj dhe sapo hyri në tualet, morën foshnjën me taksi dhe e çuan në një stacion metroje në Aegaleo. Aty do të zhvillonin takim me një grua, e cila kur ka parë policët është zhdukur.
Fëmijën po e mbante me kokën poshtë. I pyetëm nëse ishte e tyre, na thanë jo”, tha punonjësi i policisë bashkiake. Pasi u shoqëruan në polici, kanë rrëfyer motivin e aktit të tyre.
“Fëmijën ia kemi marrë nënës me qëllim që ta shesim për 50 mijë euro”, tha një i pandehur. Por më pas ata ndryshuan rrëfimin dhe thanë se nuk donin ta shisnin foshnjën por thjesht ta bënin shëtitje. Pak orë pas arrestimit të tyre, nëna e foshnjës është thirrur nga policia dhe ka shkuar në komisariat duke thënë se ia morën kur ishte në tualet.
“Nuk e kam dhënë. E kanë marrë vetë. Të dy janë miqtë e mi dhe ishin në shtëpinë time kur hyra në tualet. Kur dola nga banja mendova se foshnja po flinte. I akuzuari më thirri nga policia dhe më tha të shkoja në polici”, tha nëna.
Një person kyç në rastin e rrëmbimit të foshnjës dyshohet të jetë edhe babai i tij që jeton në një qytet tjetër. Sipas informacioneve të Star, policia do të hetojë edhe mundësinë që dy të rinjtë me origjinë greke, 30 dhe 33 vjeç, i përkasin një rrjeti të trafikut të foshnjave, ndonëse është i cuditshëm rrëfimi i tyre i parë që do ta shisnin për 50 mijë euro.
Saranda News
