Banorët e lagjes nr. 1 në Sarandë: Fëmijët tanë janë në rrezik! Kërkojmë urgjentisht kangjella mbrojtëse
Një shqetësim i madh po rëndon mbi banorët e lagjes nr. 1 në Sarandë, konkretisht në rrugën “Bilal Golemi”, mbi Hotel “Chicago”. Përmes një mesazhi drejtuar redaksisë së Saranda Web, një banore e zonës ka ngritur alarmin për mungesën e sigurisë në trotuaret e kësaj rruge, duke theksuar se rreziku për fëmijët është real dhe i përditshëm.
“Sa herë që fëmijët tanë luajnë jashtë, jeta e tyre është në rrezik. Rruga është e lartë, dhe në mungesë të kangjellave mbrojtëse, një rrëshqitje apo rënie mund të jetë fatale – bëhet fjalë për një lartësi rreth 10 metra,” – thekson qytetari në mesazhin e tij.
Sipas banores, trotuaret janë ndërtuar prej rreth 6 vitesh, por ende nuk janë përfunduar. Për më tepër, përkundër dy ankesave të dorëzuara në Bashki – një vit më parë dhe më pas përsëri – situata mbetet e pandryshuar.
“Kërkojmë që institucionet përgjegjëse të ndërhyjnë urgjentisht për vendosjen e kangjellave mbrojtëse. Është detyrimi më minimal për të siguruar jetën e banorëve dhe fëmijëve tanë. Të veprojmë sot, përpara se të ndodhë ndonjë tragjedi,” – përfundon ajo.
Saranda Web i bashkohet thirrjes së banorëve dhe bën apel ndaj institucioneve për të marrë masa të menjëhershme.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
