Deputetja Ina Zhupa denoncon vjedhjet strategjike në Manastir: “Ndalni grabitjen e pronave të banorëve!”
Sarandë – Deputetja e Partisë Demokratike, Ina Zhupa, ka reaguar ashpër ndaj asaj që e cilëson si një tjetër akt grabitjeje të pronave të qytetarëve në emër të “investimeve strategjike”. Sipas saj, banorët e Manastirit, mbi plazhin Pasqyra, rrezikojnë të humbasin shtëpitë e tyre për t’i hapur rrugë një projekti që favorizon një investitor të madh.
“Hajdutëria dhe babëzia mbi pronat e lakmuara të vendit vazhdon në emër të investimeve strategjike. Edhe në muajt e fundit para përzënies me votë, kjo qeveri nuk i ndal vjedhjet strategjike,” – është shprehur Zhupa.
Banorët e prekur nga ky vendim kanë protestuar sot në Sarandë, por asnjë institucion nuk ka reaguar. Sipas tyre, ata po kërcënohen për të braktisur banesat e tyre, ndërkohë që shteti hesht përballë padrejtësisë që po u bëhet.
“Është vjedhje dhe skandal të marrësh pronat e qytetarëve, t’i rrafshosh, me qëllimin për t’ia dorëzuar një investitori strategjik.” – ka vijuar deputetja demokrate, duke akuzuar ministren e Turizmit dhe Mjedisit, Mirela Kumbaro, se me miratimin e këtyre projekteve po dëmton banorët e zonave bregdetare.
Zhupa ka siguruar qytetarët se do të vijojë të denoncojë këtë fenomen dhe do të qëndrojë në mbështetje të tyre në betejën për të mbrojtur pronat e tyre nga ajo që ajo e cilëson si “ligji për vjedhjet strategjike”.
Saranda Web do të vijojë të ndjekë zhvillimet mbi këtë çështje.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
