Rama bën për ujë të ftohtë kryetarët e bashkive: “Skandaloze që nuk kanë bërë asnjë projekt për shërbimet sociale”
Kryeministri Edi Rama ka kritikuar ashpër kryetarët e bashkive për mungesën e angazhimit të tyre në ngritjen e projekteve për shërbimet sociale, pavarësisht fondeve të vëna në dispozicion nga qeveria. Gjatë një fjalimi, Rama u shpreh i pakënaqur me qasjen e bashkive ndaj nevojave të qytetarëve në fushën e mirëqenies sociale, duke e quajtur këtë situatë “skandaloze”.
“Nuk kanë marrë asnjë qindarkë nga fondet që kemi vendosur në dispozicion për shërbimet sociale, sepse nuk kanë bërë asnjë projekt. Kjo është e paimagjinueshme, kur nevojat në bashkitë tuaja janë shumë më të mëdha sesa ato që ne mund të mbulojmë me këto shuma,” tha Rama.
Ai theksoi se 33 mijë qytetarë po përfitojnë nga projektet që janë zbatuar deri tani falë këtij transformimi, me mbi 1 miliard lekë të reja të shpërndara nga qeveria për të mbështetur shërbimet sociale. Megjithatë, shumë bashki nuk kanë bërë përpjekje për të përfituar nga këto fonde.
“Është e pakuptueshme që fondet e fondit social të mbeten të paabsorbuara, ndërkohë që bashkitë kanë nevoja të mëdha për përmirësimin e shërbimeve për gratë me fëmijë të vetmuar, fëmijët autikë dhe kategoritë e tjera vulnerabël,” vazhdoi kryeministri, duke krahasuar bashkitë që kanë performuar mirë, si Kamza dhe Vora, me ato që kanë dështuar në shfrytëzimin e fondeve.
Për Sarandën dhe bashkitë e tjera të rajonit, këto kritika të kryeministrit sjellin në vëmendje rëndësinë e investimeve në shërbimet sociale. Ndërsa qytetarët përballen me sfida të shumta, veçanërisht në grupet më të ndjeshme të popullatës, shfrytëzimi i fondeve të qeverisë mund të sjellë përmirësime të prekshme në cilësinë e jetesës së tyre.
Qytetarët e Sarandës, Delvinës, Finiqit dhe Konispolit do të jenë në pritje të përgjigjeve nga autoritetet lokale për të parë nëse këto fonde do të përfitojnë në mënyrë efektive për përmirësimin e jetës së përditshme të banorëve.
