Rama i pakënaqur me kryebashkiakët: Niveli i ndërveprimit me qytetarët është shumë i ulët
Kryeministri Edi Rama ka adresuar një sërë kritikash ndaj kryebashkiakëve në të gjithë vendin, duke theksuar mungesën e angazhimit të tyre në platformën e Bashkëqeverisjes, një mjet kyç për ndërveprimin me qytetarët. Sipas tij, niveli i përgjigjes dhe ndërveprimit përmes kësaj platforme mbetet shumë i ulët, duke mos arritur pritshmëritë e krijimit të saj. Platforma është projektuar për t’i dhënë qytetarëve një mundësi të drejtpërdrejtë për të paraqitur ankesat e tyre, pa pasur nevojë të përballen me burokraci.
“Nuk ka asnjë bashki që të ketë platformën e Bashkëqeverisjes në një nivel ekselent. Nuk po i jepni përgjigje qytetarëve, ndërsa ne kemi krijuar një sistem të tërë për t’i ardhur në ndihmë atyre,” deklaroi Rama.
Ai shtoi gjithashtu se qeveria ka vënë në dispozicion fonde për shërbime sociale që shumë bashki nuk po i shfrytëzojnë. “Është një problem i organizimit dhe mungesës së projekteve nga ana e bashkive,” tha kryeministri, duke theksuar se këto fonde janë të destinuara për përmirësimin e kushteve të jetesës për qytetarët, por mbeten të pashfrytëzuara për shkak të neglizhencës.
Kjo deklaratë vjen në një moment kritik për shumë bashki të vendit, ku presioni për përmirësimin e shërbimeve për qytetarët është në rritje. Për Sarandën dhe zonat përreth, është thelbësore që kryebashkiaku dhe administrata të marrin parasysh këto kritika dhe të intensifikojnë përpjekjet për të ofruar shërbime më efikase dhe të përgjegjshme për komunitetin.
